Mmunyi mutudi mua kuambuluisha?
1 Misangu mivule patu Bantemu ba Yehowa bumvua ne: tshipupu ntshikuate bena mu ditunga kampanda, batu bebeja ne: “Mmunyi mutudi mua kuambuluisha?” Anu bu mudi Bienzedi 11:27-30 uleja, bena Kristo ba mu bidimu lukama bia kumpala bakafila bintu bua kuambuluisha bana babu ba mu Yudaya bavua mu tshiyole tshia nzala.
2 Matuku etu aa, mikenji mmianyishile bulongolodi buetu bua kukuata mudimu ne makuta bua kuambuluisha bantu ne kubakuatshisha ne bintu padibu mu dikenga dikebesha kudi bipupu bikuabu anyi bua njiwu mikebesha kudi bantu ne padibu mu ntatu mikuabu.
3 Tshilejilu, tshidimu tshishale etshi, bana betu ba bungi bavua bafile mfranga bua kuambuluisha bavuabu batatshishe kudi mavuala makole a mâyi majudija kudi tshikumina (tsunami) tshivua tshienzeke mu mbuu ku luseke lua ku Asie wa ku Sud. Tudi ne dianyisha dia bungi bua makuta aa avua bana betu bafile ne muoyo mujima bua kuambuluisha bawetu bavua mu dikenga. Kadi, bilondeshile mikenji ya amue matunga, padi muntu ufila makuta ende bua tshipupu kampanda, bidi bikengela kuatula anu bua tshivuaye muafidile, kabidi anu mu tshikondo kampanda, nansha bana betu aba bamane kupeta diambuluisha dikuabu.
4 Ke bua tshinyi makuta a kuambuluisha nawu bantu badi mu dikenga mbaele mu tshibutshilu tshia mudimu wa pa buloba bujima. Makuta aa badi baatula bua kukumbaja majinga a mu nyuma a bena Kristo netu pa buloba bujima. Pikala muntu musue kufila makuta makuabu pa kumbusha a mudimu wa pa buloba bujima, ki mbibi to, ne netuatule bua kuambuluisha bana betu ba muaba kayi wonso badi dikenga dikuate. Kadi, bua makuta a nunku nebikale bimpe nuenu nuafila kanuyi nuelela mikenji bua muaba ne bua tshidibu mua kuatudila.
5 Tshitudi tufidila makuta aa nangananga mbua ikalaku a bungi menemene bua midimu yetu ya Bukalenge pa mutu pa kualama anu bua kuambuluisha bana betu badi dikenga mua kukuata mu matuku adi kumpala. Bualu ebu budi bumvuangana ne lungenyi ludi mu Efeso 4:16 (MMM) bua kuenza mudimu mu buobumue ne kufila tshidi tshikengedibua bua ‘mubidi udiunde ne ukole wowu nkayawu mu dinanga.’