Dienza mudimu bimpe ne nkonko

BU MUDI nkonko ilomba diandamuna (dia mundamunda anyi dia mukana), kakuyi mpata, idi ibuejija bateleji mu muyuki. Nkonko idi mua kukuambuluisha bua kutuadija muyuki ne kuyikilangana ne muntu bimpe bia menemene! Bu muudi ngamba-malu ne mulongeshi kabidi, udi mua kuela nkonko bua kukoka ntema ya muntu, bua kumuelesha meji, anyi peshi bua kushindika biudi wamba. Paudi ukuata mudimu bimpe ne nkonko, bateleji badi bakulonda lungenyi luabu lutabale, benda bela meji pamutu pa kukulondabu bu balale tulu. Ikala ne kipatshila kampanda, ela nkonko bua kukumbaja kipatshila aka.

Bua kufikisha muntu ku didituaye mu muyuki. Paudi utuadija kuyisha, ikala pa buipi bua kupesha bantu mushindu wa kuakulabu pabu.

Bantemu ba bungi batu babanga diyuki dilenga pa kuamba patupu ne: “Kutuku muanji kudiebeja ne: . . . ?” Patubu basungula lukonko ludi bantu bavule bikale badiela, buambi butu bulua bulenga, bupatula bipeta bimpe be! Nansha bikala muntu kayi muanji kudiela lukonko elu, ludi mua kumutabuluja lungenyi. Nkonko bu idi ilonda eyi itu mimpe mu nsombelu kabukabu: “Udi wela meji kayi . . . ?,” “Udi umvua munyi . . . ?,” ne “Udi witaba ne: . . . ?”

Pakapeta Filipo (muyishi wa evanjeliyo) munene mukuabu wa mu Etiyopiya ubala mulayi wa Yeshaya, Filipo wakamuebeja tshianana ne: ‘Udi mumvue biudi ubala anyi?’ (Bien. 8:30, MMM) Lukonko elu luakambuluisha Filipo bua kumuambila malu adi atangila Yezu Kristo. Padi bamue Bantemu ba lelu belangana lukonko lua nunku, badi bamanya bantu badi ne nzala mikole ya kumvua Dîyi dia Nzambi.

Bantu bavule batu bafika pabu ku diteleja bikole patubu banji babalomba bua kuleja mmuenenu wabu. Panyima pa lukonko, ushale muteya matshi bimpe. Ikala ne bulenga,uleje dianyisha bua diandamuna dia muntu pamutu pa kudibenga. Padibi bikumbane kuela muntu ka-lumbandi, umuele ka-lumbadi ne muoyo mujima. Munga musangu pakandamuna mufundi kampanda “ne meji,” Yezu wakamuela ka-lumbandi nenku: “Kuena kule ne bukalenge bua [Nzambi] to.” (Mâko 12:34, MMM) Nansha diandamuna dia muntu diodi kadiyi diumvuangana ne diebe, umuele tuasakidila bua mudiye mukuandamune. Tshidiye ukuambila tshidi mua kukuambuluisha bua kumanya mua kumuyisha Dîyi dia Nzambi bimpe.

Bangabanga ne kuamba ngenyi minene. Paudi uyikila ne muntu umue anyi ne kasumbu ka bantu, teta kuela nkonko idi ibafikisha ku ngenyi minene. Mbimpe yikale nkonko ya pa malu adi bantu nawu dijinga menemene. Udi kabidi mua kuela nkonko idi ikeba bantu nyota, nkonko idi mandamuna kaayi apeteka bipepele to. Wewe muanji muimane katupa kunyima kua diela lukonko, bantu nebateleje malu adi alulonda ne ntema yonso.

Musangu mukuabu, muprofete Mika wakela nkonko ya bungi. Panyima pa mumane kuebeja tshivua Nzambi ulomba basadidi bende, Mika wakasakidila nkonko inayi, luonso luikale ne diandamuna kampanda munda muadi. Nkonko yonso eyi idi yambuluisha babadi bua kupeta diandamuna dimpe divua Mika mukomeshe nadi tshitupa etshi. (Mika 6:6-8) Kuenaku pebe mua kuenza nunku paudi ulongesha anyi? Anji teta!

