Bible utuku umanyisha malu a matuku atshilualua anyi?

Tshiena-bualu etshi tshidi ne nkonko iukadi pamuapa mudiele ne tshidi tshileja muaba uudi mua kupetela mandamuna mu Bible webe. Bantemu ba Yehowa nebikale ne disanka bua kuyukila nebe bua mandamuna aa.

1. Bible udiku ne milayi misunguluke anyi?

Anu Nzambi wa Bukole Buonso ke udi mua kumanyisha kalu ne kalu konso bua matuku atshilualua. (Amosa 3:7) Tshilejilu, bikondo bia kale Nzambi wakamanyisha dilua dia muntu kampanda uvuabu mua kubikila ne: Masiya anyi Kristo. Masiya uvua ne bua kupatukila mu ndelanganyi ya muena lulamatu Abarahama. Uvua ne bua kuikala mfumu uvua ne bua kutuadila bantu badi batumikila Nzambi masanka a kuikala ne muoyo mupuangane udi kawuyi ne masama. (Genese 22:18; Yeshaya 53:4, 5) Muntu uvuabu balaye eu uvua ne bua kuledibua mu Beteheme.​—Bala Mika 5:2.

Yezu wakaleja muvuaye Masiya. Bible ukavua mudianjile kumanyisha bidimu bipite pa 700 kumpala ne: Masiya uvua ne bua kuledibua kudi mukaji utshivua kamama ne bavua ne bua kumupetula. Uvua ne bua kufila muoyo wende bua mibi ya bantu ba bungi ne bavua ne bua kumujika mu nkita ya babanji. (Yeshaya 7:14; 53:3, 9, 12) Bible ukavua kabidi muambe bidimu bipite pa nkama itanu ne: Yezu uvua ne bua kubuela mu Yelushalema mubande pa nyama wa mpunda ne bavua ne bua kumutungila ku mpalata 30. Malu onso aa akakumbana.​—Bala Zekâya 9:9; 11:12.

2. Nzambi udiku udianjila kumanyisha bidimu anyi?

Bible wakamanyisha bidimu bipite pa 500 kumpala tshidimu tshilelela tshivua Masiya ne bua kumueneka. Difika diende dia pa buloba divua ne bua kuangata mbingu ya bidimu, mbuena kuamba ne: “lumingu” luvua ne bidimu muanda mutekete. Kuvua ne bua kuikala mbingu 7 kusangisha ne mbingu 62, nunku mbingu eyi ivua yenza mbingu 69 ya bidimu. Mbingu 69 eyi ivua yenza bidimu 483. Ndîba kayi divua bidimu ebi bituadije? Bilondeshile Bible, bivua bituadije pavua Nehemiya muena mudimu wa Nzambi mufike mu Yelushalema ne mutuadije kuibakulula tshimenga. Muyuki wa Pelasa udi uleja ne: bakatuadija kubala bidimu ebi mu 455 kumpala kua Yezu. (Nehemiya 2:1-5) Bidimu 483 pashishe, Yezu wakatambula mu tshidimu tshia 29 bikondo bietu ebi anu muvuabu badianjile kuleja.​—Bala Danyele 9:25.

3. Milayi ya mu Bible idiku yenda ikumbana lelu anyi?

Yezu uvua mumanyishe malu a bungi bua tshikondo tshietu etshi. Mulayi wende udi wakula bua lumu luimpe lua Bukalenge bua Nzambi luikala mua kutuadila bantu ba pa buloba bujima badi banange Nzambi masanka. Bukalenge bua Nzambi nebubutule ndongoluelu mujima wa malu mubi udiku lelu eu.​—Bala Matayi 24:14, 21, 22.

Milayi ya mu Bible idi ileja bimpe muikala ndongoluelu wa malu udiku lelu eu mua kufika ku ndekelu. Bible udi uleja ne: pamutu pa bantu kuyabu kumpala mu tshikondo tshia dishidimuka etshi, badi bobu banyanga buloba. Ntatu mikebesha kudi mvita, biyole bia nzala, bikumina ne bipupu bia masama neyivulangane. (Luka 21:11; Buakabuluibua 11:18) Bantu kabakuikala batumikila mêyi a mu Bible adi atangila bikadilu bimpe. Mu bikondo ebi bikole, bayidi ba Yezu bavua ne bua kuyisha lumu luimpe lua Bukalenge bua Nzambi mu bisamba bionso.​—Bala Matayi 24:3, 7, 8; 2 Timote 3:1-5.

4. Matuku atshilualua a bantu neikale mushindu kayi?

Nzambi wa Bukole Buonso udi ne malu mimpe adiye mulongoluele bantu bena lulamatu. Yezu Kristo, Masiya ne bantu badi Nzambi musungule nebakokeshe buloba bujima basombele mu diulu. Badi benza Bukalenge bua kokesha bidimu tshinunu. Bafue nebajuke ne nebapete diakalenga dia kulumbuluishibua bua kuanyishibua bua kupeta muoyo wa tshiendelele. Bukalenge bua Nzambi nebondope kabidi muntu yonso wikala ne muoyo tshikondo atshi. Masama ne lufu kabiakuikalaku to.​—Bala Buakabuluibua 5:10; 20:6, 12; 21:4, 5.

Bua kumanya malu makuabu, bala mu dibeji dia 23-25, dia 197-199, ne mu 200-201 mu mukanda Bible utu ulongesha tshinyi menemene?, udibu baleje muaba eu.