Balongolola tshishiki bua kuikala balongeshi ba Dîyi dia Nzambi
‘Nzambi wakatukumbaja kabidi bu bena mudimu.’—2 KOLINTO 3:5, 6.
1, 2. Mmunyi mutu bantu badienzeja imue misangu bua kuyisha, kadi bua tshinyi batu bapangila misangu mivule?
UDI mua kumvua tshinyi buobu bakupeshe mudimu uudi kuyi mumanye mua kuenza? Tshinka ne: bintu biudi nabi dijinga bua kuenza mudimu eu bidi kumpala kuebe. Kadi kuena ne lungenyi nansha lukese to bua pa kubangila nawu. Tshidi tshitonda kabidi ntshia se: mbakuambile bua kuenza mudimu eu lukasa lukasa. Ne wewe ke udi bantu bonso batekele muoyo. Bualu bua nunku budi mua kukudidisha ne muadi!
2 Lutatu lua buena elu ki ndufuikakaja patupu mu lungenyi to. Angata tshilejilu: Imue misangu, tshimue tshia ku bitendelelu bia Bukua-buena-Kristo tshikadi tshitete bua kulongolola bua kuyisha ku nzubu ne ku nzubu. Kadi misangu mivule kunyima kua mbingu anyi ngondo mikese batu bapangila bua kutungunuka nawu. Bua tshinyi? Bukua-buena-Kristo ki mbuambuluishe bantu badimu bua kukumbanyina mudimu eu to. Nansha balombodi ba bitendelelu ki mbakumbane bua kuenza mudimu wa buambi to, nansha mudibu balonge bidimu bia bungi mu tulasa tua malu a tshianana ne tua seminere. Bua tshinyi tudi tuamba nunku?
3. Mmuaku kayi udibu bambulule misangu isatu mu 2 Kolinto 3:5, 6, ne ntshinyi tshidiwu umvuija?
3 Dîyi dia Nzambi ke didi diumvuija tshidi tshivuija muyishi mulelela wa lumu luimpe lua bena Kristo mukumbane. Mupostolo Paulo wakafunda ku bukole bua nyuma wa Nzambi ne: ‘Ki mbua [se:] tuetu tudi tukumbana nkayetu bua kudibadila bualu [bu budi] bufuma kutudi, kadi dikumbana dietu didi difuma kudi Nzambi; yeye wakatukumbaja kabidi bu bena mudimu.’ (2 Kolinto 3:5, 6) Tangila muaku udibu bambulule misangu isatu muaba eu: ‘kukumbana.’ Muaku eu udi umvuija tshinyi? Nkonga-miaku kampanda udi wamba ne: “Padibu bawangata bua bintu [muaku wa mu tshiena-Gelika tshia kale eu] udi umvuija ne: ‘bia bungi’ . . . ; padibu bawangata bua bantu, udi umvuija ne: ‘mumanye,’ ‘muakanyine.’” (Vine’s Expository Dictionary of Biblical Words) Nunku, muntu udi ‘mukumbane’ mmumanye ne mmuakanyine bua kuenza mudimu kampanda. Kakuyi mpata, bena mudimu balelela ba lumu luimpe mbakumbane bua kuenza mudimu eu. Mbamanye, mbakumbane peshi mbakanyine mudimu wa diyisha.
4. (a) Mmunyi mudi tshilejilu tshia Paulo tshileja ne: dikumbana mua kuenza mudimu wa bena Kristo ki ndilamina anu bantu bakese basunguluke? (b) Mbintu kayi bisatu bidi Yehowa utuvuija nabi bakumbane bua kuikala bena mudimu?
4 Kadi dimanya mua kuenza mudimu eu didi difumina penyi? Nku bipedi ta mamanya bia muntu anyi? Nku meji ende matue bikole anyi? Peshi nku malu adiye mulongele mu bilongelu biende lumu? Bidi bimueneka ne: mupostolo Paulo uvua ne bintu bionso ebi. (Bienzedi 22:3; Filipoi 3:4, 5) Kadi, wakitaba ne budipuekeshi buonso ne: mamanya akamuvuija mukumbane bua kuenza mudimu eu avua mafumine kudi Yehowa Nzambi, ki nku bilongelu bibandile nansha. Mamanya aa adiku amu bua bantu bakese basunguluke anyi? Paulo wakafundila tshisumbu tshia mu Kolinto bua “dikumbana dietu.” Abi bidi bileja bimpe ne: Yehowa mmuenze bua basadidi bende bonso ba lulamatu bamanye mua kuenza mudimu udiye mubapeshe. Mmunyi mudi Yehowa uvuija bena Kristo balelela bakumbane lelu? Tumonayi bintu bisatu bidiye ukuata nabi mudimu: (1) Dîyi diende, (2) nyuma wende muimpe ne (3) bulongolodi buende bua pa buloba.
