Diakula ne bulenga ne muoyo wa munda wonso

MUNTU yonso wendenda eu utu umvua disanka anyi dibungama. Padi muntu uleja patoke mudiye umvua munda muende, udi uleja tshidi mu mutshima wende, tshituye munda munda, mutuye umona malu ne mutuye wangata bantu bakuabu. Pabi, bantu ba bungi kabatu baleja mutubu badiumvua to; bionso ebi tshitu anu bua ntatu mikole itubu bapete anyi bua nkoleshilu wabu. Kadi Yehowa udi utulomba bua kuikala ne ngikadilu milenga munda muetu ne kuyileja patoke.​—Lomo 12:10; 1 Tes. 2:7, 8.

Miaku idi ipatuka mukana muetu idi mua kuleja mutudi tudiumvua menemene. Kadi bikala miaku itudi tupatula kayiyi ileja mutudi tumvua, bantu badi mua kudiebeja ni tudi tumvua malu atudi tuamba aa. Ku lukuabu luseke, patudi tupatula miaku ileja mutudi tumvua, muyuki wetu udi ulengela, ubotakana, ne ubuela badi batuteleja.

Mua kuakula ne bulenga. Tutu tumvua bimpe nangananga patutu tuakula bua bantu. Nanku dîyi didi ne bua kuikala ne bulenga, disanguluke patudi tuakula bua ngikadilu milenga ya Yehowa ne patudi tuleja dianyisha bua bulenga buende. (Yesh. 63:7-9) Patudi tuakula ne bantu netu kabidi, ngakuilu wetu udi ne bua kuleja mutudi ne bulenga, kuleja disanka.

Elabi meji muvua dîyi dia Yezu mua kuikala pakandamunaye muena nsudi uvua ukeba bua amuondape, ne: ‘Ndi musue, wikale mulengejibue.’ (Mâko 1:40, 41) Ela kabidi meji bua muntu mukaji (uvua ne disama dia mashi munkatshi mua bidimu 12 bijima) uvua muluile lua panyima pa Yezu bua kulenga tshizemba tshia tshilamba tshiende. Pakamonaye ne: bavua bamutandule, wakaya ne lukanku luonso kutua binu panshi kumpala kua Yezu, kutonda ku mêsu kua bantu bonso tshivuaye mulengele tshilamba ne muvua disama diende dijike. Mpindieu ela meji muvua Yezu mumuambile ne: ‘Muananyi, ditabuja diebe diakukupandisha, ya biebe talala.’ (Luka 8:42b-48) Mushindu uvua Yezu muakule ne Bulenga buonso mu bikondo bibidi ebi udi utuelesha meji bikole bia dikema too ne lelu’eu.

Tuetu bikale tumvuila bantu luse ne tusua kubambuluisha ne muoyo umue bu muvua Yezu wenza, nebidimuenekele ku mushindu utudi tuakula nabu. Diakula ne bulenga edi, dia difumina mu mutshima nunku, kaditu dipitapite to. Tuetu tuakula ne bulenga, bantu badi mua kuitaba malu atudi tubambila. Malu a bungi atutu tuakula mu mudimu wa budimi atu alomba kuikalaku ne ndambu wa bulenga, nangananga patutu tuelesha bantu meji, tubakolesha ku muoyo, tubakankamija, ne tubasamba.

Paudi umvua disanka bua bakuabu, mbimpe dimuenekele ku mpala webe. Paudi wakula ne bulenga, udi ukoka bantu anu bu mutu kapia kenza dîba dia mashika. Mpala yeye kayi uleja ne: udi ne disanka, bantu nebamone ne: kuena nabu ku muoyo to. Musangelu kautu bu tshintu tshia kuvuadika mpala to, udi ne bua kuikala wa tshia bushuwa.

Bulenga budi ne bua kumvuikila kabidi ku dîyi. Wewe muikale ne dîyi dipate anyi diumakane, bidi mua kukukolela bua kuleja bulenga. Kadi wewe udienzeja muebe muonso, mu kupita kua matuku udi mua kutuadija kuakula ne bulenga. Umanye ne: dikosa anyi dibenga kushindumuna maleta majikuke ke ditu dinyanga dîyi. Longa mua kulepesha maleta aa mu miaku, nanku dîyi diebe nedikale ne bulenga, nedikale disanguluke.

Kadi mushindu uudi wangata bateleji ke tshintu tshidi ne mushinga menemene. Pikala meji ebe mateka anu kudi bateleji, ne wewe muikale kabidi uzuka bua kubambila malu mimpe, bulenga ne disanka nebidimuenekele mu diakula diebe.

Muyuki muenza ne disanka udi usanguluja bantu, kadi mbimpe kuikala ne luse ne dinanga kabidi. Kuamba malu adi alenga lungenyi nkuimpe, kadi tudi ne bua kulenga mutshima kabidi.

Mututu kabidi tudiumvua (santima mikuabu). Muntu udi mu dibungama ke udi mua kuleja bintu bu mudi kanyinganyinga, buôwa, ne dibungama dikole. Disanka ke ngikadilu utudi ne bua kuikala nende dîba dionso ne kumuleja mu diakula dietu ne bakuabu. Kadi kabitu bimpe kuleja imue ngikadilu idi muena Kristo kayi ne bua kuikala nayi to. (Ef. 4:31, 32; Filip. 4:4) Miaku, tshikuma tshia dîyi, tshivuma tshia dîyi, mpala wetu ne dinyungisha dia mubidi (anyi jeste itutu tuenza) bidi bituambuluisha bua kuleja mushindu wonso utudi tudiumvua.

Bible udi wakula bua ngikadilu eyi yonso. Imue misangu utu uyitela anu tshianana. Mikuabu misangu utu ulonda bualu anyi utela mêyi a muntu adi aleja ngikadilu eyi. Paudi ubala malu a nunku ne dîyi diakumbanyine, nebikulenge ne nebilenge kabidi badi bakuteleja ku muoyo. Bua wewe kubala mushindu eu, ikala uditeka pa muaba wa bantu badibu bakuila mu biudi ubala. Kadi bu mudi muyuki kauyi tshintu tshia kuenza natshi bilele, kunekeshi to. Enza bua ne: bantu badi bakuteleja bumvue bimpe biudi ubala.

Diakula ne bulenga ne muoyo wa munda wonso didi diumvuangana ne ngenyi. Anu bu musangelu, bulenga butudi nabu patudi tuakula ne ngikadilu mikuabu bidi ne bua kumvuangana ne tshitudi tuamba.

Tshilejilu, tangila tshidi Matayo 11:28-30 wamba. Bala mpindieu Matayo nshapita wa 23 mudi Yezu utandisha Bafundi ne Bafalese, ubapisha. Yezu kavua mua kuamba mêyi makole aa ne mashika mutalalangane to.

Buebe wewe, nngikadilu kayi utudi ne bua kuikala nende patudi tubala Genese nshapita wa 44 (mudi Yuda wakuila muakunyende Benyamina)? Tangila ngikadilu udi mu mvese wa 13, mu mvese wa 16 (mudi Yuda umvua bua bualu bubi buvua bubafikile), ne mudi Yosefe umvua pende mu Genese 45:1.

Nunku bua kubala peshi kuakula bimpe, tudi ne bua kutuma meji ku miaku, ku ngenyi, kabidi ne ku mushindu wa kuleja mutudi tudiumvua.