Yehowa utu ummona mushindu kayi?

1. Bible mmufuanangane ne lumuenu ku tshinyi?

¹ Utu uditangila mu lumuenu misangu bungi kayi? Ba bungi ba kutudi batu baditangila mu lumuenu dituku dionso, bua kumona bidibu mua kuakaja. Batu bafuanyikija Bible ne lumuenu. Kubala Dîyi dia Nzambi kudi kutuambuluisha bua kumona tshitudi munda, bumuntu buetu butu Yehowa umona. (1 Sam. 16:7; Yak. 1:22-24) Dîyi dia Nzambi didi mua “kujingulula meji ne malu adi muoyo musue kuenza.” (Eb. 4:12) Mmunyi mudi kubala Bible dituku dionso ne kuelangana meji bua malu atudi tubalamu kutuambuluisha bua kuakaja miaba itudi ne butekete bua kulua bambi ba lumu luimpe bimpe?​—Mus. 1:1-3.

2. Umvuija mudi Bible utuambuluisha bua kudikonkonona.

² Bible ikale lumuenu luebe: Miyuki ya batendeledi ba Yehowa ba lulamatu idi mu Bible idi itulongesha ngikadilu itu Yehowa munange bikole. Tshilejilu, Davidi uvua wamba kufua bua dîna dia Nzambi. (1 Sam. 17:45, 46) Yeshaya wakitaba ne dikima dionso bua kuyisha mu teritware uvua mukole. (Yesh. 6:8, 9) Yezu uvua munange Tatu wende wa mu diulu bikole. Ke bualu kayi kavua umona kuyisha bu bujitu to, kadi bu mudimu muimpe wa disanka. (Yone 4:34) Bena Kristo ba mu bidimu lukama bia kumpala bavua bayisha ne tshisumi, beyemena Yehowa, ne bavua badisuike bua kubenga kulekela kuyisha. (Bien. 5:41, 42; 2 Kol. 4:1; 2 Tim. 4:17) Kuelangana meji bua bilejilu bia nunku kudi kutuambuluisha bua kumanya miaba itudi mua kulengeja mu mudimu wetu wa tshijila.

3. Bua tshinyi ki mbimpe kujingakana bua kushintulula malu adi akengedibua?

³ Akaja malu ebe: Mbimpe kuditangila mu lumuenu kadi kubenga bua kuakaja miaba ivua minyanguke anyi? Tòo. Mbimpe kulomba Yehowa bua atuambuluishe tudimone tshitudi menemene, bua tuakaje miaba idi mibi. (Mus. 139:23, 24; Luka 11:13) Bu mudi dîba dishale dikese, ne mudi mioyo ya bantu mu njiwu, katujingakanyi bua kushintulula malu adi akengela kushintulula to.​—1 Kol. 7:29; 1 Tim. 4:16.

4. Tshitu tshienzekela muntu udi utangila mu Dîyi dia Nzambi ne meji onso ne utumikila malu adiye ulonga ntshinyi?

⁴ Tshidi muntu munda ke tshitu Yehowa umona. Nanku tshitudi munda muetu ke tshidi ne mushinga wa bungi kupita tshitudi pambelu. (1 Pet. 3:3, 4) Muntu udi utangila mu Dîyi dia Nzambi ne meji onso, mpindieu wenza malu adiye ulongamu, neapete tshinyi? Kena ulua “muteleji udi upua muoyo, kadi udi ulua muenji wa mudimu ne neikale ne disanka mu diwenza.” (Yak. 1:25) Bulelela, netulue bena mudimu bimpe bikale ne disanka bualu tudi “tumuenesha butumbi bua Yehowa bu mmuenu.”​—2 Kol. 3:18.