Ikala ne budimu paudi mu buambi
1. Tudi ne bua kuikala ne budimu patudi tuyisha bua tshinyi?
1 Padi bantu ba Nzambi bayisha ‘munkatshi mua bena tshikondo tshikonyangale ne tshia tshishiku,’ badi bu “mikoko idi munkatshi mua nkashama.” (Mat. 10:16; Filip. 2:15) Mvita, ne malu a tshikisu ne dikuata bantu kudi benzavi mbitangalake bikole lelu. Bidi bileja mudi bantu ‘badiundadiunda mu malu mabi.’ (2 Tim. 3:13) Mmibelu kayi ya mu Bible idi mua kutuambuluisha bua ‘kuikala ne budimu’ patudi tuyisha?—Mat. 10:16.
2. Tudi ne bua kumbuka muaba utudi tuyisha bua kuya kuyisha muaba mukuabu dîba kayi?
2 Ikala ne budimu: Nsumuinu 22:3 udi uleja ne: tudi ne bua ‘kusokoma’ patudi tumona dikenga dilua. Nanku, ikala mutabale! Nansha wewe muikale uyisha muaba muimpe, umanye ne: malu adi mua kushintuluka mu mushindu uudi kuyi muelele meji to. Udi mua kumona bungi bua bampulushi buenda buvula anyi bantu benda bunguila mu njila. Imue misangu, muntu uudi uyisha yeye muikale ne muoyo muimpe, udi mua kukudimuija. Pamutu pa kushala muaba au bua kumona bidi bienzeka, mbimpe kumbuka musangu umue, kuya kuyisha muaba mukuabu.—Nsu. 17:14; Yone 8:59; 1 Tes. 4:11.
3. Mubelu udi mu Muambi 4:9 udi mua kutuambuluisha mu mudimu wa buambi mushindu kayi?
3 Yisha pamue ne bakuabu: Muambi 4:9 udi wamba ne: ‘Bantu babidi badi bapita umue.’ Utu uyisha nkayebe kakuyi bualu anyi? Kuenaku umona ne: ki mbimpe kuenza nanku tshikondo tshitudi etshi anyi? Imue miaba udi mua kuyisha nkayebe. Kadi miaba mikuabu, ki mbimpe muanetu wa bakaji anyi wa balume utshidi nsonga ayishe nkayende ku nzubu ne ku nzubu, nangananga pakadi ku mêsu kufiika to. Tumanye ne: tuetu tuyisha ne muntu mukuabu mbimpe. (Muam. 4:10, 12) Panudi nuyisha ba bungi mu teritware umue, ikalayi nutabalelangana. Mbimpe kulaya bakuabu banudi nabu kumpala kua kumbuka mu teritware.
4. Tudi mua kuenza tshinyi bua kuepula bena mu tshisumbu bonso ku njiwu?
4 Bu mudi bakulu ‘bikale ne tshitabela bua mioyo yetu,’ badi ne bujitu bua kufila mibelu bilondeshile nsombelu wa muaba unudi. (Eb. 13:17) Yehowa neatubeneshe tuetu tudipuekesha, ne tueleshangana nabu diboko bimpe. (Mika 6:8; 1 Kol. 10:12) Nunku tuetu bonso tudi mua kuambuluisha bua kuyisha bikole mu teritware wetu, kadi tuenze nanku ne budimu bua bungi.