‘Tulue ne mulambu wa Yehowa’

PADI muntu ukuenzela bualu buimpe, utu wenza tshinyi bua kumuleja dianyisha diebe? Tumone muvua bamfumu ba basalayi ba bena Isalele baleje dianyisha diabu panyima pa mvita yabu ne bena Midiyana. Bakaluangana mvita eyi kunyima kua bena Isalele bamane kutendelela Bâla-Peô. Nzambi wakenza bua bantu bende batshimune, ne basalayi 12 000 ne bena Isalele bakuabu bakabanyangana bintu biakanyengabu mu mvita. Mu diumvuangana ne mikenji ya Yehowa, basalayi bakapesha bakuidi tshitupa tshia bintu biabu ne bena Isalele bakuabu bakapesha pabu bena Lewi.—Nom. 31:1-5, 25-30.

Kadi bamfumu ba basalayi bavua basue bobu kufila bia bungi. Bakambila Mose ne: ‘Bantu bebe bakabala bungi bua bena mvita badi kunyima kuetu, nansha umue wetu udi mushale.’ Bakangata dipangadika dia kulambula Yehowa or ne bintu bikuabu bimpe. Bujitu bua bintu bia or bivuabu bafile buakapita pa kilo 190.—Nom. 31:49-54.

Bia muomumue lelu, kudi bantu ba bungi badi baleja dianyisha bua malu adi Yehowa mubenzele. Ki nganu Bantemu ba Yehowa batu baleja dianyisha diabu kudi Nzambi to. Tuangate tshilejilu tshia muendeshi wa mashinyi uvua muambule Bantemu mu diya ne mu dialukila diabu ku mpungilu wa bantu ba mu matunga a bungi uvua muenzeke mu tshimenga tshia Bologne mu ditunga dia Italie mu 2009. Bu muvuaye muendeshi muimpe wa lutulu, bantu bavua babuele mu mashinyi ende bakangata dipangadika dia kumufundila ka mukanda bua kumuela tuasakidila ne kumupeshabu makuta a matabishi ne mukanda wa Bible utu ulongesha tshinyi menemene? Muendeshi eu wakabambila ne: “Ndi ngitaba ne disanka dionso kakanda kanudi bamfundile ne mukanda wenu unudi bampeshe. Kadi ndi nnupingajila makuta bualu ndi musue kuafila bua nutungunuke ne kuenza mudimu unudi nuenza. Nansha mundi tshiyi Ntemu wa Yehowa, ndi musue kunupesha makuta aa bualu ndi mumona ne: nudi nuenza malu bualu nudi banange bantu bakuabu.”

Wewe musue kuleja dianyisha bua malu adi Yehowa mukuenzele, udi mua kufila makuta bua kukuatshisha mudimu udi Bantemu ba Yehowa benza pa buloba bujima. (Mat. 24:14) Udi mua kumona mishindu itu bantu bafila makuta abu mu kazubu aka.

MUSHINDU UDI BAMUE BAFILA

MAPA BUA MUDIMU WA PA BULOBA BUJIMA

Bantu bavule batu balama makuta bungi kampanda bua kuela mu tushete tua mapa a “Mudimu wa pa buloba bujima.”

Ku ngondo yonso, bisumbu bitu bituma makuta aa ku biro bia Bantemu ba Yehowa bidi bitangila mudimu wa ditunga diabu. Bantu badi mua kutuma kabidi makuta aa buludiludi ku Watchtower Bible and Tract Society of New York, Inc., Attention Treasurer’s Office, 25 Columbia Heights, Brooklyn, New York 11201-2483, anyi ku biro bia Bantemu ba Yehowa bidi bitangila mudimu mu ditunga diabu. Sheke ya makuta idibu batuma mu adrese udi kulu eu idi ne bua kuikala mu dîna dia “Watchtower.” Nudi mua kufila nansha bilengejilu bu mudi mpeta ne bikanu bia or peshi bintu bikuabu bia mushinga mukole. Nutume mapa enu aa ne mukanda muipi udi uleja ne: nudi baatume bua kashidi.

