Longesha ne bimue bitupa bia mukanda wa Bible ulongesha bimpe

Padi mulongi wa Bible ulonga tshidi Bible ulongesha menemene ne utumikila malu adiye ulonga, neakole mu nyuma ne neakuame mamuma. (Mus. 1:1-3) Tudi mua kumuambuluisha bua kuya kumpala patudi tumulongesha ne bimue bitupa bia mukanda wa Bible ulongesha bimpe.

Nkonko idi ku ntuadijilu: Ku ntuadijilu kua nshapita yonso kudi nkonko idibu bandamuna mu dilonga. Udi mua kuela nkonko ayi kuyi ukeba bua mulongi kuyandamunayi to, uyela anu bua kumujula nyota bua malu anualonga. Anyi, udi mua kumulomba bua kuandamuna lukonko luonso mu mêyi makese patupu. Yeye mufile diandamuna dibi, kujingi bua kudiakaja to. Mandamuna ende neakuambuluishe bua kumanya ni kudi miaba iudi mua kuimanyina bikole.​—Nsu. 16:23; 18:13.

Tshisakidila: Bikala mulongi mumvue ne muitabe tshidibu bambe mu nshapita unudi nulonga, udi mua kumuambila bua kudibadilaye tshisakidila tshidi tshipetangana ne nshapita au. Mu dilonga dialonda, udi mua kuangata minite mikese bua kumanya ni mutshiumvue. Kadi wewe mumone ne: bidi mua kuambuluisha mulongi, udi mua kukeba dîba panudi nulonga bua kuyukidilangana nende malu adi mu tshisakidila, nuenda nubala bikoso ne wela nkonko iukavua mudianjile kulongolola.

Kazubu ka diambulula: Kazubu kadi ku ndekelu kua nshapita yonso kadi ne malu adi andamuna nkonko ya ku ntuadijilu kua nshapita. Nudi mua kubala malu adi mu kazubu aku bua kujadika bikala mulongi mumvue malu manene a mu nshapita au ne neudi mua kuumvuija. Balayi ne dîyi dikole tshiambilu tshionso tshidimu ne mvese udibu bafunde. Pashishe ambila mulongi bua umvuije mudi mvese au ujadika tshidibu bambe mu tshiambilu atshi.​—Bien. 17:2, 3.