Tuyishayi bimpe miaba itubu bapanyishila bintu
1. Padibi bitukolela bua kuyisha miaba idi bantu bapanyina bintu, katuena ne bua kuteketa mu mikolo bua tshinyi?
1 Bitu bikukolela bua kuyisha muaba udi bantu bapanyishila bintu anyi? Bikalabi nanku, kuteketshi mu mikolo to, bualu Paulo pende uvua ne bua ‘kukolesha mutshima’ bua kuyisha nansha muvuaye ne dikima. (1 Tes. 2:2) Netuakule bua ntatu itudi mua kupeta ne tshitudi mua kuenza bua kuyitantamena.
2. Bua tshinyi katuena ne bua kuela meji ne: tuetu bayishe bantu badi bapanyisha bintu bidi mua kubatonda?
2 Bidiku mua kutonda bantu badi bapanyisha bintu patudi tusua kubayisha anyi? Mu miaba ya bungi, kabitu bitonda bantu bua kuanji kulekela bidibu benza bua kuyukila ne bakuabu to. Badi mua kukuakidila bimpe bualu badi bela meji ne: udi kilian muimpe. Wewe muvuale bimpe, muakule ne bulenga ne muoyo umue, nebakuakidile bimpe.
3. Bua tuetu kubenga kunyingalaja basumbi ba bintu, tudi ne bua kuenza tshinyi?
3 Ndiku mua kuyisha muntu padiye ne bakilian ba bungi anyi? Udienze bua kuyisha dîba didi bantu ba bungi kabayi mu makazen, bu mudi patshidibu batuadija mudimu. Windile too ne padi mfumu wa bena mudimu anyi muena mudimu ushala nkayende kumpala kua kuyikila nende. Uyukile nende mu tshikoso.
4. Tudi mua kuamba tshinyi patudi tuyisha bantu badi ku mudimu?
4 Tshiudi mua kuamba: Bua makazen adi ne bena mudimu ba bungi, uyukile ne mfumu wa bena mudimu. Udi mua kuamba ne: “Mbikole bua kupeta bena mudimu ku nzubu yabu, ke bualu kayi tudi banutantshile muaba unudi nuenzela mudimu. Ndi mumanye ne: nudi nuenza mudimu, nunku nenyukile nebe mu tshikoso.” Bua bantu kubenga kutufuanyikija ne bapanyishi ba bintu, ki mbimpe kulomba bantu mapa to; anu muntu mutuebeje mushindu udi mudimu wetu wenda. Bilondeshile mudimu udi bantu benza, udi mua kulomba dianyisha kudi mfumu wa mudimu bua kuyukila ndambu ne bena mudimu. Wambulule mêyi ebe a mbuelelu a buena adi kuulu aa. Muena mudimu yeye umueneka kayi ne dîba, wipidije kabidi muyuki webe, pashishe umushile trakte. Biobi bikole bua kuyukila ne bena mudimu, udi mua kubatekela bibejibeji muaba kampanda anyi kubashilabi kudi muntu.
5. Mmalu kayi adi ne bua kutusaka bua kuyisha ne dikima miaba idi bantu benzela mudimu?
5 Yezu ne Paulo bavua bayisha bantu miaba yabu ya mudimu ne dikima, tubidikijayi petu. (Mat. 4:18-21; 9:9; Bien. 17:17) Lomba Yehowa bua akupeshe dikima ne mutshima mupole. (Bien. 4:29) Bu mutu bantu badi benza mudimu kabayi basomba ku mabu, tudienzejayi bua kubayishila miaba itubu benzela mudimu.