Mudimu udi mupite midimu mikuabu
1. Tuetu ne dianyisha dia bungi bua mudimu wa buambi netuenze tshinyi?
1 Bua tshinyi batu batuvuluija bua kufila dîba dietu, bukole buetu ne makuta etu bua mudimu wa buambi? Bualu kakuena mudimu bu eu to. Tuetu bele meji ku bipeta bipite buimpe bia mudimu wikala kauyi mua kuenzeka kabidi eu, dijinga dietu dia kuwenza nedikole kabidi.—Bien. 20:24.
2. Leja mudi kuyisha kutumbisha dîna dia Yehowa.
2 Kutumbisha dîna dia Yehowa: Mu buambi tudi tuleja bantu ne: anu Bukalenge bua Yehowa budi Yezu ulombola ke buajikija ntatu ne makenga a bantu. (Mat. 6:9, 10) Patudi tuyisha, tudi tutumbisha Yehowa, tuamba ne: yeye ke wajikija masama ne lufu. (Yesh. 25:8; 33:24) Bu mutudi ne dîna diende, padi bantu bakuabu bamona ngikadilu yetu milenga ne disuminyina dietu, badi batumbisha dîna diende. (1 Pet. 2:12) Kumanyisha dîna dia Mfumu wa diulu ne buloba, ki ndiakalenga dinene anyi?—Mus. 83:18.
3. Tela masanka adi bantu badi bateleja lumu luimpe bapeta.
3 Kupandisha bantu: Yehowa ‘kena musue umue wenu ajimine, kadi udi musue bonso balue kukudimuna mitshima yabu.’ (2 Pet. 3:9) Kadi muntu yeye kayi muyishe bantu, mmunyi mudibu mua kumanya tshidi tshimpe ne tshidi tshibi ku mêsu kua Yehowa? (Yona 4:11; Lomo 10:13-15) Padi muntu witaba lumu luimpe, ulekela kuenza malu ende mabi, udi ulua muntu muimpe. (Mika 4:1-4) Udi kabidi upeta mushindu wa kupeta muoyo wa tshiendelele. Patudi tuyisha ne tulongeshane bikole, tudi tudipandisha, tupandisha kabidi badi batuteleja. (1 Tim. 4:16) Mudimu wa buambi mmudimu wa butumbi, ki mmuomu anyi?
4. Mbimpe tuetu kuditua mu diyisha ne dilongesha bantu Bible bua tshinyi?
4 Dikenga dinene dikadi pa kubutula ndongoluelu wa malu mabi eu. Bantu badi batendelela Yehowa nebapande. Nenku, kuyisha ne kulongesha bantu Bible ke mudimu udi mutambe kuikala ne mushinga, wa kutamba kuenza ne udi ukuatshisha bantu lelu. Tuutekayi pa muaba wawu.—Mat. 6:33.