Dishintuluka mu dipatuka dia Tshibumba tshia Nsentedi

¹ Ku ntuadijilu kua tshidimu etshi, bisumbu bionso biakapeta dimanyisha dia ne: Kubangila mu ngondo wa kumpala wa 2008, nebatuadije kupatula Tshibumba tshia Nsentedi mishindu ibidi: tshia bantu bonso ne tshia Bantemu. Pamuapa nudi nudiebeja ne: ‘Nimero ibidi eyi neikale mishilangane ku tshinyi? Kupatula tshibejibeji etshi mu mishindu ibidi mishilangane nkuimpe ku tshinyi? Nemuikale malu mapiamapia anyi?’

² Dishilangana: Nimero wa dituku dia kumpala dia ngondo netuikale tumubikila ne: wa bantu bonso. Biena-bualu bia mu nimero eu nebikale bienza bua bantu badi kabayi Bantemu. Nimero wa dia matuku 15 netuikale tumubikila ne: wa kulonga ne katuakuikala tumupesha bantu mu buambi to. Neikale ne biena-bualu bia dilonga bua ngondo mujima pamue ne bikuabu bidi bikumbanyine anu Bantemu. Nimero wa bantu bonso neatuambuluishe tuetu bine kadi neatambe kusankisha bantu badi kabayi Bantemu badi banemeka Mukanda wa Nzambi. Kadi Réveillez-vous! yeye, udi anu bua bantu bonso, too ne badi kabayi mu tshitendelelu kampanda anyi badi kabayi basue kuikala bena Kristo.

³ Buimpe bua mushindu mupiamupia eu: Mu nimero wa kulonga, kabiakuikala kabidi ne mushinga bua kumvuija miaku bu mudi “mpanda-njila” bua bantu badi kabayi Bantemu kuumvuabu to. Nimero eu neikale kabidi ne malu a mushinga adi atangila anu Bantemu ba Yehowa ne balongi ba Mukanda wa Nzambi badi benda baya kumpala. Kadi netuambe tshinyi bua nimero wa bantu bonso? Bu muikala biena-bualu bidimu bifunda bua bantu bonso, muntu udi kayi Ntemu udi mua kuikala ne disanka dia kumubala kutuadijila anu mu dibeji dia kumpala too ne dia ndekelu. Kadi nebikale bimpe bua Bantemu ba Yehowa bikale babala nimero yonso ibidi eyi. Bu mutuikala tufila anu nimero umue wa Tshibumba tshia Nsentedi ne umue wa Réveillez-vous! mu ngondo mujima, netuikale ne ngondo mujima bua kulongolola mishindu mimpe ya mua kubifila mu buambi.

⁴ Malu mapiamapia: Mbalongolole amue malu mapiamapia bua Tshibumba tshia Nsentedi tshia bantu bonso. Nekuikale biena-bualu bidi biakula bua malongesha manene a mu Mukanda wa Nzambi mu mushindu mupepele menemene. Bikuabu nebikale bileja mudi Mukanda wa Nzambi mua kuambuluisha bena mêku. Binga nebileje kabidi bansonga mishindu mimpe ya kulonga Mukanda wa Nzambi. Mu nimero yonso nemuikale tshiena-bualu tshidi ne mvese idi itulongesha ngikadilu ya Yehowa.

⁵ Tudi tulomba Yehowa bua abeneshe dishintuluka mu dipatuka dia Tshibumba tshia Nsentedi edi. Tshibejibeji etshi pamue ne tshia Réveillez-vous! bituambuluishe bua kuyisha bantu ba bungi badi banange bulelela lumu luimpe.​—Mat. 10:11.