Uye kumpala mu kuyisha kuebe
1 Tatu wetu wa mu diulu utu usanka padi bantu badi bamutendelela baya kumpala mu bulelela. Abi bidi biumvuija kabidi ne: badi balua bantu bakole mu ditabuja ne balengeja nyishilu wabu wa lumu luimpe. Paulo wakalomba mukulu nende Timote bua kutungunuka ne kudifila ku dibala ne dilongesha bua kudiunda kuende kumueneka kudi bonso. (1 Tim. 4:13-15) Tuetu bonso tudi ne bua kuenza muetu muonso bua kulengeja ndongeshilu wetu mu buambi nansha bituikala tukadi ne bidimu bia bungi mu mudimu eu.
2 Ditekela malu a kukumbaja: Bua kuya kumpala, bidi bikengela kuditekela malu a kukumbaja. Ngamue malu kayi atudi mua kuditekela? Tudi mua kudienzeja bua kuikala kuenza mudimu bimpe ne muele wetu wa nyuma udi Bible. (Ef. 6:17) Pamuapa kudi mushindu mukuabu wa diyisha utudi tuetu ne bua kulengeja, bu mudi kuyisha mu njila, ku telefone anyi miaba idi bantu benzela midimu ne bendela mishinga. Peshi tudi mua kudienzeja bua kumanya mua kupinganyina bantu. Bualu bukuabu butudi mua kudifundila bua kulengeja mbua kumanya mua kutuadija kulongesha bantu Bible ne mua kubalongesha bilenga.
3 Bintu biatuambuluisha: Bisangilu bia tshisumbu, nangananga Kalasa ka Mudimu wa Nzambi ne Tshisangilu tshia Mudimu, mbilongolola bua kutuambuluisha bua kuya kumpala mu mudimu wa diyisha. Patudi tudienzeja bikole bua kulongolola bisangilu bionso ebi ne kubuelamu ne tudifila kabidi bua kutumikila mibelu yonso idibu bafilamu, nebituambuluishe kabidi bikole.—2 Kol. 9:6.
4 Tudi kabidi ne bua kuambuluishangana bua kuya kumpala. (Nsu. 27:17) Tuetu bikale tuteleja mudi bakuabu batuadija kuyikila ne bantu patudi nabu mu buambi, nebituambuluishe bua kumanya mua kuyisha bimpe. Kabidi, mutangidi wa kasumbu ka dilonga dietu dia mukanda udi mua kulongolola bua kutuambuluisha pa nkayetu. Tudi ba diakalenga pikala mpanda-njila wa matuku a bungi anyi mumanyishi mukuabu mua kutuambuluisha bua kulua mumanyishi udi upatula bipeta bimpe udi ne disanka mu mudimu wende. Kudiku muambi wa lumu luimpe mupiamupia mu kasumbu ketu ka dilonga dia mukanda anyi? Pamuapa tudi mua kumuambila bua kuya netu mu mudimu wa diyisha.
5 Mudimu wa mushinga mukole udi wenzeka lelu mmudimu wa kuyisha udi bena Kristo benza. Patudi tupesha Yehowa “mulambu wa kumutumbisha” nawu, tudi basue kudifila ne muoyo mujima. (Eb. 13:15) Tuetu tudienzeja bua kuya kumpala mu kuyisha kuetu, netulue bena mudimu badi ‘kabayi ne bua kufua bundu, baludikila bantu njila mululame mu dîyi dia Nzambi dia bushuwa.’—2 Tim. 2:15.