Ngumu ya Bukalenge No. 38 ya kuabanya mu ngondo wa 11

1. Nnkonko kayi itu bantu badiela bua lufu? Mmushindu kayi utuayandamuna mu ngondo wa 11?

¹ Lufu mmuluishi wa bantu bonso, nansha bobu mu tshitendelelu kayi. (1 Kol. 15:26) Bantu ba bungi batu badiebeja bua kumanya muaba utu bafue ne ni badi mua kubamona kabidi. Nanku, bisumbu bia pa buloba bujima nebiabanye Ngumu ya Bukalenge No. 38 idi ne tshiena-bualu tshia ne: “Bafue badi bulelela mua kulua ne muoyo kabidi anyi?” munkatshi mua ngondo mujima. Mudimu wa pa buawu wa diabanya eu neutuadije mu dia 1 ngondo wa 11. Panyima pa ngondo wa 11, netufile Ngumu ya Bukalenge No. 38 eyi anu bu trakte.

2. Mbenze Ngumu ya Bukalenge No. 38 mushindu kayi?

² Mudibu bayenze: Mbenze Ngumu ya Bukalenge No. 38 mu mushindu wa kuyibunya mu bule buayi bua tshiena-bualu tshiayi tshimpe ne mêyi a ne: “Newandamune tshinyi? Eyowa? Tòo? Imue misangu?” bikale bimueneke pamutu. Padi muntu ubulula Ngumu ya Bukalenge, neamone mudi Bible wandamuna lukonko lua tshiena-bualu ne mushindu udi malu adi Bible ulaya amuambuluisha. Neamone kabidi malu adi mua kumusaka bua kuitaba malongesha a mu Bible. Panyima pa Ngumu ya Bukalenge padi lukonko luimpe ludi lusaka muntu bua kuela meji ne bamulombapu bua kulonga malu makuabu.

3. Leja mutuabanya Ngumu ya Bukalenge No. 38.

³ Mua kuyabanya: Netuabanye Ngumu ya Bukalenge eyi anu mututu tuabanya mabeji a dibikila nawu bantu mu Tshivulukilu ne mu mpungilu wa distrike. Bakulu nebaleje tshia kuenza bua kujikija teritware wenu mujima, biumvuangane ne mukanda wa mu dia 1/4/2013. Bisumbu bidi ne teritware mukese bidi mua kulomba bisumbu biena mutumba bidi ne teritware munene bua kubambuluisha. Padibu babanya Ngumu ya Bukalenge No. 38, wangate anu bungi buwabanya mu lumingu lumue. Tuetu bamane kuyifila ku nzubu ne ku nzubu ne bajikije teritware wetu, tudi mua kuyifila kabidi patudi tuyisha muaba udi bantu ba bungi. Ngumu ya Bukalenge eyi yoyi mijike ngondo kayi muanji kujika, netupeshe bantu mikanda ya kufila mu ngondo au. Mu Disambombo dia kumpala dia ngondo, netutambe kuenza mudimu wa pa buawu wa diabanya Ngumu ya Bukalenge pamutu pa kutuadija kulonga Bible ne bantu. Mu Disambombo ne mu Dia lumingu, mbimpe tupeshe kabidi bantu bibejibeji koku mushindu. Udiku wenda udilongolola bua kuenza mudimu wa pa buawu eu bikole menemene anyi?