Tudi mua kubika ku lufu!

BU TUETU mua kufua, Nzambi udi mua kuanyisha bua kutubisha ku lufu, mbuena kuamba ne: kuenza bua tuikale kabidi ne muoyo anyi?​— Muntu muakane Yobo uvua witaba ne: Nzambi mmusue kuenza nunku. Nanku pakamona Yobo ne: ukavua pa kufua, wakambila Nzambi ne: ‘Wewe neumbikile ne meme nengitabe kuudi.’ Yobo wakamba ne: Yehowa Nzambi uvua mua kujinga, anyi uvua musue bikole bua kumubisha ku lufu.​—Yobo 14:14, 15.

Yezu udi anu ne muoyo wa buena wa Yehowa Nzambi, Tatuende. Mmusue kutuambuluisha. Pavua muntu uvua ne disama dia nsudi mumuambile ne: ‘Unkezulaku bu wewe mua kusua,’ Yezu wakandamuna ne: ‘Ndi musue.’ Nenku wakuondopa nsudi ya muntu au.​—Mâko 1:40-42, MMM.

Yezu wakalongela bua kunanga bana kudi Tatuende. Misangu ibidi kale menemene, Yehowa wakambuluisha basadidi bende bua kubisha bana ku lufu. Eliya wakalomba Yehowa bua kujulaye muana wa mamu kampanda uvua mumuakidile bimpe, Yehowa e kumujula. Yehowa wakambuluisha kabidi Elisha bua kubishaye muana mutekete wa balume ku lufu.​—1 Bakelenge 17:17-24; 2 Bakelenge 4:32-37.

Kuenaku umvua disanka paudi umanya ne: Yehowa mmutunange bikole anyi?​— Kêna utuvuluka anu patudi ne muoyo to. Udi kabidi utuvuluka nansha tuetu mua kufua. Yezu wakamba ne: Tatuende udi umona bantu bafue badiye munange anu bu batshidi bikale ne muoyo! (Luka 20:38) Bible udi wamba ne: ‘kakuena lufu, kakuena muoyo, kakuena malu atshidiku, kakuena malu atshilualua adi mua kutupandulula ku dinanga dia Nzambi.’​—Lomo 8:38, 39.

Pavua Yezu pa buloba, wakaleja ne: Yehowa udi utabalela bana batekete. Udi mua kuvuluka ne: Yezu wakayikila ne bana pa malu a Nzambi. Kadi udi mumanyeku ne: Nzambi wakapesha Yezu bukole bua kubisha bana ku lufu anyi?​— Tuanji kuakulabi bua dîba divua Yezu mubishe muana wa bakaji wa bidimu 12 wa muntu mukuabu muena dîna dia Yailo.

Yailo ne mukajende bavua basombele ne muanabu umuepele pabuipi ne Mâyi a Galela. Dinga dituku nsongakaji kusamaye bikole ne Yailo kumonaye ne: ukavua pa kufua. Kutuadijaye kutuma meji kudi Yezu, muntu wa dikema uvua Yailo mumvue bualu buende ne: uvua mua kuondopa masama a bantu. Nunku Yailo wakaya kumukeba. Wakasangana Yezu ku muelelu wa Mâyi a Galela, ulongesha bantu ba bungi.

Yailo kudifinya mu bantu amu ne kuya kutua binu kumpala kua Yezu. Kuambilaye Yezu ne: ‘Muananyi wa bakaji udi usama bikole. Udi mua kuluaku bua kumuambuluisha anyi? Ndi nkulomba ne: ulue.’ Diakamue, Yezu kuyaye ne Yailo. Musumba munene wa bantu bavua balue kumona Mulongeshi Munene kulondabu pabu. Kadi bamane kuya mutantshi, bantu bakuabu bavua bafumina kua Yailo kuluabu kumuambila ne: ‘Muanebe ukadi mufue! Udi utatshishila Muyishi tshinyi?’

Yezu uvua mumvue pavua bantu abu bakula. Uvua mumanye dibungama dikole divua nadi Yailo bua muvuaye mujimije muanende umuepele. Ke bualu kayi Yezu wakamuambila ne: ‘Kutshinyi to. Itabuja anu Nzambi, muanebe neumvue bimpe.’ Bakatungunuka ne kuya too ne muakafikabu kumbelu kua Yailo. Balunda ba dîku diende bavua badila miadi. Bavua ne dibungama bualu mulunda wabu uvua mufue. Kadi Yezu kubambilaye ne: ‘Kanudidi; bualu bua muana kêna mufue, udi mulale tulu.’

