Nshapita 3
Malu adi ne bua kufika mu tshitupa tshîpi
1. Mmunyi muwapanduka ku dikumbajibua dia dilumbuluisha dia Nzambi pa bulongolodi ebu?
MBIAKANE bua wewe kutamba kutabalela mianda idi yenzeka pa buloba bujima mu tshikondo tshietu etshi. Bua tshinyi? Bualu bulongolodi ebu kabuena mua kupanduka ku dilumbuluisha dia Nzambi nansha. Kadi, wewe, udi mua kupanduka pa kudilama bua “kubenga kuikala muena mu bulongolodi ebu” bufundila tshibawu tshia kabutu. Abi kabiena biumvuija kuikala ne nsombelu wa didikengesha peshi wa didikanda mu bionso to. Kadi, mbimpe wikale ne nsombelu mulenga udi ne tshipatshila, eku wepuka dibuelakana mu malu a tshididi, a bungenda-mushinga bua zukuzuku, a bitendelelu bidi kabiyi binemeka Nzambi, ne kuimansha bienzedi bionso bia tshikisu ne bia tshiendenda. Bia muomumue, udi ne bua kulonda mêyi-maludiki a Nzambi ne kukeba mua kuenza disua diende. (Yone 17:14-16; Sefanya 2:2, 3; Buakabuluibua 21:8) Mukanda wa mu Bible wa Buakabuluibua udi uleja bulenga bua wewe kudienzeja mu malu aa ne kuenza mashintuluka adi akengedibua mu nsombelu webe.
2. Mmu miaku kayi mudi mupostolo Yone utuadija ne mbuelelu wa mulayi wa dikema wa Buakabuluibua, ne mbanganyi badi Nzambi umanyisha mukenji eu wa mushinga mukole?
2 Mupostolo Yone udi ufunda mêyi a mbuelelu bua mulayi eu wa dikema mushindu’eu: “Buakabuluibua bua Yesu Kristo, budi Nzambi mumupeshe bua kuleja bapika bende malu adi ne bua kufika mu tshitupa tshîpi.” (Buakabuluibua 1:1a) Nenku, Yezu Kristo mubiishibue ku lufu ke wakapeta mukenji eu wa mushinga mukole kudi Nzambi. Apa, Yezu mmulejibue bu mukokedi wa Tatuende, kadi, kêna umue wa mu Busatu-Bunsantu busokome to. Bia muomumue, “bapika” badi benza tshisumbu tshia bena nkristo badi bakokela pabo Yezu Kristo; nanku ‘badi batungunuka ne kumulonda kuonso kudiye uya.’ (Buakabuluibua 14:4; Efeso 5:24) Kadi, mbanganyi badi “bapika” ba Nzambi lelu’eu, ne nku tshinyi kudi Buakabuluibua buikale ne mushinga kudibo?
3. (a) “Bapika” badi bakokela Yezu Kristo mbanganyi? (b) Mmudimu kayi udi “bapika” bena lulamatu bakumbaja ku bulombodi bua banjelo?
3 Mupostolo Yone, mufundi wa Buakabuluibua, udi udileja yeye muine bu mupika wa mushindu’eu. Uvua mupostolo wa ndekelu uvua mushale ne muoyo ne uvua muena mu kasumbu ka “bapika” basungula ne bela manyi a spiritu, badi bapiana muoyo ukena-ufua mu diulu. Lelu’eu, kutshidi’amu binunu bikese bia “bapika” aba pa buloba. Nzambi udi kabidi ne basadidi bakuabo, musumba munene muenza ne balume, bakaji ne bana, bakadi batue mpindieu ku miliyo. Ku bulombodi bua banjelo, mbadisangishe kudi “bapika” bela manyi bua kumanyisha lumu luimpe lua kashidi kudi bantu buonso. Mmushindu kayipu udi “bapika” aba badifila ne kasuki bua kuambuluisha bantu bena bupuekele ba pa buloba bua kupeta lupandu! (Matayi 24:14; Buakabuluibua 7:9, 14; 14:6) Buakabuluibua udi ukuleja mushindu wa kupeta diakalenga didi difumina ku lumu luimpe ludi lupetesha disanka.
4. (a) Yone mumane kufunda mukanda wa Buakabuluibua kukadi bidimu bipite pa 1 900, mmunyi muvuaye mua kuakula bua “malu adi ne bua kufika mu tshitupa tshîpi”? (b) Mianda idi ijadika tshinyi mpindieu pa bidi bitangila malu avuabo badianjile kumanyisha?
