Yehowa udi wanyisha bikole mudimu webe muenza ne anyima mujima

“Tshionso tshinudi nuenza, nutshienze ne anyima mujima bu bua Yehowa, kabiyi bua bantu.”​—KOLOSAI 3:23, NW.

1, 2. (a) Ndisanka kayi ditambe bunene ditudi mua kupeta? (b) Bua tshinyi imue misangu tudi mua kupanga kuenza bionso bitudi tujinga mua kuenza mu mudimu wa Nzambi?

KUSADILA Yehowa ndisanka ditambe bunene ditudi mua kupeta. Ne kabingila kimpe, tshibejibeji etshi ntshikankamije bena nkristo mutantshi mule bua buobu kudifila mu mudimu eu, pa ‘kutamba’ kusadila mene padiku mushindu. (1 Tesalonike 4:1) Kadi, misangu yonso katutu tuenza tshionso tshidi mutshima wetu ujinga bikole bua kuenza bua kusadila Nzambi. Muanetu mukuabu wa bakaji mujike uvua mutambule kukadi bidimu bitue ku 40 udi wamba ne: “Nsombelu wanyi udi ukengela bua meme kuenza mudimu ku dîba ne ku dîba. Kenzela kanyi ka mudimu eu ki nka kupeta bilamba bia nsongo ne bia mushinga, anyi kuenza ngendu mile ya dikisha mu mazuwa a mâyi, kadi nka kupeta bindi nkengela, bu mudi mfranga ya luondapu ne ya mênu. Ndi ngumvua anu bu se: ndi mpesha Yehowa bia pa mutu.”

² Dinanga bua Nzambi didi ditusaka bua kujinga mua kutamba kuenza bia bungi mu mudimu wa diyisha. Kadi malu a mu nsombelu wetu adi misangu mivule mua kutuelela mikalu mu bitudi mua kuenza. Ditabalela majitu makuabu a mu Mifundu, bu mudi malu atudi ne bua kuenza mu dîku, didi mua kutuangata dîba ne makanda a bungi. (1 Timote 5:4, 8) Mu “bikondo ebi bikole mua kupita nabi,” nsombelu mmutambe kuikala wa lutatu lua bungi. (2 Timote 3:1, NW) Patudi katuyi mua kuenza bitudi basue kuenza mu mudimu wetu, mutshima wetu udi mua kutulubakaja mu mushindu kampanda. Tudi mua kudiebeja bikala ntendelelu wetu usankisha Nzambi.

Bulengele bua mudimu muenza ne anyima mujima

3. Yehowa mmutekemene tshinyi kutudi tuetu bonso?

³ Mu Musambu 103:14, ne luya luonso Bible udi utushindikila ne: Yehowa ‘mmumanye buntu buetu, udi uvuluka ne: tudi dimfuenkenya.’ Kupita muntu yonso, mmumanye mikalu yetu. Kêna utulomba bivule bipite bitudi mua kufila. Ntshinyi tshidiye utekemena? Ntshintu kampanda tshidi muntu yonso mua kufila, kakuyi ditangila nsombelu wende: “Tshionso tshinudi nuenza, nutshienze ne anyima mujima bu bua Yehowa, kabiyi bua bantu.” (Kolosai 3:23, NW) Eyowa, Yehowa mmutekemene bua tumusadile​—tuetu bonso—​ne anyima wetu mujima.

4. Kusadila Yehowa ne anyima mujima kudi kumvuija tshinyi?

⁴ Kusadila Yehowa ne anyima mujima kudi kumvuija tshinyi? Muaku wa tshiena-Greke muandamuna ne: “anyima mujima” ku muaku ku muaku udi umvuija ne: “bifumine mu anyima.” “Anyima” udi uleja muntu mujima, ne makokeshi ende onso a ku mubidi ne a mu lungenyi. Nenku kusadila ne anyima mujima kudi kumvuija didifila dietu, ditumika ne makokeshi etu onso ne ditumika ne makanda etu mu mushindu mutambe bunene udiku mu mudimu wa Nzambi. Mu ngakuilu mupepele, kudi kumvuija dienza tshionso tshidi anyima wetu mua kuenza.​—Mâko 12:29, 30.