Dîyi dia Yehowa didi dituvuija bakumbane
5, 6. Mmunyi mudi Mifundu Minsantu yambuluisha bena Kristo balelela?
5 Tshia kumpala: mmunyi mudi Dîyi dia Nzambi dituvuija bena mudimu bakumbane? Paulo wakafunda ne: ‘Dîyi dionso dia mu Mukanda wa Nzambi didi difume munda mua Nzambi bu mupuya wende, ne didi ne mudimu muimpe wa kuyisha bantu, ne wa kubabela, ne wa kubadimuija, ne wa kubalongesha mu buakane bua Nzambi; bua muntu wa Nzambi ikale mukumbajibue, mulongolola tshishiki bua midimu yonso mimpe.’ (2 Timote 3:16, 17) Nenku Mifundu Minsantu idi ituvuija ‘bakumbane, balongolola tshishiki’ bua kuenza ‘mudimu muimpe’ wa kulongesha bantu Dîyi dia Nzambi. Kadi netuambe tshinyi bua bantu bonso badi mu bitendelelu bia Bukua-buena-Kristo? Ntshia bushuwa bua se: batu babala Bible. Kadi mmunyi mudi mukanda umue eu mua kuambuluisha anu bamue bantu bua kuluabu bakumbane kadi kauyi wambuluisha bakuabu? Diandamuna didi dilondeshila ku mushindu utudi tuangata Bible.
6 Bia dibungama, bantu ba bungi batu baya mu nzambi kabatu bitaba mukenji wa mu Bible ‘bu mudiwu bushuwa, dîyi dia Nzambi mene.’ (1 Tesalonike 2:13) Bukua-buena-Kristo mbukuatshishe ne bundu mu muanda eu. Kunyima kua balombodi ba bitendelelu bamane kuenza bidimu bia bungi mu tulasa tua malu a Nzambi, tudiku mua kuamba ne: mbalongolola tshishiki bua kuikala balongeshi ba dîyi dia Nzambi anyi? Kabiena nanku to. Bamue balongi ba mu seminere batu batuadija tulasa tuabu bikale bitaba malu a mu Bible, kadi padibu bajikija batu balua bedi ba malu adimu mpata. Nunku, pamutu pa kuyisha dîyi dia Nzambi didi ba bungi ba kudibu kabatshiyi bitaba, badi batangija mudimu wabu mu malu makuabu, bu mudi dilamata ku luseke kampanda mu makokangana a bena tshididi, dilongesha bantu tshidibu babikila ne: evanjeliyo wa nsombelu mulenga, anyi dilongesha nkindi ya panu mu mayisha abu. (2 Timote 4:3) Kadi bena Kristo balelela badi buobu balonda tshilejilu tshia Yezu Kristo.
7, 8. Ntshinyi tshidi tshileja ne: Yezu kavua wangata Dîyi dia Nzambi muvuabu badiangata kudi balombodi ba bitendelelu ba mu tshikondo tshiende?
7 Yezu kakalekela balombodi ba bitendelelu ba mu tshikondo tshiende bakonyangaja lungenyi luende to. Nansha pavuaye ulongesha bantu bakese bu mudi bapostolo bende anyi musumba wa bantu, Yezu uvua wenza mudimu bimpe ne Mifundu Minsantu. (Matayo 13:10-17; 15:1-11) Dilongesha ne Mifundu nunku diakamuvuija mushilangane ne balombodi ba bitendelelu ba mu tshikondo atshi. Balombodi abu bavua batekesha bantu mu maboko bikole bua kabakebi bua kumanya malu male a Nzambi nansha. Mu bikondo abi kuvua tshibidilu tshia mulongeshi wamba ne: imue mvese ya mu Bible ivua ne malu makole menemene. Ne ke bualu kayi uvua uyikonkonona anu ne mulongi wende uvuaye musue bikole; ne nansha pavuaye uyukila ne mulongi eu, uvua wakula anu ne dîyi dipuekesha, mubuikile ku mutu. Balombodi ba bitendelelu abu bavua batshina bua kuakula bua imue mvese ya mu Bible anu muvuabu batshina bua kutela dîna dia Nzambi!
