Mukanda wa kudi Kasumbu Kaludiki

Nuenu badi banange Yehowa,

Yezu wakamba ne: ‘Nenumanye bualu bulelela, ne bualu bulelela nebunupe budishikaminyi.’ (Yone 8:32) Mêyi aa adi atukolesha ku muoyo bikole be! Eyowa, kudi mushindu wa kumanya bulelela nansha mudi mashimi mapite bungi mu ‘matuku a ku nshikidilu’ aa adi ne malu makole. (2 Timote 3:1) Udiku muvuluke dituku dia kumpala diwakitaba bulelela bua mu Dîyi dia Nzambi anyi? Bivua bikuenze disanka dia bungi, ki mmuomu anyi?

Kadi nansha mudi kupeta dimanya dilelela dia Dîyi dia Nzambi ne kudiyisha bantu bakuabu kuikale ne mushinga, kuenza malu adi umvuangana ne bitudi tuyisha kudi paku ne mushinga wa bungi. Bua kuenza malu aa tudi ne bua kudilama mu dinanga dia Nzambi. Ntshinyi tshidi bualu ebu butulomba? Yezu udi wandamuna lukonko elu mu mêyi akambaye butuku bua muladilu wa lufu luende. Wakambila bapostolo bende ba lulamatu ne: ‘Binuatumikila mikenji yanyi, nenushale mu dinanga dianyi, bu mungakatumikila mikenji ya Tatu wanyi, ne mundi nshala mu dinanga diende.’​—Yone 15:10.

Tudi tumona ne: Yezu wakashala mu dinanga dia Nzambi bualu uvua utumikila mikenji yende. Ke mudibi kabidi buetu tuetu lelu. Bua tuetu kushala mu dinanga dia Nzambi, tudi ne bua kuenza malu adi apetangana ne Dîyi diende dituku dionso. Anu bobu butuku abu, Yezu wakamba ne: ‘Binuamanya malu aa, nenuikale ne disanka binuaenze.’​—Yone 13:17.

Dijinga dietu ndia ne: mukanda eu unuambuluishe bua kutungunuka ne kutumikila Dîyi dia Nzambi mu nsombelu wenu bua nuenu kudilama mu ‘dinanga dia Nzambi too ne ku muoyo wa tshiendelele.’​—Yuda 21.

Bana benu bena mu Kasumbu Kaludiki ka Bantemu ba Yehowa