Ukadi muuje anyi?

Muuje tshinyi? Karte ka Instructions médicales (DPA) kadi Bantemu bonso ne bua kuuja. Bu mutudi ‘katuyi bamanye malu ikaleku makelela,’ mbimpe tuetu kusungula kumpala kua dîba mushindu utudi basue bua batondope dîba ditudi ne disama dikole didi dilomba bua batuele mashi. (Yak. 4:14; Bien. 15:28, 29) Bua kutuambuluisha, mbapatule bande wa video wa Soigner sans transfuser​—Besoins et droits du patient. Tutangile bande eu ne tuele meji ku malu atudi balonge ku diambuluisha dia nkonko idi kuinshi eku.​—Dimanyisha: Bu mudi bande eu muikale ne imue miaba idibu baleja mudibu bapanda bantu, baledi badi ne bua kuikala ne budimu padibu bamutangila ne bana babu batekete.

(1) Bua tshinyi bamue baminganga kabatshitu bela bantu mashi? (2) Fila bilejilu bisatu bia bantu bavuabu bapande disama dikole kadi kabayi babele mashi to. (3) Kudi baminganga bungi kayi pa buloba bujima badi bitabe bua kupanda bantu kabayi babela mashi? Bua tshinyi mbitabe bua kuenza nanku? (4) Ntshinyi tshidi malu adibu bakonkonone mu imue mpitadi matuku aa maleje pa tshilumbu tshia dielangana dia mashi? (5) Njiwu kayi idi mua kumueneka padibu bela bantu mashi? (6) Ntshinyi tshidi bamue baminganga banene bafike ku diamba bua bulenga bua diondopa bantu kabayi babela mashi? (7) Ntshinyi tshitu tshikepesha mashi mu mubidi? Ndîba kayi didi njiwu kayiyiku nansha mashi makepele? Bidi bikengela kuenza tshinyi bua kuambuluisha mubedi udi ne mashi makepele? (8) Mmushindu kayi udibu mua kuvudija globile mikunze mu mubidi wa mubedi? (9) Mmalu kayi adibu mua kuenza bua mashi kaapatuki a bungi padibu bapanda muntu? (10) Ngondapilu ya kubenga kuela mashi idi mua kukumbanyina bana bakese anyi bantu badi ne njiwu ya lufu anyi? (11) Ntshimue tshia ku bikadilu binene kayi bimpe tshidi munganga ne bua kuikala natshi? (12) Bua tshinyi mbimpe bena Kristo kudianjilabu kusungula mushindu udibu basue bua babondope kabayi babela mashi? Ntshinyi tshidibu mua kuenza?

Kuitaba imue ya ku mishindu idibu baleja mu bande eu ndipangadika didi muntu ne muntu ne bua kudiangatshila bilondeshile kondo kende ka muoyo kalongesha kudi Bible. Ukadi musungule mushindu uudi musue bua bakondope wewe ne bana bebe anyi? Bua malu makuabu adi atangila tshilumbu etshi, bala “Nkonko ya babadi” mu Tshibumba tshia Nsentedi tshia dia 15 Kabalashipu 2004, ne tshia dia 15 Kasuamansense 2000. Udi kabidi mua kubala tshisakidila tshia Mudimu wetu wa Bukalenge wa Kasuabanga 2006 tshidi tshiamba ne: “Tshingenza ntshinyi pikalabu bakeba kungela tuntu tukese tua mu mashi anyi bakeba kungondopa ne ngondapilu idi ilomba mashi anyi meme muine?” Umvuija bantu baudi musungule bua bababikile dîba diudi usama bikole ne bena dîku diebe badi kabayi Bantemu tshiudi muangatshile dipangadika edi.