5. Mmunyi mudi tshilejilu tshia bapostolo tshileja ne: bonso kabena ne bua kuenza bia muomumue mu mudimu?

⁵ Kuenza mudimu ne anyima mujima kudi kumvuija ne: tuetu bonso tudi ne bua kuenza bia muomumue mu mudimu wetu anyi? Abi bidi mua kuikala bikole, bualu nsombelu ne makokeshi mbishilangane ku anyima ne ku anyima. Tangila bapostolo ba lulamatu ba Yezu. Kabavua bonso ne mushindu wa kuenza bia muomumue. Tshilejilu, tudi bamanye malu makese menemene adi atangila bamue ba ku bapostolo, bu mudi Simona Muena Kananayo ne Yakobo muana wa Alafayo. Pamu’apa midimu yabu bu bapostolo ivua mitambe bukese. (Matayo 10:2-4) Bishilangane, Petelo wakapeta mushindu wa kuambula majitu maneme a bungi​—eyowa, Yezu mene wakamupa “nsapi ya Bukalenge”! (Matewuse 16:19, MMM) Pabi, kabakabandisha Petelo ku mutu kua bakuabu. Pakapeta Yone tshikena-kumona tshia Yeruzaleme Mupiamupia tshidi mu Buakabuluibua (bu mu 96 B.B.), wakamona mabue 12 a tshishimikidi ne pa mutu pawu bafunde “mena dikumi ne abidi a bapostolo dikumi ne babidi.”a (Buakabuluibua 21:14) Yehowa wakangata mudimu wa bapostolo bonso ne mushinga, nansha mudibi bushuwa se: bamue bavua ne mushindu wa kuenza bivule kupita bakuabu.

6. Mu mufuanu wa Yezu wa mumiaminyi, ntshinyi tshidi tshienzekela mamiinu mamiamina pa “buloba bulenga,” ne kudi kujuka nkonko kayi?

⁶ Bia muomumue, Yehowa kêna utulomba tuetu bonso diyisha dia muomumue nansha. Yezu wakaleja bualu ebu mu mufuanu wa mumiaminyi, uvua ufuanyikija mudimu wa diyisha ne dimiamina mamiinu. Mamiinu akapona pa mishindu mishilangane ya buloba, ileja mishindu mishilangane ya ngikadilu ya mu mutshima mileja kudi aba badi bumvua mukenji. Yezu wakumvuija ne: “Bua eu udi mumiamina pa buloba bulenga, ng’eu udi umvua dîyi ne udijingulula, udi ukuama bushuwa mamuma ne upatula eu misangu lukama, wawa makumi asambombo, mukuabu makumi asatu.” (Matayo 13:3-8, 18-23, NW) Mamuma aa ntshinyi, ne bua tshinyi mmapatula mu bungi bushilangane?

7. Mmamuma kayi adi mamiinu mamiamina apatula, ne bua tshinyi mmapatula mu bungi bushilangane?

⁷ Bu mudi mamiinu adi mamiamina mikale ‘dîyi dia bukalenge,’ kukuama kua mamuma kudi kumvuija kumuangalaja kua dîyi adi, kudimanyisha bakuabu. (Matayo 13:19) Bungi bua mamuma mapatula budi bushilangana​—kubangila ku misangu makumi asatu too ne ku misangu lukama—​bualu makokeshi ne malu a mu nsombelu bidi bishilangana. Muntu udi ne mujobo ne makanda mimpe a mubidi udi mua kupitshisha mêba a bungi mu diyisha kupita eu udi ne bukole bukepesha kudi disama dia munanunanu anyi kudi bukulakaje. Nsonga utshidi mujike ne kayi ne majitu a mu dîku udi mua kuenza bivule kupita mudi eu udi ne bua kuenza mudimu wa bungi bua kupetesha dîku bididi dikengela.​—Fuanyikija ne Nsumuinu 20:29.

8. Mmunyi mudi Yehowa umona aba badi bafila biabu bitambe bulenga bidi anyima wabu mua kufila?

⁸ Bilondeshile mmuenenu wa Nzambi, muntu wa anyima mujima udi upatula mamuma misangu makumi asatu udi ne lulamatu lushadile ku lua eu udi upatula mamuma misangu lukama anyi? Nansha kakese! Bungi bua mamuma budi mua kushilangana, kadi Yehowa udi usanka padi mudimu eu mutambe bulenga, udi anyima wetu mua kuenza. Vuluka ne: bungi bushilangane bua mamuma budi bupatukila buonso mu mitshima idi mikale “buloba bulenga.” Muaku wa tshiena-Greke (ka·losʹ) muandamuna ne: “bulenga” udi umvuija tshintu kampanda tshidi “tshimpe ku mêsu” ne tshidi “tshisanguluja mutshima, ne tshipesha mêsu disanka.” Mmunyipu mudibi bia busambi pa kumanya ne: patudi tuenza muetu muonso, mutshima wetu mmulengele ku mêsu kua Nzambi!