8 Kristo kavua yeye nanku to. Buende yeye, bantu bonso bavua ne bua kubala ‘mêyi onso adi alopoka mukana mua Nzambi,’ kadi ki ng’anu bantu bakese basunguluke nansha. Yezu kavua ne tshipatshila tshia kufila diakalenga dia kumvuija malu a mu Mifundu anu kudi kasumbu kakese ka bamanyi ba malu a mu Bible to. Wakambila bayidi bende ne: ‘Nuambe mu munya malu andi nnuambila mu mîdima; nuambe pa mitu pa nzubu malu anudi numvua mu matshi.’ (Matayo 4:4; 10:27) Yezu uvua ne dijinga dikole dia kupetesha bantu ba bungi menemene dimanya dia malu a Nzambi.
9. Mmushindu kayi udi bena Kristo balelela benza mudimu ne Bible?
9 Dîyi dia Nzambi ke ditudi ne bua kutuma kumpala patudi tulongesha. Tshilejilu, patudi tuenza muyuki mu Nzubu wa Bukalenge wa Bantemu ba Yehowa, pa tshibidilu kubala patupu mvese ya mu Bible itudi basungule ki nkukumbane to. Tudi ne bua kuyumvuija, kuyifidila bilejilu ne kuleja mua kuyitumikila mu nsombelu kampanda. Tshipatshila tshietu ntshia kuangata mukenji wa mu Bible udi mufunda mu mabeji kuubueja mu mitshima ya badi batuteleja. (Nehemiya 8:8, 12) Tudi kabidi ne bua kuenza mudimu ne Bible padibi bikengela kupesha muntu mibelu peshi kumupesha dinyoka bua kumululamija. Nansha mudi bantu ba Yehowa bakula miakulu mishilangane ne bafumine miaba kabukabu, buonso buabu badi banemeka Bible, Mukanda udi mupite yonso.
10. Mukenji wa mu Bible mufundisha ku nyuma wa Nzambi udi ne bukole kayi kutudi?
10 Patudi tuenza nawu mudimu ne kanemu mushindu’eu, mukenji wa mu Bible udi ne bukole. (Ebelu 4:12) Udi usaka bantu bua kushintulula nsombelu wabu, balekela bilele bidi Bible ubenga bu mudi: buendenda, ditendelela mpingu, dikuatshika maluvu ne buivi. Mukenji eu mmuambuluishe bantu ba bungi bua kuvula bumuntu bukulukulu ne kuvuala bupiabupia. (Efeso 4:20-24) Bushuwa, tuetu tunemeka Bible kupita ngenyi anyi bilele bionso bia bantu, ne tuetu tuenza nende mudimu ne lulamatu, udi mua kutuvuija bakumbane, balongolola tshishiki bua kuikala balongeshi ba Dîyi dia Nzambi.
Nyuma wa Yehowa udi utuvuija bakumbane
11. Bua tshinyi mbiakanyine muakabikila Yezu nyuma muimpe ne: “musambi”?
11 Tshibidi, tumonayi mudi nyuma muimpe wa Yehowa (peshi bukole buende buenzeji) muikale utulongolola tshishiki. Katuena ne bua kupua muoyo bua se: nyuma wa Yehowa ke bukole budi bupite makole onso. Yehowa mmupeshe Muanende musuibue bukokeshi bua kukuata mudimu ne bukole ebu budi bukemesha bua diakalenga dia bena Kristo balelela bonso. Bivua biakanyine muakabikila Yezu nyuma muimpe ne: “Musambi [ta muambuluishi].” (Yone 16:7) Wakambila bayidi bende bua balombe Yehowa nyuma eu, kubajadikilaye ne: Yehowa uvua mua kubapeshaye ne kalolo konso.—Luka 11:10-13; Yakobo 1:17.
12, 13. (a) Bua tshinyi bidi ne mushinga bua tuetu kulomba nyuma muimpe bua atuambuluishe mu mudimu wetu wa buambi? (b) Mmunyi muakaleja Bafalese ne: nyuma muimpe kavua wenza mudimu munda muabu to?