DILAMISHA MAKUTA

Muntu udi mua kusombesha Watch Tower Bible and Tract Society of Pennsylvania makuta bua enza nawu mudimu miaba yonso idiye musue. Kadi padi muntu au nawu dijinga badi bamupingajilawu musangu umue. Wewe musue kumanya malu makuabu, udi mua kufundila biro bia Treasurer’s Office mu adrese udi kulu eku anyi kubikila ku nimero eyi: (718) 560-7500.

MAPA MALONGOLOLA

Pa kumusha mapa a makuta mafila bua kashidi, kudi mishindu mikuabu ya kufila bintu bua mudimu wa Bukalenge udi wenzeka pa buloba bujima. Tudi mua kutela bu mudi:

Makuta a tshieya:

Muntu udi mua kushila Watch Tower bukenji bua kuangata makuta ende a tshieya anyi a pansio.

Konte ya ku banke:

Muntu udi mua kufundisha konte yende ya ku banke, mikanda ya makuta matekesha ku banke anyi konte yende ya makuta a pansio mu dîna dia Watch Tower anyi kufunda bua kuafutabu Watch Tower padiye ufua, bilondeshile mikenji ya banke ya muaba udiye.

Bukenji bua kupeta bintu ne makuta masombesha:

Badi mua kupesha Watch Tower bukenji bua kupeta bintu ne makuta masombesha bu dipa dia kashidi.

Mpangu ne nzubu:

Muntu udi mua kufila lupangu anyi nzubu wende bua kashidi, kadi utungunuka ne kusombelamu patshidiye ne muoyo. Manyisha Betele wa ditunga dienu kumpala kua kumupesha lupangu anyi nzubu webe.

Dipa dia kufuta ku tshidimu:

Edi ndipa dia muntu wangata makuta anyi mikanda ubifila ku biro bia Bantemu ba Yehowa. Pashishe muntu eu (anyi mukuabu udiye musungule) udi utuadija kupeta makuta bungi kampanda tshidimu tshionso patshidiye ne muoyo. Tshidimu tshidi muntu ufila dipa edi badi bamupuekeshila mushinga wa bitadi bituye ufuta.

Testama ne bintu bilamisha:

Muntu udi mua kushila Watch Tower bintu anyi makuta ende, peshi kumupa bukenji bua kuangata bintu bidiye mulamisha. Badi mua kukepesha mushinga wa bitadi padi bintu bitekesha mu dîna dia tshitendelelu.

Anu mudi miaku eyi: “mapa malongolola” ileja, mapa a mushindu eu atu alomba bua muntu adianjile kudilongolola. Bua kuambuluisha bantu badi bajinga kukuatshisha mudimu udi Bantemu ba Yehowa benza pa buloba bujima ne mapa malongolola, mbapatule kakanda ka mu Anglais ne mu tshiena Espagne kadi ne tshiena-bualu tshia ne: Charitable Planning to Benefit Kingdom Service Worldwide. (Mapa malongolola bua kukuatshisha mudimu wa Bukalenge wa pa buloba bujima) Mbenze kakanda aka bua kuleja mishindu mishilangane idi bantu mua kufila mapa ne bintu bia bumpianyi. Bantu ba bungi bamane kukabala ne bayukile ne aba batu babapesha mibelu mu malu a mikenji anyi a bitadi, mbafike ku dikuatshisha mudimu wa Nzambi ne wa kuambuluisha bantu udi Bantemu ba Yehowa benza pa buloba bujima, ne mbabakepeshile bungi bua makuta a bitadi avuabu bafuta. Udi mua kulomba kakanda aka ku Charitable Planning Office (Biro bia mapa malongolola).

Bua kumanya malu makuabu, udi mua kubikila biro bia mapa malongolola anyi kubifundila ku adrese udi kuinshi eku, peshi udi mua kubikila anyi kufundila Bethel udi utangila mudimu mu ditunga dienu.

Charitable Planning Office

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Telefone: (845) 306-0707