4 Kadi, mmunyi muvua Yone mua kuamba ne: “bapika” aba bavua ne bua kumona “malu adi ne bua kufika mu tshitupa tshîpi”? Mêyi aa kaavuapu mamba kukadi bidimu bipite pa 1 900 anyi? Bua mmuenenu wa Yehowa, udi bidimu tshinunu bimueneka bu “dituku dishale” ku mêsu kuende, bidimu 1 900 bidi bileja tshikondo tshîpi pa kutshifuanyikija ne etshi tshikena kuelekeja natshi tshivuaye mupitshishe mu midimu ya bufuki ne ku dilongolola buloba, tshisombelu tshia muntu. (Musambu wa 90:4) Mupostolo Paulo wakafunda pa bidi bitangila ‘dindila diende ne mutshima kulukulu ne bua ditekemena diende,’ bualu, kabiyi mpata, bulelela bua difutu diende buvua bumueneka pabuipi ku mêsu kuende. (Filipoi 1:20) Kadi, lelu’eu, kudi bijadiki bivule bia se: malu onso madianjila kumanyisha neakumbane mu tshikondo tshijadika. Bua musangu wa kumpala mu Mianda ya bantu, dipanduka mene dia bukua-bantu didi mu njiwu. Anu Nzambi ke udi mua kujikija tshilumbu etshi!—Yeshayi 45:21.
Njila wa mamanyisha
5. Mmunyi muvuabo bamanyishe Buakabuluibua kudi mupostolo Yone ne pashishe kudi bisumbu?
5 Buakabuluibua 1:1b, 2 udi utungunuka nenku: “Ne [Yezu] wakatuma muanjelo wende ne ku butuangaji buende wakabuleja [Buakabuluibua] mu bimanyinu kudi mupika wende Yone, wakajadika dîyi divua Nzambi mufile ne bumanyishi bua Yezu Kristo, eyowa, malu wonso avuaye mumone.” Nenku, Yone wakapeta buakabuluibua bumumanyisha ku buenzeji bua spiritu wa Nzambi ku butuangaji bua mutuadi wa mukenji, muanjelo. Wakabufunda mu muvungu wakatumaye mu bisumbu bia mu tshikondo tshiende. Tudi ba diakalenga, bualu, Nzambi wakabulama bua dikoleshibua dia bisumbu bitue ku 100 000 bia basadidi bende badi mu buobumue pa buloba.
6. Mmu miaku kayi muvua Yezu muleje eu uvua ne bua kufila biakudia bia mu nyuma kudi ‘bapika’ bende lelu’eu?
6 Nzambi wakatumika ne njila kampanda bua kumanyisha Buakabuluibua mu matuku a Yone, ne muine mupostolo eu uvua mumanyishi wa pa buloba wa ku aba bavua benza njila eu. Bia muomumue lelu’eu, Nzambi udi ne njila udiye udiishila ‘bapika’ bende mu nyuma. Mu mulayi wende munene udi utangila nshikidilu wa bulongolodi ebu bua malu, Yezu wakamanyisha eu uvua ne bua kutumika pa buloba bu “mupika wa lulamatu ne wa budimu udi mfumuende muteke pa bena mudimu bende, bua kubapesha biakudia biabu mu tshikondo tshiakane.” (Matayi 24:3, 45-47) Udi utumika ne bena mu kasumbu aka ka Yone bua kusokolola diumvuija dia mulayi eu.
7. (a) Bimanyinu bia Buakabuluibua bidi ne bua kuikala ne buenzeji kayi kutudi? (b) Kukadi bidimu bungi munyi katshia bamue ba ku bena mu kasumbu ka Yone batuadija kudifila mu mudimu wa dikumbajibua dia bikena-kumona bia mu Buakabuluibua?
7 Mupostolo Yone mmufunde ne: Yezu wakaleja Buakabuluibua “mu bimanyinu” peshi bimfuanyi, bia buenzeji bukole ne bidi bikemesha pa kubikonkonona. Bidi biakula bua bienzedi bia bukole bidi ne bua kutusaka ku dienza madikolela ne mitalu bua kumanyisha bakuabo mulayi eu ne diumvuija diawu. Mukanda wa Buakabuluibua udi utuleja bikena-kumona bidi bisanguluja, ne mu tshikena-kumona tshionso, Yone uvua mukumbaji wa bualu kampanda peshi uvu’amu mubandidi patupu. Bena nkristo bena mu kasumbu ka Yone, bamue ba kudibo bavua badifile mu dikumbajibua dia bikena-kumona ebi kukadi bidimu bia bungi, badi ne disanka bua mudi spiritu wa Nzambi musokolole diumvuija diabi, mpindieu, mbakumbane mua kubiumvuija bantu nabo.
8. (a) Ntshinyi tshidi tshisunguluja tshionso tshia ku bikena-kumona bia mu Buakabuluibua? (b) Mmunyi mudi mulayi wa Danyele utuambuluisha bua kujingulula tshidi nyama ya mu Buakabuluibua ileja?
