Ukuate mudimu bimpe menemene ne dîba diebe paudi uyisha
Mu tshidimu tshia mudimu tshia 2014, Bantemu ba Yehowa bavua bayishe mêba 1 945 487 604. Etshi ntshijadiki tshia ne: tudi badisuike ne muoyo mujima bua kuikala ne bia bungi bia kuenza mu mudimu wa Yehowa. (Mus. 110:3; 1 Kol. 15:58) Bu mukadi ‘dîba dishale dikese,’ katuenaku mua kuenza mudimu ne mêba etu a mushinga bua kuyisha bantu ba bungi anyi?—1 Kol. 7:29.
Bua kuenza mudimu bimpe ne dîba dietu patudi tuyisha, mbimpe kuenza malu bilondeshile nsombelu. Tshilejilu, wewe ne tshibidilu tshia kuenza dîba dimue anyi a bungi mu mushindu kampanda wa kuyisha kadi kuyi upeta bantu, kuenaku mua kushintulula malu bua kupeta bantu ba bungi baudi mua kuyukila nabu anyi? Nsombelu mmishilangane bilondeshile muaba ne muaba. Kadi ngenyi idi ilonda eyi neyikuambuluishe bua kuenza mudimu bimpe menemene ne dîba diebe bua kubenga “kututa mu lupepele.”—1 Kol. 9:26.
Kuyisha ku nzubu ne ku nzubu: Kukadi bidimu bia bungi bitu bamanyishi ne tshibidilu tshia kuyisha ku nzubu ne ku nzubu mu dinda. Kadi bu mudi bantu ba bungi baya ku mudimu mu dinda, bua tshinyi kubenga kuyisha ku nzubu ne ku nzubu nansha mu mapingaja anyi ku dilolo, dîba dikadi bantu ba bungi ku nzubu basombe bikishe? Kuyisha mu njila anyi miaba idibu bapanyina bintu munda munya kudi mua kupatula bipeta bimpe.
Kuyisha muaba udi bantu ba bungi: Nudi mua kuteka mikanda pa mêsa anyi mu tumatempu miaba idi bantu batamba kupitshila mu teritware wenu. (Bala Mudimu wetu wa Bukalenge wa 7/2013, dib. 5.) Bikala bantu ba bungi kabatshiyi bapitshila muaba uvuabu basungule bua kuyisha, Komite wa mudimu udi mua kuangata dipangadika dia ku ka mêsa au anyi kaditempu muaba mukuabu udi bantu ba bungi bapitshila.
Dipinganyina bantu ne dilombola malonga a Bible: Udiku mua kuenza programe wa kupinganyina bantu anyi kulonga nabu Bible mêba atu mishindu mikuabu ya kuyisha kayiyi itamba kuenda bimpe anyi? Tshilejilu, bikala kuyisha ku nzubu ne ku nzubu mu Disambombo mu dinda kuenda bimpe, kuenaku mua kuikala ulombola malonga ebe a Bible mu mapingaja peshi dilolo anyi? Panukadi nupinganyina bantu, nudi nansha mua kulongolola bua kuya kutangila balongi benu ba Bible badi basombele mu kartshie kamue mu mêba kampanda bua numone mua kuyisha bikole.
Nansha mudibi ne: tudi tubala mêba patudi tutuadija kuyisha, disanka dietu didi divula patudi tupatula bipeta bimpe. Wewe mumone ne: mushindu kampanda wa kuyisha kawena wenda bimpe ku mêba kansanga, utete mushindu mukuabu. Lomba Yehowa, “Mfumu wa dinowa,” bua akulombole bua wenze mudimu bimpe menemene ne dîba diebe paudi uyisha.—Mat. 9:38.