12 Dituku dionso tudi ne bua kulomba Nzambi nyuma muimpe, nangananga bua kutuambuluishaye mu mudimu wetu wa buambi. Ntshinyi tshidi bukole ebu mua kutuenzela? Budi mua kushintulula lungenyi luetu ne mutshima wetu, butuambuluisha bua kudilengeja, bua kukola mu nyuma, ne bua kumbusha bumuntu bukulukulu kupingaja bupiabupia. (Kolosai 3:9, 10) Budi mua kutuambuluisha bua kupeta ngikadilu milenga idi mifuane ya Kristo. Ba bungi ba kutudi badi mua kutela mêyi a mu Galatia 5:22, 23 ku muoyo. Mvese eyi idi ileja mamuma a nyuma wa Nzambi. Dia kumpala ndinanga. Ngikadilu eu udi ne mushinga wa bungi mu mudimu wetu wa buambi. Bua tshinyi?
13 Dinanga didi ne bukole bua bungi bua kutusaka ku dienza bualu kampanda. Dinanga Yehowa ne muntu nabu didi disaka bena Kristo balelela bua kumanyisha bantu lumu luimpe. (Mâko 12:28-31) Tuetu katuyi ne dinanga edi, katuena mua kukumbana bua kuikala balongeshi ba Dîyi dia Nzambi to. Tangila dishilangana divua pankatshi pa Yezu ne Bafalese. Matayo 9:36 udi wamba bua Yezu ne: ‘Pakatangilaye bisumbu bia bantu, wakadi nabu luse, bualu bua buobu bakadi batata, bakadi bamuangalake bu mikoko idi kayiyi ne mulami.’ Mmunyi muvua Bafalese bangata bantu ba tshianana? Bakamba ne: ‘Bantu ba tshisumbu etshi badi kabayi bamanye mikenji ya Nzambi badi bedibue mulawu.’ (Yone 7:49) Bafalese abu kabavua banange bantu nansha kakese to, kadi bavua babapepeja bikole bia dikema. Biakamueneka patoke ne: nyuma wa Yehowa kavua wenza mudimu munda muabu to.
14. Tshilejilu tshia Yezu tshia kuleja dinanga mu mudimu wende tshidi ne bua kutusaka ku dienza tshinyi?
14 Yezu uvua umvuila bantu luse. Uvua mumanye ntatu ivuabu nayi. Uvua mumanye ne: bavua babakengesha, babatatshisha ne bavua babalekele bu mikoko kayiyi ne mulami. Yone 2:25 udi utuambila ne: Yezu “wakadi mumanye malu a munda mua bantu.” Bu muvuaye muikale Muenji wa Mudimu wa dilambu wa Yehowa pavuaye ufuka, Yezu uvua mumanye bimpe menemene ngikadilu wa bantu. (Nsumuinu 8:30, 31) Dimanya adi diakakolesha dinanga diende. Tuetu petu tuenze bua dinanga dia mushindu’eu dikale ditusaka bua kuenza mudimu wetu wa diyisha! Bituikala tumona ne: bidi bitukengela tuetu kudilengeja mu muanda eu, tulombayi Yehowa nyuma muimpe ne pashishe tuenze malu adi umvuangana ne masambila etu. Yehowa neatuteleje. Neatutumine bukole ebu bukena kukandamena bua kutuambuluisha bua tutambe kufuana Kristo, uvua mukumbane bimpe menemene bua kuyisha lumu luimpe.
15. Mmunyi muvua mêyi a mu Yeshaya 61:1-3 akumbanyina Yezu ne eku ela bafundi ne Bafalese patoke?
15 Ntshinyi tshiakavuija Yezu mukumbane bua kuenza mudimu eu? Wakamba ne: ‘Nyuma wa Nzambi udi pambidi panyi.’ (Luka 4:17-21) Bushuwa, Yehowa nkayende ke wakateka Yezu bua kuenza mudimu eu ku diambuluisha dia nyuma muimpe. Yezu kavua mua kujinga bua bamuteke kabidi kudi bantu nansha. Nyuma muimpe uvuaku muteke balombodi ba bitendelelu ba mu tshikondo tshia Yezu anyi? Tòo. Kabavua mene balongolola bua kukumbaja mêyi a mu Yeshaya 61:1-3, akabala Yezu ne dîyi dikole ne kulejaye muvuawu amukumbanyina yeye. Suaku ubale mvese eyi bua udimuene nkayebe ne: bena lubombo abu (bafundi ne Bafalese) kabavua bakumbanyine mêyi aa to. Kabavua ne lumu luimpe lua kuambila bapele. Ne mmunyi muvuabu mua kumanyisha bena lukanu dipatuka diabu ne bampofo ditabala dia mêsu abu? Buobu bine bavua bampofo mu nyuma ne bakuatshike ku bupika bua bilele bia bantu! Tuetu katufuanyi Bafalese aba to, kadi tuikalayi bakumbane bua kuyisha bakuabu.