Pavua Yezu wamba nanku, bantu bakabangisha kuseka bualu bavua bamanye bimpe ne: muana ukavua mufue. Kadi, wewe udi wela meji ne: Yezu wakamba ne: muana uvua mulale bua tshinyi?​— Udi umona ne: uvua musue kulongesha bantu tshinyi?​— Uvua musue bua bamanye ne: lufu ludi mua kuikala anu bu tulu tukole. Uvua musue kubalongesha ne: ku diambuluisha dia bukole bua kudi Nzambi, udi mua kupingajila muntu udi mufue muoyo bipepele anu bu mutudi mua kujula muntu ku tulu.

Yezu wakapatula bantu bonso pambelu, kushala mu nzubu amu anu ne bapostolo bende Petelo, Yakobo ne Yone ne tatuende ne mamuende wa muana. Pashishe kuyaye munda mua nzubu muvua muana. Wakamukuata ku tshianza e kuamba ne: “Muana, bika!” Ne anu pine apu, muana wakajuka kutuadijaye kuenda! Tatuende ne mamuende bavua ne disanka munda tente kadiyi kuamba.​—Mâko 5:21-24, 35-43; Luka 8:40-42, 49-56.

Mpindieu anji kuela meji. Bu muvua Yezu mupingajile kansongakaji aku muoyo, kênaku mua kuenzela bantu bakuabu muomumue anyi?​— Udi wela meji ne: neenze nanku bushuwa anyi?​— Eyowa, neenze nanku. Yezu nkayende wakamba ne: ‘Dîba nedilue diumvua bonso badi mu nkita dîyi [dianyi], nebajuke.’​—Yone 5:28, 29.

Udi wela meji ne: Yezu mmusue kubisha bantu anyi?​— Tshilejilu tshikuabu tshia mu Bible tshidi tshiambuluisha bua kuandamuna lukonko alu. Bualu buvua buenzeke dituku dikuabu pabuipi ne tshimenga tshia Naina budi buleja mushindu udi Yezu udiumvua padi bantu ne kanyinganyinga mu madilu.

Mamu mukuabu uvua munkatshi mua bantu bavua bafumina mu Naina baya kujika muanende wa balume. Kumpala bayende wakafua, mpindieu muanende umuepele mmufue. Udi ne dibungama dikole! Bantu ba bungi ba mu Naina bavua panyima pa tshitalu tshia muanende tshivuabu baya natshi pambelu pa tshimenga. Mamu uvua wenda udila, eku bantu kabayi ne tshivuabu mua kuenza bua kumusamba.

Dituku adi, Yezu ne bayidi bende bavua baya batangile ku luseke lua tshimenga tshia Naina. Bafika pabuipi ne tshibi tshia tshimenga, buobu e kusambakena ne musumba wa bantu baya kujika muana wa mamu au. Pakamona Yezu mamu au udila, wakamumvuila luse. Kanyinganyinga kakole ka mamu au kakalenga Yezu ku muoyo. Nanku kusuaye bua kumuambuluisha.

Yezu wakakula ne dîyi dimpe kadi dikale dia bukole divua mamu mumvue, wamba ne: ‘Kudidi.’ Ngenzelu wende wa malu ne mushindu wende wa kuakula biakakoka ntema ya bantu bonso kudiye. Pakasemena Yezu ku tshitalu, bantu bonso bavua ne bua kuikala badiebeja bua kumanya tshivuaye usua kuenza. Yezu wakakula, utuma dîyi ne: ‘Nsongalume, ndi nkuambila ne: bika!’ Diakamue au kusombaye! Kutuadija kuakula.​—Luka 7:11-17.

Elabi meji muvua mamu au mua kuikala mudiumvue! Udi mua kudiumvua munyi bu wewe mua kuakidila munanga webe uvua mufue?​— Bualu ebu kabuenaku buleja ne: Yezu mmunange bantu bikole ne mmusue kubambuluisha anyi?​— Anji elabi meji muikalabi bimpe menemene mu bulongolodi bupiabupia bua Nzambi bua kuakidila bantu bapeta muoyo tshiakabidi!​—2 Petelo 3:13; Buakabuluibua 21:3, 4.

Mu tshikondo atshi bamue bantu babishibua ku lufu nebikale bantu batuvua bamanye, ne bana nebikale munkatshi muabu. Netubamanye anu muvua Yailo mumanye muanende pavua Yezu mumubishe. Bakuabu nebikale bantu bavua bafue kukadi nkama anyi bidimu binunu ne binunu. Nansha muvuabu ne muoyo kale kale, Nzambi kakubapua muoyo to.

Kabienaku bienza disanka patudi tumanya ne: Yehowa Nzambi ne Muanende Yezu mbatunange bikole anyi?​— Mbasue ne: tuikale ne muoyo, ki nganu bua bidimu bikese patupu, kadi mbua kashidi ne kashidi!