Tshijadiki tshia ditabuja dikole
1. Mmalu makole kayi avua Yezu mumanyishe?
1 Bapostolo bavua bateleje Yezu bimpe pavuaye ubambila malu avua ne bua kuleja ne: ukadi mu Bukalenge, ne tukadi ku nshikidilu kua tshikondo etshi. Wakabambila muvua malu makole ne bua kukuata bantu. Bu mudi: mvita, nzala, dikanka dia buloba ne masama. Wakabambila kabidi ne: bavua ne bua kukina bena Kristo, kubafila ku tubadi ne kubashipa. Baprofete ba dishima bavua ne bua kujuka ne kupambuisha bantu ba bungi. Dinanga dia ba bungi divua ne bua kukepa.
2. Bua tshinyi bidi bikemesha bantu bua mutudi tuyisha lumu luimpe pa buloba bujima?
2 Bapostolo bavua ne bua kuikala bakeme pakalua Yezu kubambila ne: bavua ne bua kuyisha lumu luimpe lua Bukalenge bua Nzambi pa buloba bujima nansha muvua ntatu ne bua kuikalaku. (Mat. 24:3-14) Lelu eu tudi tumona mudi bualu bua kuyisha lumu luimpe ebu bukumbana. Nansha mutudi mu tshikondo tshikole, Bantemu ba Yehowa badi bayisha lumu luimpe ne tshisumi. Padi dinanga dia bena panu diende dikepa, dietu didi dienda divula. Nansha mudibu batukine kudi “bisamba bionso,” tudi tuyisha bantu ba mu bisamba pabuipi ne bionso.
3. Mmalu kayi adi akolesha ku muoyo audi mumone mu luapolo?
3 Nebitukoleshe ku muoyo bikole tuetu bakonkonone mudimu utudi benze mu tshidimu tshia mudimu tshishale bu mudibu baleje mu dibeji 3 too ne ku 6. Etshi ntshidimu tshia 16 tshidi tshitudi tuenza anu mêba mapite pa muliyare mujima mu mudimu wa kuyisha ne kuvuija bantu bayidi. Etshi ntshijadiki tshinene tshia mutudi ne ditabuja dikole. Bampanda-njila mbavule ne bantu 5,8 pa 100; bamanyishi ne bantu 3,1 pa 100; balongi ba Bible mbavule ne bantu 4,4 pa 100. Bantu bavua batambule mbapite ba tshidimu tshishale ne bantu 20,1 pa 100. Bidi bituenza disanka dia bungi bua kumona ne: lelu eu bantu batue ku miliyo 7 badi benzela Yehowa mudimu ne muoyo mujima. Paudi utangila malu adi mu dibeji 3 too ne ku 6, mbualu kayi budi butamba kukusankisha?
4. Nntatu kayi ivua muntu mukuabu nayi pavuaye udienzeja bua kutambula?
4 Nansha mudi malu adi mu luapolo elu atukemesha, katupu muoyo ne: bantu badi benza mudimu eu badi ne ditabuja dikole. Tuangate tshilejilu: Guillermo mmukolele mu ditunga dia Bolivie. Bakamulela mu 1935 ne wakatuadija kuenza mudimu mu budimi bua coca (koka) pavuaye ne bidimu tshitema. Kutuadijila ku buana buende, uvua udia mabeji a coca bua kubenga kumvua dipungi dia mudimu mukole uvuaye wenza. Pashishe, wakalua kanuayi ne munu wa makanya. Pakatuadijaye kulonga disua dia Yehowa, wakalekela kunua makanya ne dikuatshika dia maluvu. Kadi lutatu lunene luvuaye nalu luvua lua kulekela didia dia mabeji a coca. Wakasambila bikole kufika ku dilekela didia mabeji aa. Pakalekelaye malu mabi aa, wakatambula. Udi wamba ne: “Mpindieu, ndi ndiumvua bimpe! Ndi ne disanka dia bungi be!”
5. Ntshinyi tshitudi basue kuenza?
5 Yehowa mmunange bantu bikole. Mmusue bua bantu bonso bakudimune mutshima. (2 Pet. 3:9) Ke tshitudi petu basue. Mioyo yetu itusake bua kuenza tshionso tshitudi mua kuenza bua kutungunuka ne kuambuluisha bantu badi banange bulelela bua bamanye Yehowa ne bamunange anu bu mutudi bamunange.