16. Ndishindika kayi didi bantu ba Yehowa mua kuikala nadi lelu pa bidi bitangila dikumbana diabu bua kuikala bena mudimu?
16 Bushuwa, katuena balonge mu bilongelu binene bia Bukua-buena-Kristo to. Ki mbatuteke balongeshi bualu tudi balonge mu seminere wa teoloji to. Bu mudibi nanku, katuena bakumbane mua kuyisha anyi? Tòo, tudi bakumbane! Udi mututeke bua kuikala Bantemu n’Yehowa Nzambi. (Yeshaya 43:10-12) Patudi tumulomba nyuma wende ne tuenza malu mumvuangane ne masambila etu, tudi tulua bakumbane bimpe menemene. Bulelela, katuena bapuangane to, ne tudi tupangila bua kulonda bimpe menemene tshilejilu tshia Yezu Mulongeshi Munene. Nansha nanku, katuenaku ne dianyisha bua mudi Yehowa wenza mudimu ne nyuma wende bua kutuvuija bakumbane ne kutulongolola bua kuikala balongeshi ba Dîyi diende anyi?
Bulongolodi bua Yehowa budi butuvuija bakumbane
17-19. Mmunyi mudi bisangilu bitanu bia ku lumingu bitulongoluela kudi bulongolodi bua Yehowa bituvuija bakumbane bua kuyisha?
17 Mpindieu tumonayi tshintu tshisatu tshidi Yehowa utulongolola natshi bua tuetu kuikala balongeshi ba Dîyi diende: tshisumbu tshiende anyi bulongolodi buende bua pa buloba, budi butulongesha mua kuyisha. Mmushindu kayi? Anji kuelabi meji bua malu atutu tulonga! Ku lumingu luonso tutu ne bisangilu bitanu. (Ebelu 10:24, 25) Tutu tudisangisha mu tusumbu tukese mu Dilonga dia Mukanda dia Tshisumbu bua kulonga malu male a mu Bible ku diambuluisha dia mukanda kampanda udi bulongolodi bua Yehowa butupeshe. Patudi tuteleja ne tufila mandamuna, tudi tulongela kudi bakuabu ne tukankamijangana nabu. Kudi kabidi malu adi mutangidi wa dilonga dia mukanda utuleja ne utuambuluisha nawu pa nkayetu. Mu Tshisangilu tshia Patoke ne mu Dilonga dia Tshibumba tshia Nsentedi, tutu tupeta biakudia bikuabu bilenga bia mu nyuma.
18 Kalasa ka Mudimu wa Teokrasi nkalongolola bua kutulongesha mushindu wa kuyisha. Patudi tulongolola midimu idibu batupeshamu, tudi tumanya mua kulongesha Dîyi dia Nzambi pa biena-bualu bishilashilangane. (1 Petelo 3:15) Kabatuku banji kukupesha muyuki muikale ne tshiena-bualu tshiuvua umona bu malu autu mumanye pa tshibidilu, kadi panyima wewe kumona ne: muvua bualu bupiabupia buuvua kuyi mumanye anyi? Ebu mbualu butu bufikila ba bungi. Kakuena tshintu tshidi tshikolesha dimanya dietu dia tshiena-bualu kampanda kupita ditshilongesha bakuabu. Nansha padibu kabayi batupeshe muyuki wa kuenza mu tshisangilu, tudi anu mua kulonga mua kuikala balongeshi bimpe. Tuetu tulondesha mulongi yonso netumone ne: udi ne ngikadilu milenga, ne tudi mua kuela meji mushindu utudi mua kuidikija ngikadilu ayi.
