Mfidilu mulenga wa mvese

BIBLE ke nshindamenu wa malu onso atubu balongesha mu bisangilu bietu. Bible utu kabidi nshindamenu wa malu onso atutu tuyisha bantu. Kadi bua Bible kutuambuluisha bimpe, bidi bikengela kufila mvese bilenga.

Kutela mvese ne kulomba muntu bua kumubala pende ki nkujikija muanda to. Paudi ufila mvese, uditatshishe bua kukumbaja bipatshila bibidi ebi: (1) Kujula bantu mioyo kuulu, ne (2) kukoka lungenyi lua bantu ku kafidila ka mvese. Kudi mishindu ya bungi yudi mua kukumbaja bipatshila ebi.

Ela nkonko. Eu mmushindu muimpe nangananga padi bantu kabayi bamanye diandamuna to. Udienzeje bua kuela lukonko mu mushindu udi welesha bantu meji. Ke muakenza Yezu. Pakamuteta Bafalese mu ntempelo bua kumanya ni uvua mumanye Mifundu bimpe, Yezu wakabebeja ne: ‘Nudi nuamba munda muenu ne: Kristo udi nganyi? Yeye udi muana wa nganyi?’ Bakamuambila ne: “Yeye udi muana wa Davidi.” Ke Yezu e kubakonka ne: ‘Davidi udi umubikila mu nyuma muimpe ne: Mukalenge munyi?’ Yeye kubanga kubatelela Musambu wa 110:1. Bafalese e kushala vii. Kadi bantu bakuabu kutelejabu buobu Yezu ne disanka dia bungi ku muoyo.​—Mat. 22:41-46.

Mona nkonko yudi mua kutuadija nayi mu buambi: “Meme ne wewe tudi ne mêna etu. Kadi Nzambi utu pende ne dîna anyi? Diandamuna didi mu Musambu wa 83:18.” “Dimue dituku nekuikale mbulamatadi umu’epele pa buloba bujima anyi? Tangila mudi Danyele 2:44 wandamuna.” “Bible udi wakula bua malu adi enzeka pa buloba lelu anyi? Fuanyikijabi malu adi mu 2 Timote 3:1-5 ne adi enzeka lelu’eu.” “Udi wela meji bishi, lufu ne makenga nebijike dimue dituku anyi? Bible udi ufila diandamuna mu Buakabuluibua 21:4, 5.”

Nkonko miela ne lungenyi luonso kumpala kua kubala mvese (paudi wenza muyuki) idi mua kupesha bantu disanka dia kubala nansha mvese ikadibu bamanye. Bidi mua kuenzeka nanku anyi? Eyowa, nkonko ayi yoyi mibatuile, mvese neyibasankishe. Nansha tshiena-bualu tshiotshi tshikale tshimpe, lungenyi luabu ludi mua kuya kua tshianana biwababadila mvese itubu babalabala. Nenku bua kuepuka buteyi ebu, bidi bikengela kuela meji kuelelamu bua kulengeja muyuki webe.

Jula bualu kampanda. Udi mua kujula tshilumbu kampanda, pashishe kufila mvese udi utshikosa. Kufikishi bateleji ku ditekemena malu a bungi mapite pa apetabu to. Misangu mivule, mvese umue katu uleja mishindu yonso ya kujikija tshilumbu to. Kadi udi mua kulomba bantu bua kuela meji bua kumona (paudi wenda ubala) mudi mvese ubalombola bua kupita ne tshilumbu atshi.

Bia muomumue kabidi, udi mua kutela dîyi dinene kampanda pa ngikadilu mulenga ne pashishe kuangata bualu kansanga bua mu Bible budi buleja mudi kuditumikila kuikale njila wa meji. Bikala mvese ne malu abidi peshi a bungi adi atangila tshiena-bualu, bamue bangamba-malu batu balomba bateleji bua kutabalela malu aa. Bikala tshilumbu tshiudi mujule tshikale tshipite bamue ba ku bateleji mutu, udi mua kufila mishindu mivule ya kutshijikija ne kulua mpindieu kulekela mvese ne diumvuija diende bileja mushindu muakane wa kutshijikija.

