Ambuluishe bapele bapete ditekemena
1 Yezu uvua utamba kutabalela bakengi bikole. Kudi misangu yakadishaye bantu mu tshishima, kuondopa bavua basama; kadi mudimu wende munene uvua wa kuyisha bapele “lumu luimpe.” (Mat. 11:5) Lelu eu mudimu wa buambi wa bena Kristo udi wambuluisha bapele ne bantu bakuabu.—Mat. 24:14; 28:19, 20.
2 Ditekemena dilelela: Bamfumu ba bitendelelu bia dishima batu bambila bapele ne: bobu bele bidibu nabi mu ekeleziya, nebalue babanji. Kadi Mukanda wa Nzambi udi wamba ne: Anu Bukalenge bua Nzambi ke buajikija bupele ne ntatu yonso idi nayi bantu. (Mus. 9:18; 145:16; Yesh. 65:21-23) Patudi tuleja bapele tshidi Bible ulongesha bulelela, tudi tubapesha ditekemena ne tukumbaja dijinga diabu dia kumanya Nzambi ne kumutendelela.—Mat. 5:3.
3 Bafalese ba mu matuku a Yezu kabavua bangata bapele ne mushinga to, bavua bababikila ne kapeja konso ne: ‘am-ha·’aʹrets, anyi “bantu ba mu ditunga.” Kadi Yezu uvua yeye umona ‘mashi abu’ anyi mioyo yabu bu “tshintu tshia mushinga mukole.” (Mus. 72:13, 14) Tudi mua kuidikija Yezu ne ‘kuleja luse’ kudi bapele pa kubenzela malu ne bulenga ne kuditeka pa muaba wabu. (Nsu. 14:31) Katuena ne bua kuamba mêyi adi apepeja bena mutumba netu badi bapele anyi kubenga bua kuya kubayisha to. Bantu ba bungi badi bitabe lumu luimpe lua Bukalenge mbapele.
4 Ambuluisha bapele lelu: Patudi tulongesha bapele badi mu teritware wetu malongesha a mu Bible, tudi kabidi tubambuluisha bua kukepeshabu ntatu ya bupele buabu kutuadijila anu ku mpindieu. Tshilejilu, Bible udi ukandika dikuatshika dia maluvu, manaya a mfranga, bufuba, dinua dia makanya ne makuabu malu atu ashiya bantu bianza bitupu. (Nsu. 6:10, 11; 23:21; 2 Kol. 7:1; Ef. 5:5) Bible udi utulomba bua kuenza malu malulame ne kuenza mudimu ne “mitshima yetu” mijima bualu ke ngikadilu idi bena mudimu ne bua kuikala nayi. (Kolos. 3:22, 23; Eb. 13:18) Tshilejilu, bamfumu ba mudimu ba bungi badibu bebeje badi bamba ne: batu basue kuangata ku mudimu muntu udi wenza malu malulame ne muikale ne lulamatu.
5 Yehowa utu umvua bimutonda padi bapele bakenga. Mu katupa kîpi emu, Yezu Kristo neapandishe “mukengedi wa bintu padilaye kudiye.” (Mus. 72:12) Kadi bua mpindieu, tudi ne mudimu wa kukankamija bakuabu ne bapele kabidi ne mukenji wa mu Bible udi ufila ditekemena.