Elangana meji ne bantu pa tshiena-bualu. Nkonko idi mua kuambuluisha bakuabu bua kumvua mudi ngenyi ilondangana bimpe mu tshijadiki tshitudi tufila. Ke tshiakenza Yehowa pavuaye wambila bena Isalele bualu kampanda bukole bua menemene mu Malaki 1:2-10 (MMM). Udi wanji kubanga ne: “Ndi mununange!” Bu muvuabu kabayi bafike ku dimona bimpe ne: uvua mubanange, wakabebeja ne: “Esawu ki mmuanabo ne Yakobe anyi?” Pashishe, Yehowa udi wakula bua mudi Edome mushale tshipela bua bubi buende, bualu Nzambi kavua mumunange to. Wakalondakaja muanda eu ne bilejilu bikosolola kudi nkonko bua kushindika muvua bena Isalele benza malu bienze bu ne: Nzambi kavua mubanange to. Bua imue ya ku nkonko ayi, mbienze bu ne: bakuidi (bapange lulamatu) ke bavua bayela. Mikuabu nyivua Yehowa wela bakuidi aba. Muyiki eu udi utujula majiya, utulenga ku mutshima ne ukoka ntema yetu bikole; dielangana dia meji kadiena kubenga; mukenji kawena kupua muoyo.

Bamue bangamba-malu batu benza mudimu ne nkonko mushindu eu. Nansha muudi kuyi ukeba ne: bandamune, bantu badi mua kudibueja mu muyuki, badimona bu badi bayikila nebe mu meji abu.

Patutu tulonga Bible ne muntu, tutu tumuela nkonko bua akule pende. Tshidibi, bitu bimpe padi muntu wandamuna mu mêyi ende nkayende pamutu pa kubala anu mandamuna adi mu mukanda. Ne dîyi didi dileja bulenga, umuele nkonko mikuabu bua kumuelesha meji. Pa ngenyi minene, umulombe bua kushindamena pa Bible padiye wandamuna. Udi mua kumukonka tshilejilu ne: “Mmunyi mudi bualu butudi tulonga ebu bumvuangana ne bukuabu butukadi balonge? Budi ne mushinga bua tshinyi? Budi butangila nsombelu wetu munyi?” Diela nkonko edi ndilenga dipite diamba malu audi wewe witaba anyi dimumvuija malu a bungi wewe nkayebe. Ke mushindu uwambuluisha mulongi bua kukuata mudimu ne ‘meji’ ende bua kumona mua kutendelela Nzambi.​—Lomo 12:1.

Padi mulongi kayi umvua bualu kampanda, ushale ne lutulu. Udi mua kuikala ukeba kufuanyikija malongesha ende a kuonso eku ne biudi umulongesha. Kukudimuna bualu ne kubumvuija mushindu mukuabu kudi mua kumuambuluisha. Kadi imue misangu, dielangana meji dipepele ndimpe. Kuata mudimu bikole ne mvese. Keba bilejilu. Ela kabidi tukonko tupepele tudi tuelesha muntu meji pa bijadiki bidiku.

Bua kupatuisha malu adi munda. Patu bantu bandamuna nkonko, kabatu amu bapatula menemene tshidi munda muabu to. Badi anu mua kufila diandamuna didibu bela meji ne: ke diudi ukeba. Bidi bikengela kuikala ne bujinguludi. (Nsu. 20:5) Udi mua kumuebeja anu bu muakenza Yezu, ne: ‘Wewe udi witabuja dîyi edi anyi?’​—Yone 11:26.

