Ndaku anu kumpala!

PAWAKATUADIJA kulonga mua kutumikila mikenji ya mu Bible, ngenyi ne ngakuilu ne bikadilu biebe bikavua bikubuele ne mu mashi biakabanga kushintuluka ku kakese ku kakese. Bia bungi bikavua bishintuluke mene kumpala kua wewe kudifundisha mu Kalasa ka Mudimu wa Nzambi. Bumue mpindieu ukadi mushintuluke mufike too ne ku dilambula Yehowa muoyo webe. Mbuena kuamba ne: wimanyine anu apu anyi? Tòo, batismo ntuadijilu tshianana.

Timote ukavua mukulu pakamuambila Paulo bua kuelangana meji bua mibelu ivuabu bamupesha ne majitu a mu tshisumbu avuaye nawu​—bua ‘kudifilaku ne muoyi umue’—​bua ‘bantu bamone muvuaye uya kumpala.’ (1 Tim. 4:12-15, MMV) Nansha wewe muntu mupiamupia anyi muntu wa kale mu bulelela, bidi anu bimpe bua kudiunda kuya kumpala.

Dimanya ne dishintuluka

Bilondeshile Efeso 3:14-19, mupostolo Paulo uvua usambila bua ne: bena kuitabuja nende bapete bukole bua ‘kujingulula [bimpe menemene] bule ne butshiama, butumbuke ne bondoke’ bua bulelela. (MMV) Ke bualu kayi Yezu wakafila mapa mu bantu bua kulongesha, kulongolola ne kukolesha tshisumbu. Kuikala ne tshibidilu tshia kuela meji bua Dîyi dia Nzambi, kusangisha ne mibelu ya balongeshi bapiluke, kudi mua kutuambuluisha bua ‘kudiunda’ mu malu a Nzambi.​—Ef. 4:11-15.

Kudiunda eku kudi kulomba ‘kuvuijibua bapiabapia mu nyuma wa meji etu.’ Bidi bikengela kupeta lungenyi ludi lumvuangana ne lua Nzambi ne Kristo. Bua ‘kuvuala muntu mupiamupia,’ bidi bikengela tuetu kuikala ne lungenyi alu pa buipi dîba dionso. (Ef. 4:23, 24) Pautu ubala malu a Yezu adi mu Bible, utu uamona bu tshilejilu tshia kulonda anyi? Utuku ukeba imue ngikadilu ya Yezu ne ukeba mushindu uudi mua kuikala pebe nayi anyi?​—1 Pet. 2:21.

Malu audi wakula ne bakuabu adi mua kuleja biwikala wenda uya kumpala. Tshilejilu, aba badi bavuale bumuntu bupiabupia kabena mua kuakula malu mabi, a dishima, a busenji, anyi adi atekeshangana mu mikolo to. Badi bakula malu adi ‘malenga, adi akoleshangana ku muoyi, adi alengelela badi babateleja.’ (Ef. 4:25, 26, 29, 31, MMV; 5:3, 4; Yuda 16) Malu adi apatuka mukana muabu kumbelu ne mu bisangilu adi mua kuleja ne: bulelela mbushintulule nsombelu wabu.

Kukola kudi kabidi kumueneka padi muntu kabayi kabidi mua ‘kumutuma eku ne eku, bamukoka kudi mpepele nansha ya dilongesha kayi.’ (Ef. 4:14, MMM) Tshilejilu, padi bantu bapatula ngenyi ne malu ne manaya mapiamapia utu wenza tshinyi? Utu wangata dîba dia kuenza malu a Nzambi bua kulonda malu aa anyi? Kuenza nunku kudi kukupangisha bua kukola mu nyuma. Udi umona mpindieu bua tshinyi bidi bikengela kudisumbila dîba bua malu a Nzambi anyi?​—Ef. 5:15, 16.

Mushindu uudi ne bakuabu udi pawu uleja ni udi ukola. Ukadi mulonge mua ‘kulejangana luse ne kulengululangana bilema’ ne bena Kristo nebe anyi?​—Ef. 4:32.

Dikola diebe didi ne tshia kumueneka mu tshisumbu ne ku nzubu. Dimueneke kabidi mu tulasa, ku mudimu ne miaba mikuabu. (Ef. 5:21–6:9) Wewe menemene ne ngikadilu ya buena-Nzambi miaba yonso, nebimueneke se: udi wenda uya kumpala.

Kuata mudimu ne tshipedi tshiudi natshi

Yehowa mmupeshe muntu yonso lungenyi, kumupesha kabidi ne bipedi. Mmusue ne: tukuatshile nabi bana betu mudimu bua yeye kubaleja bulenga budi kabuyi butuakanyine. Ke bua bualu kayi Petelo wakafunda ne: “Nusadilangane bilondeshile tshipedi tshidi yonso wa kunudi mupete, bu mudibo benza kudi balami balenga ba bipedi [anyi ba bulenga bua Nzambi butudi katuyi bakanyine].” (1 Pet. 4:10, MMM) Utu ulama bipedi ebi munyi?

Petelo udi kabidi wamba ne: ‘Biakula muntu, akule mêyi bu mudiwu mamba kudi Nzambi.’ (1 Pet. 4:11) Mvese eu udi ulomba muntu bua kuakula malu mikale umvuangana menemene ne Dîyi dia Nzambi, bua Nzambi atumbishibue. Mushindu udi muntu wakula malu au udi pawu ne bua kutumbisha Nzambi. Kalasa ka Mudimu wa Nzambi kadi mua kukuambuluisha bua kukuata mudimu bimpe ne tshipedi tshiebe bua kutumbisha Nzambi paudi wambuluisha bakuabu. Udiele lukonko elu muikale ne tshipatshila etshi mu mutu: Ndi mua kumanya ne: kalasa kadi kangambuluisha munyi?