Katuena bafuanyikija umue ne mukuabu

9, 10. (a) Mutshima wetu udi mua kutufikisha ku diela meji mabi a mushindu kayi? (b) Mmunyi mudi mufuanu wa mu 1 Kolinto 12:14-26 uleja ne: Yehowa kêna utufuanyikija ne bakuabu mu bitudi tuenza?

⁹ Nansha nanku, mutshima wetu mupange bupuangane udi mua kumona malu mu munga mushindu. Udi mua kufuanyikija mudimu wetu ne wa bakuabu. Udi mua kuelangana meji ne: ‘Bakuabu badi benza bivule mu mudimu kumpita meme. Mmunyi mudi mudimu wanyi mua kusankishaku Yehowa?’​—Fuanyikija ne 1 Yone 3:19, 20.

¹⁰ Meji a Yehowa ne njila yende mbitumbuke bikole kupita meji ne njila yetu. (Yeshaya 55:9) Tudi tupeta ndambu wa busunguluji mu mushindu udi Yehowa wangata madikolela etu a muntu ne muntu mu 1 Kolinto 12:14-26, mudi tshisumbu tshifuanyikija ne mubidi udi ne bitupa bivule​—mêsu, bianza, makasa, matshi, ne bikuabu. Anji tangila katantshi mubidi muena dîna. Mbia tuseku bua kufuanyikija mêsu ebe ne bianza, anyi makasa ebe ne matshi! Tshitupa tshionso tshidi ne watshi mudimu, kadi bitupa bionso bidi ne dikuatshisha ne bidi ne mushinga. Bia muomumue, Yehowa udi wanyisha bikole mudimu webe muenza ne anyima mujima nansha bikala bakuabu benza bivule anyi bikese.​—Galatia 6:4.

11, 12. (a) Bua tshinyi bamue badi mua kuela meji ne: ‘mbatambe butekete’ anyi ‘kabena batambe butumbi’? (b) Mmunyi mudi Yehowa wangata mudimu wetu?

¹¹ Bua mikalu mituelela kudi masama, bukulakaje, anyi nsombelu mikuabu, imue misangu bamue ba kutudi badi mua kuela meji ne: tudi ‘batambe butekete’ anyi ‘katuena batambe butumbi.’ Kadi au ki mmushindu udi Yehowa umona malu nansha. Bible udi utuambila ne: ‘Bitupa bia mubidi bidi bimueneka bu bitupa bitamba butekete bidi ne bualu bukole; ne bitupa . . . bitudi tuela meji ne: kabiena bitamba butumbi, tudi tuluatshisha biobio ne butumbi butamba bunene . . . Kadi Nzambi wakasangakaja bitupa bia mubidi, wakapesha butumbi butamba bunene kudi tshitupa tshiakadi katshiyi nabu.’ (1 Kolinto 12:22-24) Nenku muntu yonso udi mua kuikala ne mushinga kudi Yehowa. Udi wangata mudimu wetu ne mushinga mukole bilondeshile bualabale bua mikalu yetu. Mutshima webe kawenaku ukusaka bua kujinga mua kuenza tshionso tshiudi mua kuenza bua kusadila Nzambi mumvuidianganyi ne muena dinanga wa nunku anyi?

¹² Nenku, tshidi ne mushinga kudi Yehowa, ki ntshia se: udi wenza bia bungi bu mudi muntu mukuabu wenza, kadi ntshia se: udi wenza tshiudi wewe nkayebe​—anyima webe—​mua kuenza. Muanda wa se: Yehowa udi wangata ne mushinga madikolela etu muntu ku muntu uvua muleja mu mushindu udi utamba kulenga ku muoyo mu malu a Yezu ne bakaji babidi bashilangane bikole, mu matuku a ndekelu a muoyo wende pa buloba.

Dipa dia “mushinga mutambe bukole” dia mukaji muena dianyisha

13. (a) Mmu nsombelu kayi muvua Mariya muele Yezu mafuta a dipembu pa mutu ne ku makasa? (b) Mafuta a Mariya avua a mushinga kayi?