8 Bikena-kumona ebi bia mu Buakabuluibua ki mbileja bilondangana bilondeshile tshikondo ne dîba nansha. Tshionso tshia kudibi tshidi tshikumbana mu tshikondo tshiatshi. Bikena-kumona bivule bidi mu diumvuangana ne milayi mivule ya kale idi ifila mamanyisha adi akengedibua bua kubiumvuija. Tshilejilu, mulayi wa Danyele udi wakula bua nyama inayi mikuate buowa, bilondeshile diumvuija diende, mine eyi idi ileja makokeshi anayi a pa buloba. Nenku, etshi ndiambuluisha ditupesha bua kujingulula ne: nyama ya mu Buakabuluibua idi tshimfuanyi tshia makokeshi a tshididi, pamue ne aa adiku lelu’eu.—Danyele 7:1-8, 17; Buakabuluibua 13:2, 11-13; 17:3.
9. (a) Anu bu Yoane, nngikadilu kayi uvua nende bena mu kasumbu ka Yone? (b) Bilondeshile Yone, njila wa diakalenga nnjila kayi?
9 Yone wakajadika ne lulamatu mikenji ivua Nzambi mumumanyishe ku butuangaji bua Yezu Kristo. Wakalonda “malu wonso avuaye mumone,” ku bumue ku bumue. Ne bena mu kasumbu ka Yone bakakeba bushuwa buludiki bua Nzambi ne bua Yezu Kristo bua kujingululabo mulayi ne bua kumanyisha bitupa biawu bia mushinga mukole kudi tshisamba tshia Nzambi. Bua diakalenga dia tshisumbu tshiela manyi (ne bua musumba munene wa pa buloba bujima walamabo kudi Nzambi ne muoyo ku dikenga dinene), Yone wakafunda ne: “Wa diakalenga ng’eu udi ubala ne dîyi dikole ne aba badi bumvua mêyi a mulayi eu, ne badi batumikila malu adi mafundamu; bualu tshikondo tshijadika tshiasemenyi pabuipi.”—Buakabuluibua 1:3.
10. Mu diumvuangana ne Buakabuluibua, tshia kuenza ntshinyi bua kupeta disanka?
10 Neupete disanka dinene pa kubala Buakabuluibua, ne kupita apu, pa kutumikila malu adi mafundamu. Yone mene wakumvuija mu umue wa ku mikanda yende ne: “Monayi tshidi dinanga dia Nzambi diumvuija: tutumikile mikenji yende; ne mikenji yende kayena ne bujitu, bualu tshionso tshiakaledibua kudi Nzambi tshidi tshitshimuna bulongolodi ebu. Ne monayi tshitshimunyi tshidi tshitshimune bulongolodi ebu: ditabuja dietu.” (1 Yone 5:3, 4) Biwapeta ditabuja dia mushindu’eu, newikale muena disanka dipite bunene!
11. (a) Bua tshinyi bidi bia lukasa bua tuetu kutumikila mêyi a mu mulayi? (b) Ntshikondo kayi tshia njiwu tshidi tshisemene mpindieu pabuipi?
11 Bidi bia lukasa bua tuetu kutumikila mêyi a mu mulayi, “bualu tshikondo tshijadika tshiasemenyi pabuipi.” Ntshikondo kayi atshi? Tshia dikumbana dia milayi ya Buakabuluibua—pamue ne malumbuluisha a Nzambi. Tshikondo tshiasemenyi pabuipi tshikala Nzambi ne Yezu Kristo ne bua kukumbaja dilumbuluisha dia kashikija pa bulongolodi bua Satana bua pa buloba bujima. Patshivua Yezu pa buloba, wakamba ne: anu Tatu wende ke udi mumanye ‘dituku adi peshi dîba adi.’ Ne meji matuma ku bimvundu bidi bivulangane pa buloba bidi mu matuku etu aa, Yezu wakamba kabidi ne: “Bantu ba mu tshikondo etshi kabakujika buonso diambedi malu aa wonso kaayi makumbane.” Nanku, tshikondo tshijadika bua dikumbaja dia dipangadika dia Nzambi tshidi pabuipi ne ntshia njiwu mikole. (Mako 13:8, 30-32) Anu mudi Habakuka 2:3 wamba: “Tshikena-kumona tshitshidi bua tshikondo tshijadika, ne tshidi tshienda lukasa too ne ku nshikidilu, ne katshiakuamba dishima to. Nansha bianengatshi, tungunuka ne kutshindila; bualu, netshikumbane bushuwa. Katshiakujanguluka to.” Nenku, tutumikilayi malu adi mu Dîyi dia buprofete dia Nzambi, bualu, lupandu luetu ku dikenga dinene ndusuikakajaku.—Matayi 24:20-22.
[Kazubu mu dibeji 15]
Bua tuetu kujingulula mukanda wa Buakabuluibua, bidi bikengela
• Kupeta diambuluisha dia spiritu wa Yehowa
• Kusunguluja tshikondo tshiakatuadija dituku dia Mukalenge
• Kujingulula mupika wa lulamatu ne wa budimu wa mu matuku etu aa