Pamutu pa wewe kusua kumanya bungi bua ngikadilu ya bungamba-malu iukadi muenze anyi midimu iukadi muenze, keba bua kumanya mudi kalasa aka kakuambuluishe mu buambi. Mudimu wa kalasa ng’wa kutuambuluisha bua kuyisha bimpe. Nanku udiebeje ne: ‘Ntuku ndongolola malu a kuamba mu buambi anyi? Ndi mulonge mua kutabalela bantu bandi nyisha anyi? Ntu nkeba mushindu wa kushiya tshintu bu mudi lukonko bua musangu udi ulonda anyi? Pantu ndonga ne muntu, ntu nditatshisha bua malu amufike too ku mutshima anyi?’

Kukola kakuena kumvuija dipeta dia midimu idibu batupeshe to, kadi mushindu utudi tukuata nayi mudimu ke udi uleja ni tudi tukola. Buobu bakupeshe mudimu udi ukengela kulongesha, udi mua kudiebeja ne: ‘Ndi bulelela mukuate mudimu eu mukuatshilamu ne tshipedi tshia kulongesha anyi? Malu mmafike ku dishintulula bulelela nsombelu wa bavua banteleje anyi?’

Kukuata mudimu ne tshipedi tshiebe kudi kukulomba bua kuikala wa kumpala bua kuenza malu. Utuku ulomba bakuebe bua kuyabu nebe mu buambi anyi? Utuku ukeba mushindu wa kuambuluisha bana ne bantu bapiabapia ne balema ba mu tshisumbu tshienu anyi? Utuku ukomba mu Nzubu wa Bukalenge, wenza midimu ku budisuile mu mpuilu ne mpungilu anyi? Utuku ne tshibidilu tshia kuenza mudimu wa bumpanda-njila buambuluishi anyi? Udiku mua kulua mpanda-njila wa pa tshibidilu peshi kuambuluisha tshisumbu tshidi dijinga ne bamanyishi anyi? Biwikale muntu mulume, udiku uditatshisha bua kukumbaja ngikadilu idi Bible ulomba muntu bua kulua musadidi wa mudimu peshi mukulu anyi? Wewe ne muoyo wa kudifila ne wa kuitaba majitu, udi uleja ne: udi wenda ukola.​—Mus. 110:3.

Mushinga wa dimanya malu

Kuteketshi mu mikolo biwamona ne: utshidi muana mu Buena-Kristo to; bualu Dîyi dia Nzambi didi mua ‘kukebela muena lungenyi lutekete meji.’ (Mus. 19:7, MMV [19:8]; 119:130; Nsu. 1:1-4) Wewe ulonda mibelu ya mu Bible, neupete meji mapuangane a Yehowa, adi mapite kule ne kule lungenyi lutudi mua kudipetela nkayetu. Patudi tuenda tukola mu mudimu wa Yehowa, tudi tumanya malu a mushinga wa bungi be! Kadi udi mua kukuata mudimu bimpe ne dimanya edi bishi?

Bu mututu tupetangana ne malu mavule, muntu udi mua kufika ku diela meji ne: ‘Nkadi mupetangane ne bualu ebu. Ndi mumanye tshiakuenza.’ Meji aa mmimpe anyi? Nsumuinu 3:7 udi ukubela ne: “Lekela kuditangila bu muena meji.” (MMV) Dimanya malu didi ne bua kutulongesha bimpe mua kujikija ntatu. Kadi bituikala tuenda tukola mu malu a Nzambi, dimanya edi neditufikishe ku dituisha mutshima ne lungenyi luetu ne: bua malu kuya kumpala, anu Yehowa yeye muelamu tshianza. Nanku, diya dietu kumpala didi diumvuija: kukeba Yehowa ne lukasa bua kutuludikaye pamutu pa kukeba kudijikijila malu. Dikola edi didi ditufikisha ku dijadika ne: kakuena tshintu tshidi mua kutufikila Yehowa kayi mutshilekele to. Didi kabidi ditufikisha ku dimueyemena ne ku didia nende bulunda bukole.

Ndaku mutangile anu kumpala!

Nansha muvua mupostolo Paulo muntu mukole mu malu a Nzambi ne kabidi muela manyi, wakamba ne: utshivua dijinga ne ‘kuobokela bivua kumpala kuende’ bua kupeta muoyo. (Filip. 3:13-16, MMV) Udi witaba tshidiye wamba etshi anyi?

Ukadi mufike too ne penyi mu dikola diebe? Bidi bileja ne: muntu eu mmukole padiye muvuale bumuntu bupiabupia muvuadilamu, padiye ukokela bumfumu bua Yehowa ne muoyo mujima, ne padiye ukuata mudimu ne bipedi biende ne tshisumi tshionso bua kutumbisha Yehowa. Kalasa ka Mudimu wa Nzambi kuoku kakuambuluishe, ngikadilu idi Dîyi dia Nzambi ditulomba neyibangishe kudimuenekela kakese kakese mu ngakuilu ne mu ndongeshilu webe. Kupu malu aa muoyo to. Ikala umvua disanka dia kuenza, neukole mu nyuma.