Mushindu muimpe udi Misambu ya Bukalenge mua kutusankisha

Batendeledi ba Nzambi batu bangata misambu bu dipa dilenga dia kudi Yehowa. (Yak. 1:17) Mu bisumbu bia bungi bantu batu basanka bikole patubu bela Misambu ya Bukalenge (ne dîyi dikese) kumpala kua bisangilu kutuadija ne padibi bijika. Mizike eyi mmushindu muimpe wa kutujingila difika dilenga mu bisangilu. Idi ituambuluisha bua kutuma meji ku ntendelelu wa Yehowa. Kuela misambu yetu mipiamipia kudi kutuambuluisha bua kuibidilangana ne misambu eyi ne kuyimba bimpe. Kuela misambu eyi padi bisangilu bijika kudi kulama lungenyi luetu luimpe lua kukankamijangana. Tusumbu tua bakulu tudi ne bua kulongolola malu bimpe bua bikale bela mizike ya Tuimbilayi Yehowa misambu​—Mimba ku piano kumpala kua bisangilu kutuadija ne padibi bijika. Bakulu batabalele bua mizike ikale panshi panshi bua kayipangishi muntu yonso bua kuyikila ne bakuabu to.