Netutuadije kubikila bantu mu Tshivulukilu mu dia 1 ngondo 3
1. Netutuadije kubikila bantu mu Tshivulukilu dituku kayi? Tshidimu etshi netutuadije kumpala bua tshinyi?
1 Netutuadije kubikila bantu mu Ditanu dia 1 dia ngondo 3 bua kuluabu kudisangisha netu mu Tshivulukilu. Tshivulukilu netshienzeke mu dituku dia 26 dia ngondo 3, nunku netuikale ne matuku a bungi a kubikila bantu kupita bidimu bishale. Ebi nebiambuluishe bantu ba bungi bua kupeta diabu dibeji dia dibikila, nangananga bobu muaba udi tshisumbu ne teritware munene.
2. Mmalu kayi adibu balongolole bua kuangata mabeji a dibikila ne bua kuyisha mu teritware yonso?
2 Dilongololayi: Bakulu nebanuleje mua kuyisha mu teritware wenu yonso, ne pikalabi bikengela kushiya mabeji ku nzubu kunudi kanuyi nusangana bantu. Nuenu bajikije teritware wenu kadi mabeji a dibikila mashale, nudi mua kuafila panudi nuyisha miaba idi bantu. Mutangidi wa mudimu enze bua bikala bateka mabeji a dibikila makumbane (muaba utubu batekela mikanda anyi bibejibeji) bua bamanyishi kuangatabu. Kadi kabateki mabeji aa onso musangu umue to. Muntu yonso ikala wangata anu bungi budiye mua kuabanya bua lumingu lumue.
3. Patudi tupesha bantu mabeji a Tshivulukilu, mmalu kayi atudi katuyi ne bua kupua muoyo?
3 Tshia kuamba: Bua kushila bantu ba bungi mabeji aa, mbimpe kuakula mêyi makese. Mu dibeji 4 mudi mêyi a mutudi mua kutuadija kuyikila ne muntu atudi mua kuakaja bilondeshile teritware wetu. Kadi katuena mua kuya lukasa pikala muntu musue kuyikila netu bikole anyi muikale ne nkonko to. Patudi tufila mabeji aa mu Disambombo anyi mu Dia lumingu, tufile kabidi bibejibeji padibi biakanyine. Mu Disambombo dia 2 ngondo 3, katuakulomba bantu bua kulonga Bible to, kadi netuabanye mabeji a Tshivulukilu.
4. Bua tshinyi tudi ne bua kufila mabeji a dibikila bikole?
4 Tudi batekemene ne: bantu ba bungi nebalue kudisangisha netu mu Tshivulukilu. Muyuki wenzabu neuleje tshidi Yezu menemene. (1 Kol. 11:26) Neuleje mudi lufu luende lutuambuluisha. (Lomo 6:23) Neuleje kabidi tshitudi ne bua kuvulukila Yezu. (Yone 17:3) Tudienzejayi bua kufilaku mabeji aa bikole.