Tudifilayi bikole bua kuvuija bantu bayidi
1. Bua bantu kusungidibuabu, bidi bikengela tshinyi?
1 Luapolo lua mudimu lua 2014 ludi luleja mudi bantu ba Nzambi ne tshisumi ne badisuike bua kuyisha lumu luimpe lua Bukalenge. (Mat. 24:14) Ku diambuluisha dia mudimu wetu wa ku nzubu ne ku nzubu, wa kampanye ka diabanya trakte ne mabeji a dibikilangana, ne wa kuyisha muaba udi bantu ba bungi, tudi tuyisha bantu ba bungi mukenji wa mu Bible kupita kumpala. Kadi bua bantu kusungidibuabu, tudi ne bua kulonga nabu Bible bua kubambuluisha bua balue bayidi ba Yezu.—1 Tim. 2:4.
2. Nnkonko kayi itudi ne bua kudiela idi mua kutuambuluisha bua kutuadija kulonga Bible ne bantu?
2 Tuadija kulonga Bible ne bantu: Padi muntu uleja dianyisha, utuku udienzeja bua kumanya malu adi mua kukuambuluisha bua kupetangana nende ne utuku uya kumutangila ne lukasa luonso bua kutuadija kulonga nende Bible anyi? Kukadi matuku bungi kayi auvua muleje muntu unuvua bapetangane nende musangu wa kumpala mutu dilonga dia Bible dienzeka? Mmusangu kayi wa ndekelu uuvua mulombe muntu uutu ushila bibejibeji bua kulonga nende Bible? Ukadiku muleje bena mudimu nebe, balongi benu, bena mutumba nebe, balela bebe anyi bamanyangana nabu filme wa Bua tshinyi kulonga Bible? ne wa Mmushindu kayi utu dilonga dia Bible dienzeka? anyi? Pautu uyisha ne kantu katutu tutekela mikanda, utuku udienzeja bua kuambila bantu badi bangata mikanda ne: tutu kabidi tulonga Bible ne bantu kabayi bafuta makuta anyi?
3. Ntshinyi tshitudi ne bua kuenza bua kulongesha bantu bulelela bimpe?
3 Yehowa ne Yezu badi batuambuluisha: Pavua Yezu mutume dîyi dia ‘kuvuija bantu bayidi,’ wakatuadija ne: “ndayi” bua kuleja ne: tudi ne bua kudienzeja bikole ne kuenza malu kampanda. Nansha nanku kena mutulekele nkayetu to, mmulaye bua kuikala netu. (Mat. 28:19, 20) Yehowa mmutupeshe kabidi nyuma wende muimpe, udi kabidi utulongesha ne mmutupeshe biakulongesha nabi bitudi nabi dijinga bua kulongesha bantu bulelela. (Zek. 4:6; 2 Kol. 4:7) Tudi mua kusambila Yehowa bua atupeshe “dijinga ne bukole” bua tuenze mudimu wa mushinga mukole eu.—Filip. 2:13.
4. Bua tshinyi tudi ne bua kudifila bikole bua kuvuija bantu bayidi?
4 Kuyisha lumu luimpe kudi kutupesha disanka dia bungi. Kadi disanka dietu didi dipita patudi tulongesha muntu bulelela ne tumuambuluisha bua kubuela netu mu “njila udi ufikisha ku muoyo.” (Mat. 7:14; 1 Tes. 2:19, 20) Bualu bukuabu bua mushinga wa bungi, budi ne: patudi tudifila bikole bua kuvuija bantu bayidi, tudi tusankisha Yehowa udi kayi musue ‘bua muntu nansha umue abutudibue, kadi mmusue bua bonso bafike ku dikudimuna mutshima.’—2 Pet. 3:9.