Pakasunuka bayidi ba bungi ba Yezu bua bualu buvuaye muambe ne kumulekelabu, Yezu wakalomba bapostolo bende bua kulejabu tshivuabu bumvua pabu. Wakabebeja ne: “Nudi penu basue kumbuka anyi?” Petelo wakaleja muvuabu bumvua, e kuambaye ne: “Mfumu, netuye kudi nganyi? Wewe ngudi ne miaku ya muoyo wa kashidi. Buetu tuetu tudi tuitaba, bamanye kabidi ne: Wewe ke Wa Tshijila wa [Nzambi].” (Yone 6:67-69, MMM) Munga musangu Yezu wakebeja bayidi bende ne: ‘Bantu badi bamba muana wa muntu ne: Nnganyi?’ Wakalua kuela lukuabu lukonko luvua lubalomba bua kupatula tshivua mu mitshima yabu buobu, ne: ‘Kadi nuenu nudi nungamba ne: Meme ndi nganyi?’ Ke Petelo kumukudimuna ne: ‘Wewe udi Kristo, Muana wa Nzambi udi ne Muoyo.’​—Mat. 16:13-16.

Udi pebe mua kuenza nunku bua amue malu paudi ulonga Bible ne muntu, bualu nebikuambuluishe. Udi mua kuebeja muntu ne: “Balongi nebe (anyi bena mudimu nebe) batu bamona muanda eu bishi?” Kunyima udi mua kukonka ne: “Wewe udi wela meji kayi bua bualu ebu?” Paudi umanya menemene mudi muntu umvua anyi wela meji, udi mua kumuambuluisha mpindieu bikole.

Bua kushindika bualu. Badi kabidi mua kuenza mudimu ne nkonko bua kushindika ngenyi. Ke tshiakenza Paulo mu Lomo 8:31, 32: ‘Padi [Nzambi] mutue ku tshietu, udi mua kutubenga kabidi nnganyi? Kavua nansha muengeleke Muanende to. Uvua mumufile bualu buetu bonsu. Mmunyi mudiye kayi mua kutupesha bionso pamue ne Muanende?’ (MMV) Mpindieu udi mumone ne: mu bualu buonso lukonko ludi lushindamena pa tshiambilu tshidi kumpala kualu.

Panyima pa mumane kufunda dipangadika divua Yehowa muangate bua kunyoka mukalenge wa Babulona, muprofete Yeshaya udi wamba malu ushindika bikole ne: “Padi [Yehowa] muena bukole buonsu muangate dipangadika, udi mua kumukandika, bua kukumbajaye tshidiye muele meji nnganyi? Padiye musue kunyoka muntu, udi mua kumbusha dinyoka adi nnganyi?” (Yesh. 14:27, MMV) Mushindu udi nkonko eyi miela udi uleja bushuwa ne: bualu budiye wamba kabuena kuvila to. Kavua muindile bua bamupeshe diandamuna to.

Bua kuleja ngelelu mubi wa meji. Tuetu bele meji bimpe kumpala kua kuela nkonko, idi mua kupatula ngelelu wa meji mubi wa muntu patoke. Tshilejilu, kumpala kua kuondopa muntu kampanda, Yezu wakebeja Bafalese ne bamue bamanyi ba Mikenji ne: “Mbianyishibue bua kuondapa muntu dituku dia tshijila anyi?” Kunyima kua yeye mumane kuondapa muntu awu, wakela lunga lukonko ne: ‘Nnganyi wa kunudi eku, muanende nansha ngombe wende mukuluke mu tshina kayi umupatula diakamue, nansha biobi bikale dituku dia tshijila?’ (Luka 14:1-6, MMM) Kavua mutekemene diandamuna to, ne kabakamuandamuna nansha. Nkonko eyi yakaleja ngelelu wabu mubi wa meji patoke.

Imue misangu nansha bena Kristo balelela batu bela meji bibi. Bamue ba mu bidimu lukama bia kumpala (ba mu tshisumbu tshia mu Kolinto) bavua bafunda bena Kristo nabu ku tubadi pabu bavua mua kujikija bilumbu abi munkatshi muabu nkayabu. Mupostolo Paulo wakenza tshinyi bua kukosa tshilumbu etshi? Wakela nkonko ya bungi miludika bimpe bia menemene bua kushintululabu lungenyi.​—1 Kol. 6:1-8.

Wewe udibija, neumanye mua kuela nkonko bimpe. Tshidibi, ikala ne kanemu, nangananga paudi wakula ne bantu bakole, bantu baudi kuyi mumanye, ne bantu badi ne mianzu kampanda. Ela nkonko bua kulongesha Bible mu mushindu mulenga udi ukoka bantu.