Tshia kuenza bua kulongesha bapiabapia mua kuyisha

1. Uvua mudiumvue bishi musangu wa kumpala uuvua muye mu buambi?

¹ Udiku uvuluka musangu wa kumpala uwakayisha ku nzubu ne ku nzubu anyi? Pamuapa uvua mumvue buôwa bua bungi. Biwikala uvua muyishe ne mulongeshi webe wa Bible anyi ne mumanyishi mukuabu, uvua ne disanka bua muvuaye mukuambuluishe. Mpindieu uukadi mumanye kuyisha, udi mua kuambuluisha pebe bapiabapia bua kuyisha.

2. Bamanyishi bapiabapia badi ne bua kumanya tshinyi?

² Bamanyishi bapiabapia badi ne bua kumanya mua kutuadija kuyukila ne bantu, kubabadila Bible, kubapinganyina ne kutuadija kubalongesha Bible. Badi kabidi ne bua kumanya mishindu mikuabu ya diyisha bu mudi, kuyisha mu misesu anyi miaba idi bantu benzela midimu. Udi mua kubambuluisha bua kulengeja mushindu wabu wa kuyisha ku diambuluisha dia tshilejilu tshiebe ne mibelu iudi ubapesha.

3. Mmushindu kayi udi tshilejilu tshietu mua kuambuluisha bakuabu?

³ Ikala tshilejilu: Yezu wakaleja bayidi bende mua kuyisha. (Luka 8:1; 1 Pet. 2:21) Paudi udilongolola bua kuyisha ne mumanyishi mupiamupia, longolola mushindu mupepele wa kuyisha udiye mua kuidikija uudi pamuapa muangatshile mu mikanda yetu. Pashishe, uyishe ku nzubu umue anyi ibidi bua umvua malu audi wamba. Panudi numbuka ku nzubu au udi mua kumulomba bua akuleje malu mimpe adiye mumona mu mushindu uudi muyishe. Nebimuambuluishe bua kumona buimpe bua kuyisha pamue ne bakuabu ne bua kuitaba mibelu iwamupesha padiye uyisha pende.

4. Mmunyi mutudi mua kuambuluisha mumanyishi mupiamupia padiye ujikija kuyisha?

⁴ Mupesha mibelu: Yezu wakapesha kabidi bayidi bende mibelu ya mushindu wa kuyisha. (Mat. 10:5-14) Udi mua kuambuluisha mumanyishi mupiamupia mushindu wa muomumue. Padi dîba diende dia kuakula dikumbana, muteleja ne ntema. Pashishe panudi numbuka, umuele kalumbandi ne muoyo mujima bua malu masunguluke adiye muenze nansha wewe mumone imue miaba ya yeye kulongolola. Kumpala kua kumubela, udi mua kuindila bua kumona ni udi uyilongolola ku nzubu mukuabu. Uvua mua kuikala mubienze bua buôwa. Umanye kabidi ne: bamanyishi bonso kabatu ne dimanya dia muomumue ne kudi mua kuikala mishindu mimpe ya bungi ya kuenza bualu bumue.​—1 Kol. 12:4-7.

5. Ntshinyi tshitudi mua kuambila muntu patudi tujinga kumubela?

⁵ Imue misangu mumanyishi mupiamupia udi mua kukulomba mibelu. Kadi yeye kayi muyilombe, udi mua kumupeshayi. Mmunyi mutudi mua kumubela ne budimu? Bamue bamanyishi ba kale batu bakonka ne: “Ndi mua kukupesha mubelu anyi?” peshi ne: “Udi wela meji ne bivua mushindu kayi?” Mushindu mukuabu ngua kuamba ne: “Pantshivua mumanyishi mupiamupia, bivua binkolela bua . . . , kadi tangila tshiakangambuluisha. . . .” Misangu mikuabu bidi mua kuikala bimpe bua nuenu kutangila mu mukanda wa Comment raisonner. Mbimpe kumupesha mibelu anu idi itangila mushindu udiye muyishe bua kulu kumutondesha.

6. Mmunyi mudi ‘tshiamu mua kusakisha tshinga tshiamu’ mu mudimu wa buambi?

⁶ Tshiamu tshidi tshisakisha tshinga tshiamu: Paulo wakankankamija Timote ukavua mumanyishi wa kale bua kutungunuka ne kulamata ku diyisha ne kudiunda. (1 Tim. 4:13, 15) Nansha wewe mutuadije kuyisha kukadi bidimu bia bungi, tungunuka anu ne kulengeja mushindu uudi uyisha. Ikala utangila bantu baudi uyisha nabu nansha badi ne dimanya dikese ne ikala wambuluisha bakuabu bimpe nangananga bapiabapia bua balue bamanyishi bapiluke ba lumu luimpe.​—Nsu. 27:17.