Buakabuluibua​—Nkomenu wabu munene ukadi pabuipi!

¹ ‘Muntu udi ubala, ne badi bumvua mêyi a buambi ebu, ne badi balama malu adi mafundamu badi ne disanka; bualu tshikondo tshidi pabuipi.’ (Buak. 1:3) Mêyi aa adi aleja mushinga udi nawu mukanda wa Buakabuluibua nangananga mu tshikondo tshitudi etshi tshidi milayi ya bungi idimu ne bua kukumbana. Kubangila mu lumingu lua matuku 8 a ngondo wa kumpala wa tshidimu tshia 2007, netutuadije kulonga mukanda wa Buakabuluibua​—Nkomenu wabu munene ukadi pabuipi! mu Dilonga dia Mukanda dia Tshisumbu.

² Katshia musangu wa ndekelu utuvua balonge mukanda wa Buakabuluibua​—Nkomenu!, malu a pa buloba apa mmashintuluke bikole. (1 Kol. 7:31) Kudi kabidi bantu ba bungi badi babange kuyisha lumu luimpe lua Bukalenge badi kabayi banji kulongaku mukanda wa Buakabuluibua eu mvese ku umue ku umue to. Dilonga dia mukanda wa Buakabuluibua​—Nkomenu! nedituambuluishe tuetu bonso bua kushala batabale, bindile malu adi alua kumpala eku.​—Buak. 16:15.

³ Enza muebe muonso bua kubuelamu lumingu luonso. Malu atualonga kaakutuambuluisha anu bua kushala batabale patupu to, kadi kabidi mikenji ivua Yezu mutumine bisumbu muanda mutekete neyituambuluishe payi bua kuepuka nsombelu idi mua kutunyangila malanda etu ne Nzambi ne kutupangisha mua kuyisha.​—Buak. 1:11, 19.

⁴ Dilongolola bimpe: Kumpala kua dilonga dionso, ikala ubala mvese yonso ya mu Buakabuluibua idi mu tshitupa tshinualonga. Keba bua kumona mudibu bayumvuija mu mukanda eu ku diambuluisha dia mvese mikuabu. Uditatshishe bua kumvua malu mu mushindu udiwu mua kukulenga ku muoyo, biobi kukusaka bua kuatumikila. (Neh. 8:8, 12) Ela meji a biudi ulonga ne udiebeje mushindu eu: ‘Tshidi bualu ebu bundongesha ntshinyi bua Yehowa ne bua dikumbana dia disua diende? Mmunyi mundi mua kuenza malu adiye musue ne kuambuluisha bakuabu bua kuatumikilabu?’

⁵ Kukadi mpindieu bidimu 92 katshia ‘dituku dia Mukalenge’ diatuadija mu 1914. (Buak. 1:10) Malu a kukema adi ne bua kuenzeka akavuabu baleje mu Buakabuluibua akadi anu pabuipi apa. Dilonga dia mukanda wa Buakabuluibua​—Nkomenu! nedikishishe mioyo yetu ne meji etu ne neditukoleshe mu ditabuja patuajingulula mukadi ‘mvita ya dituku dinene dia Nzambi wa Bukole Buonso’ ne bulongolodi buende bupiabupia pabuipi.​—Buak. 16:14; 21:4, 5.