Mbatushile tshilejilu tshimpe tshia lulamatu
1 Bakatuadija kuteka bamue bana betu bampanda-njila ba pa buabu mu 1937. Bana betu balume ne bakaji bakavua bamanye kuyisha bimpe bakitaba bua kuenza mudimu eu muaba wonso uvua bulongolodi buetu bubatuma. Kukadi bidimu bia bungi mpindieu bidi bampanda-njila aba bikale anu bilejilu bimpe bitudi mua kulonda.—Eb. 6:12.
2 Bakapita kumpala: Ku ntuadijilu, bampanda-njila ba pa buabu bakapita kumpala mu diyisha lumu luimpe ne bisanji bia fono bivuabu benda nabi ku nzubu ya bantu. Bavua kabidi baya ne miyuki ya mu Bible mikuate ku bisanji bua kuyelela bantu bakavua babateleje kabidi. Bavua benzela mudimu eu mu bimenga binene mukavuabu benze bisumbu. Pashishe, kutuadijabu kubatuma mu miaba ivuabu dijinga ne bamanyishi ba lumu luimpe. Bakatungunuka ne kuya kutangila bantu ne kulonga nabu Bible. Bua mudimu wabu mukole eu, kuakenzeka bisumbu bia bungi. Mudimu wabu wa tshisumi eu wakambuluisha bikole bua bulongolodi buetu kudiundabu bu mutudi tubumona lelu eu. (Yesh. 60:22) Bampanda-njila ba pa buabu batshidi anu batungunuke ne kuenza mudimu mukole mu dimuangalaja dia lumu luimpe ‘munkatshi mua bifukibua bionso muinshi mua diulu.’—Kolos. 1:23.
3 Mbakanyine tuetu kubidikija: Bamue bampanda-njila ba pa buabu bakadi benze mudimu eu munkatshi mua bidimu bia bungi. Mu bidimu bionso ebi, mbapitshile mu mateta a mishindu mivule ne mateta aa mmakoleshe ditabuja diabu. (1 Pet. 1:6, 7) Mbitabe bua kushiya nzubu yabu ne bintu biabu bua kuya muaba udibu dijinga ne bamanyishi. Bamue bakadi bakulakaje, bakuabu basama anyi bikale ne ntatu mikuabu. (2 Kol. 4:16, 17) Nansha nanku, badi ‘bakuama mamuma too ne mu bununu buabu.’ (Mus. 92:14) Badi beyemena Yehowa ne yeye pende udi ubambuluisha.—Mus. 34:8; Nsu. 10:22.
4 Bampanda-njila ba pa buabu mbantu batudi ne bua kuela kalumbandi. Binuikala nabu mu tshisumbu tshienu, ikala usomba nabu bikole, ulongela malu a bungi kudibu. Bela tuasakidila bua mudibu bayisha lumu luimpe lua Bukalenge ne tshisumi. Mbimpe tshisumi tshiabu tshikukoleshe ku muoyo. Bantu bonso badi babidikija nebalue balunda ba Yehowa ne neabambuluishe, bualu bantu “badi benza malu a bushuwa badi bamusankisha.”—Nsu. 12:22.