Mushindu muimpe udibu benze trakte mipiamipia!
1. Ntshinyi tshidibu batupatuile tshipiatshipia bua mudimu wa buambi?
1 Mu mpungilu wa distrike wa 2013 uvua ne tshiena-bualu tshia ne: ‘Dîyi dia Nzambi mbulelela,’ bavua bapatule trakte itanu mipiamipia. Pashishe bavua balue kusakidila ku trakte eyi trakte mukuabu Ngungu ya Bukalenge No. 38, udi ne tshiena-bualu tshia ne: “Bafue badi bulelela mua kulua ne muoyo kabidi anyi?” Trakte yonso isambombo eyi mmienza mu mushindu muimpe mupiamupia. Bua tshinyi mbenze trakte eyi mu mushindu mupiamupia eu? Mmunyi mutudi mua kuenza nayi mudimu patudi tuyifila ku nzubu ne ku nzubu?
2. Trakte mipiamipia eyi idi ne tshipatshila kayi?
2 Bua tshinyi mushindu mupiamupia wa trakte eyi?: Mushindu muimpe wa kutuadija kuyukila ne muntu patudi tuyisha ku nzubu ne ku nzubu utu misangu ya bungi ne bitupa binayi ebi: 1) Kuela muntu lukonko ludi lumusaka bua aleje wende mmuenenu kumpala kua kuyukila nende. 2) Kubala nende mvese. 3) Kumupesha mukanda wa yeye kubala. 4) Kujula lukonko lua kulua kuandamuna musangu udi ulonda ne kumvuangana nende bua kulua kumutangila. Trakte mipiamipia eyi idi ituambuluisha bua kulonda bipepele bitupa bionso binayi ebi.
3. Mmunyi mutudi mua kufila trakte mipiamipia eyi mu buambi?
3 Mua kuenza nayi mudimu: 1) Wewe mumane kuela muntu muoyo, muleje lukonko ludi pa mutu pa trakte ludi lumufikisha ku disungula diandamuna ne mulombe bua aleje wende mmuenenu. 2) Bulula trakte, ne konkonona nende katshiena-bualu ka ne: “Tshidi Bible wamba.” Koku mushindu, bala nende mvese udi muaba au mu Bible webe. Muntu yeye ne dîba, yukila nende pa katshiena-bualu ka ne: “Mudi mvese eu ukuambuluisha.” 3) Mupesha trakte ne umulombe bua ashale kubala malu makuabu adimu. 4) Kumpala kua kumbuka, muleje lukonko ludi panyima pa trakte muinshi mua katshiena-bualu ka ne: “Lukonko lukuabu” ne umvuanganayi nende bua kulua kuyukila bua diandamuna didi Bible ufila bua lukonko elu musangu udi ulonda.
4. Mmunyi mutudi mua kuenza mudimu ne trakte mipiamipia patudi tupinganyina muntu?
4 Mbipepele kabidi bua kuenza nende mudimu patudi tupinganyina muntu. Udi mua kuenza mudimu ne mvese idibu bafile panyima pa trakte bua kuandamuna lukonko luuvua mujule ku ndekelu kua diyukidilangana dienu dia musangu mushale. Kumpala kua kushiyangana ne muntu, muleje tshimfuanyi tshia broshire wa Lumu luimpe, muleje broshire, ne bulula mu dilongesha didi ne malu a bungi a tshiena-bualu tshinudi nuakuila, pashishe umupeshe broshire eu. Yeye muitabe, umvuanganayi nende bua kulua kuyukila malu adi mu broshire eu musangu udi ulonda. Udi mua kutuadija nende dilonga dia Bible anyi pamutu pa kumupesha broshire eu, udi mua kumupesha trakte mukuabu ne kumvuangana nende bua kulua kuyukila malu adimu.
5. Trakte idi ne mushinga kayi mu mudimu wetu wa buambi?
5 Tudi bayishe ne trakte kukadi bidimu bipite pa 130. Nansha mudiyi mishilangane ku nimero ne bunene buayi, idi yambuluisha bikole bua kuyisha nayi. Tudi mua kuenza mudimu bimpe ne trakte mipiamipia eyi bua kumuangalaja dimanya dia mu Bible pa buloba bujima.—Nsu. 15:7a.