Kutela Bible bu mukanda munene. Biwikala mumane kujula bantu nyota pa bualu ne mumane kufila mmuenenu umue anyi ibidi pa bualu ebu, kumpala kua kufila mvese, udi mua kuamba patupu ne: “Tangilayi tshidi Dîyi dia Nzambi diamba pa bualu ebu.” Kuenza nenku kudi kuleja ne: malu audi usua kubala ki ng’a bilele to.

Yehowa wakakuata mudimu ne bantu bu mudi Luka, Paulo, Petelo ne Yone bua kufunda bimue bitupa bia Bible. Kadi Yehowa ke Muena Bible; buobu bavua amu bafundi tshianana. Nangananga patudi tuyikila ne bantu badi kabayi balongi ba Mifundu Misantu, kubambila kumpala kua kufila mvese ne: “Nzambi udi wamba ne,” nkuimpe kupita kuamba ne: “Petelo wakafunda ne,” peshi ne: “Paulo wakamba ne.” Ki ntshianana pavua Yehowa muambile Yelemiya bua kuanji kuamba imue misangu ne: ‘Umvuayi dîyi dia Yehowa’ kumpala kua kuamba mêyi a Yehowa to. (Yel. 7:2; 17:20; 19:3; 22:2) Nansha tuamba ne: Nzambi mmuambe, anyi Petelo mmuambe, tumanye ne: kumpala kua kukomesha muyuki wetu, mbimpe tuleje ne: malu adi mu Bible ng’a Nzambi.

Tangila mvese idi pabuipi. Wikale mumanye bimpe tshidi mvese idi pabuipi yamba kumpala kua kufila mvese kampanda. Imue misangu udi mene anu mua kuleja tshidi mvese mikuabu eyi yamba. Kadi mvese eyi idi mua kuikala ne mushinga pa biudi wamba mu imue mishindu. Tshilejilu, paudi usua kutela mêyi a Yobo (muntu uvua utshina Nzambi) anyi a umue wa ku bantu bavua balue kumusamba bia mafi, newakule mushindu umue anyi? Wavuluka ne: Luka ke uvua mufunde mukanda wa Bienzedi, kadi udi utela mêyi mamba kudi bantu bu mudi: Yakobo, Petelo, Paulo, Filipo, Stefano, banjelo, ne kabidi Gamaliele ne bena Yuda bakuabu bavua kabayi bena Kristo. Nnganyi udi muambe mêyi adi mu mvese uudi utela? Wavuluka kabidi ne: Davidi ki ng’utu mufunde mukanda wa Misambu wonso to, ne Solomo ki ng’utu mufunde mukanda wa Nsumuinu mujima to. Mbimpe kumanya kabidi muntu udibu bambila malu ne kumanya tshiena-bualu tshinene tshidi muaba au.

Kuata mudimu ne malu a nshindamenu. Malu a nshindamenu atu ne mushinga nangananga padi malu avua enzeka mu tshikondo tshivuabu bafunde mvese mikale mafuanangane ne anudi nuyikila. Malu a nshindamenu atu ne mushinga imue misangu bua kumvua mikuabu mvese. Tshilejilu, paudi utela Ebelu 9:12, 24 bua kuakula bua tshintu tshia kupikulangana natshi, udi mua kuanji kumvuija mu tshikoso mushindu uvua tshibambalu tshia mutambe busantu tshia mu tabernakle kumpala kua kubala mvese (mvese eu udi uleja ne: tshibambalu etshi tshivua tshimfuanyi tshia muaba uvua Yezu ne bua kubuela dîba divuaye ne bua kuya mu diulu). Tshibi wamanya: malu a nshindamenu wowu mapite bungi, mvese kakumvuika bimpe to.

Paudi musue kumanya mua kufila mvese bimpe, utentekele bantu bakadi bapiluke mu dienza dia miyuki. Utangile mishindu mishilangane idibu benza. Ukonkonone bulenga bua ngenzelu eyi. Mpindieu paudi pebe ulongolola miyuki, ukebe mvese minene, ukebe mushinga wa mvese yonso eyi ne lubatshi luonso. Keba mbuelelu bua mvese yonso ne muoyo mujima bua kuenzaye mudimu wende biakane. Mu bungi bua matuku, wenze kabidi bia muomumue ne mvese mikuabu yudi wenza nayi mudimu. Wewe mumanye kufila mvese bilenga, newikale ukoka ntema ya bantu bikole ku Dîyi dia Nzambi.