Netuabanye mabeji a kubikila nawu bantu mu Tshivulukilu pa buloba bujima
1. Netuenze mudimu kayi kumpala kua Tshivulukilu?
1 Yezu wakamba ne: ‘Enzayi nunku bua kumvuluka.’ (Luka 22:19) Bua kutumikila dîyi dia Yezu edi, batendeledi ba Yehowa nebadisangishe ne bantu bakuabu mu dituku dia 30 dia ngondo muisatu wa 2010 eu bua kuvuluka lufu lua Yezu. Bua bualu ebu, netuabanye mabeji a kubikila nawu bantu mu Tshivulukilu pa buloba bujima kutuadija ku matuku 13 too ne ku 30 a ngondo muisatu eu.
2. Leja mushindu utudi mua kufila mabeji a Tshivulukilu.
2 Mushindu wa kufila mabeji aa: Paudi upesha muntu dibeji edi, wenze bua amone tshimfuanyi tshidi pa mutu; pashishe wambe ne: “Ku dilolo dia matuku 30 a ngondo muisatu eu, bantu bapite bungi nebadisangishe pa buloba bujima bua kuvuluka lufu lua Yezu. Ndi mulue kunupesha dibeji edi wewe ne dîku dienu bua nuluaku penu kubuela mu tshisangilu etshi. Nudi mua kubikila kabidi balunda benu. Kupu dîba ne muaba utuenzela tshisangilu etshi muoyo.” Bilondeshile muudi mumone, udi mua kubala Luka 22:19 bua kuleja tshidi Bible utulomba bua kuenza. Kadi wamanya: bu mutudi ne matuku makese a kujikija teritware, mbimpe kuakula mêyi makese.
3. Netubikile banganyi?
3 Pikala tshisumbu tshienu ne teritware munene, bakulu badi mua kunulomba bua kushiya kabidi mabeji ku nzubu kudi benaku kabayiku. Padibi biakanyine, nudi mua kufila mabeji aa ne Tshibumba tshia Nsentedi ne Réveillez-vous! Kupu muoyo bua kubikila balongi bebe ba Bible, bantu bautu uyikila nabu malu a Nzambi, bena mudimu nebe, balongi benu, balela benu, bena mutumba ne bakuabu bantu baudi mumanye.
4. Patudi ne dinanga ne dianyisha bua mudi Yehowa mutunange, mudiye mutume Yezu bua atufuile, muoyo wetu neutusake bua kuenza tshinyi?
4 Udilongolole bua kuyisha bikole: Tshikondo tshia Tshivulukilu ke tshikondo tshia kuvudija mudimu wetu. Nanku kuenaku mua kushintulula programe webe bua kulua mpanda-njila muambuluishi anyi? Udi ne bana anyi balongi ba Bible badi ne ngikadilu milenga anyi? Udi mua kuyikila ne bakulu bua bamone ni badi mua kulua bamanyishi badi kabayi banji kutambula. Paudi umona mudi Yehowa mukunange, mudiye mutume Yezu bua akufuile, muoyo webe neukusake bua kulua mu Tshivulukilu, ne kubikila bantu bapite bungi mu Tshivulukilu.—Yone 3:16.