19 Tshisangilu tshia Mudimu patshi ntshienza bua kutulongolola bua tuikale balongeshi ba Dîyi dia Nzambi. Lumingu luonso tutu tuteleja miyuki milenga ne biena-bualu bia diela bateleji nkonko ne manaya a tshilejilu bilongolola bua mudimu wetu wa buambi. Ntshiena-bualu kayi tshituikala mua kuangata bua kuyikila ne bantu? Ntshinyi tshitudi mua kuenza patudi tupeta ntatu ya pa buayi mu mudimu wetu wa diyisha bantu? Mmishindu kayi ya diyisha mikuabu itudi mua kutamba kuteta? Ntshinyi tshiatuambuluisha bua kulongesha bimpe menemene patudi tupinganyina bantu ne patudi tulonga nabu Bible? (1 Kolinto 9:19-22) Malu aa batu baakonkonona bimpe menemene mu Tshisangilu tshia Mudimu. Miyuki ya bungi ya mu tshisangilu etshi itu miangatshila mu biena-bualu bia mu dibeji dia Mudimu wetu wa Bukalenge, tshia-mudimu tshikuabu tshidibu batupeshe bua kutulongolola bua kuenza mudimu wetu wa mushinga mukole.
20. Ntshinyi tshitudi mua kuenza bua bisangilu ne mpuilu kutuambuluishabi bikole?
20 Patudi tulongolola bisangilu bietu ne tubuelamu, ne pashishe tuenza mudimu ne malu atudi balonge mu mudimu wetu wa dilongesha bantu, tudi tumanya kabidi malu a bungi. Kadi ki nkujike to. Tutu kabidi ne bisangilu binene bu mudi mpuilu ne mpungilu idi mienza bua kutulongolola bua tuetu kuikala balongeshi ba Dîyi dia Nzambi. Ne tutu tuindila ne muoyo kulu kulu bua kuteleja mibelu eyi ne ntema yonso ne pashishe kuyitumikila.—Luka 8:18.
21. Mbijadiki kayi bitudi nabi bidi bileja se: malu atudi balonge mmatuambuluishe, ne nnganyi utudi mua kutumbisha bua bualu ebu?
21 Malu adi Yehowa mutulongeshe mmatuambuluishe anyi? Tumonayi tshidi malu nkayawu aleja. Tshidimu tshionso tudi tuambuluisha bantu binunu nkama ne nkama bua kulonga malu manene a mu Bible ne bua kutumikila bidi Nzambi ubalomba. Bungi buetu budi buenda buvulangana, kakuena muntu nansha umue wa kutudi udi mua kudikuma tshianza mu tshiadi bua bualu ebu to. Tudi ne bua kumona malu anu muvua Yezu uamona. Wakamba ne: ‘Kakuena muntu udi mumanye mua kudivuila kundi, bikala Tatu udi muntume kayi mumukoke.’ Anu bu bapostolo ba Yezu, ba bungi ba kutudi ki mbamanye mukanda ne ki mbantu ba pa buabu to. (Yone 6:44; Bienzedi 4:13) Yehowa ke udi ututshisha mudimu wetu diakalengele, yeye ke udi ukoka bantu badi basue malu mimpe bua balue ku bulelela. Paulo wakumvuija bualu ebu bimpe pakambaye ne: ‘Meme ngakakuna bintu, Apolo wakabimiamina mâyi, kadi Nzambi wakabidiundisha.’—1 Kolinto 3:6.
22. Bua tshinyi katuena ne bua kuteketa mu maboko bipitshidile pa bidi bitangila dienza mudimu wa bena Kristo tshishiki?
22 Bushuwa, Yehowa Nzambi udi wambuluisha bikole mu mudimu wetu wa dilongesha bantu Dîyi diende. Pamu’apa tudi mua kuikala tudimona katuyi bakumbane bua kuikala balongeshi. Kadi vuluka ne: Yehowa ke udi ukoka bantu bua baye kudiye ne kudi Muanende. Yehowa ke udi utuvuija bakumbane bua kuyisha bapiabapia aba ku diambuluisha dia Dîyi diende, nyuma wende muimpe ne bulongolodi buende bua pa buloba. Tutumikilayi malu mimpe adi Yehowa utulongesha mpindieu bua kutulongolola tshishiki bua kuikala balongeshi ba Dîyi dia Nzambi!
Newandamune munyi?
• Mmunyi mudi Bible utulongolola bua kuenza mudimu wa diyisha?
• Mmushindu kayi udi nyuma muimpe utuvuija bena mudimu bakumbane?
• Mmu malu kayi mudi bulongolodi bua Yehowa bukuambuluishe bua kulua muyishi wa lumu luimpe mukumbane?
• Bua tshinyi tudi ne bua kuikala ne dishindika patudi tuyisha?
[Tshimfuanyi mu dibeji 25]
Bu muvuaye mulongeshi wa Dîyi dia Nzambi, Yezu wakaleja ne: uvua munange bantu