¹³ Mu Ditanu dia 8 Nizan, ku dilolo, Yezu wakafika ku Betaniya, musoko mukese udi mu tshibadi tshia ku Est kua Mukuna wa Olive, mutantshi wa kilometre bu isatu ne Yeruzaleme. Yezu uvua ne balunda basuibue mu tshimenga etshi​—Mariya, Marta, ne Lazare muanabu wa balume. Bakavua bakidile Yezu mu nzubu muabu, pamu’apa misangu mivule. Kadi mu Disambombo dilolo, Yezu ne balunda bende bavua badia kua Simone, muena nsudi wa kale, pamu’apa Yezu ukavua mumuondape. Pakavua Yezu musombe ku mêsa udia, Mariya wakenza bualu kampanda bua bupuekele buakaleja dinanga diende diondoke bua muntu uvua mubiishe muanabu ku lufu. Wakakangula kalondo kavua ne mafuta a dipembu, “a mushinga mutambe bukole.” A mushinga mukole bushuwa! Avua a ndenalio 300, mushinga muakanangane ne difutu dia mudimu wa tshidimu bu tshijima. Wakapongoluela Yezu mafuta aa a muenyi muimpe pa mutu ne ku makasa. Kumukupulaye mene makasa ne nsuki yende.​—Mâko 14:3; Luka 10:38-42; Yone 11:38-44; 12:1-3.

14. (a) Ntshinyi tshiakenza bayidi bua tshienzedi etshi tshia Mariya? (b) Mmunyi muvua Yezu muakuile Mariya?

¹⁴ Bayidi bakanyingalala! “Bua tshinyi kunyanga manananshi mushindu ewu?” ke muakakonkabu. Yudase, muikale usokoka muoyo wende wa buivi mu difila lungenyi lua luse bua bakengi, wakamba ne: “Bavua mua kuapanyisha ku mpalata [ndenalio] nkama isatu bua kuyipesha bapele.” Mariya wakashala mupuwe. Kadi Yezu wakambila bayidi ne: “Mulekelayi, nudi numutatshisha bua tshinyi? Udi mungenzele bualu bulenga [mushindu wa ka·losʹ]. . . . mMuenze muende muvuaye mua kuenza: mmudianjile kulaba mubidi wanyi manananshi bua kuujika. Bulelela ndi nnuambila ne: miaba yonso ikalabo balongesha Mukenji Mulenga, mu buloba bujima, nebalondelangane mudiye muenze emu bua kumuvuluka.” Mmunyipu muvua musangelu wa mêyi a Yezu ne bua kuikala mupoleshe mutshima wa Mariya!​—Markuse 14:4-9, MMM; Yone 12:4-8.

15. Bua tshinyi Yezu uvua mulengibue bikole ku muoyo bua tshivua Mariya muenze, ne pa nanku ntshinyi tshitudi tulonga pa bidi bitangila mudimu muenza ne anyima mujima?

¹⁵ Bualu ebu buenza kudi Mariya buakalenga bikole Yezu ku muoyo. Ku diende dimona, Mariya uvua muenze bualu bua kutumbisha. Ki mmushinga wa ku mubidi wa dipa edi uvua ne bualu kudi Yezu, kadi mmuanda wa se: uvua “muenze muende muvuaye mua kuenza.” Wakalamatshila pa mpunga au ne kufilaye tshivuaye mua kufila. Nkudimuinu mikuabu mmiandamune miaku eyi ne: “Mmuenze tshionso tshivuaye mua kuenza,” anyi ne: “Yeye wakuenza muende muakadiye namu.” (An American Translation; Muanda Mulenga Lelu) Difila dia Mariya divua dia anyima mujima bualu wakafila biende bitambe buimpe. Atshi ke tshionso tshidi mudimu muenza ne anyima mujima umvuija.

“Tukuta tubidi” tua mukaji mukamba

16. (a) Mmunyi muakafika Yezu ku dimona difila dia mukaji mukamba? (b) Tukuta tua mukaji mukamba eu tuvua tua mushinga kayi?

¹⁶ Matuku abidi pashishe, mu dia 11 Nizan, Yezu wakanenga bikole mu ntempelo, muakelabu mpata pa bukokeshi buende, ne muakafilaye mandamuna kaayi malongolola ku nkonko mikole ivua itangila bitadi, dibiishibua ne malu makuabu. Wakela baskribe ne Bafarizeyi patoke bua malu bu mudi ‘dinyenga nzubu ya bakaji ba mu lufuila.’ (Mâko 12:40) Pashishe Yezu kusomba, mbimueneke se: bivua mu Lubanza lua Bakaji muvua tushete 13 tua tshibutshilu, bilondeshile tshilele tshia bena Yuda. Wakasombamu mutantshi, mutangile ne lubatshi luonso muvua bantu bela mapa abu mu tushete. Babanji bavule bakalua, bamue bikale pamu’apa ne tshimuenekelu tshia buakane buabu nkayabu, ne didileja mene. (Fuanyikija ne Matayo 6:2.) Mêsu a Yezu akatuishila pa mukaji mukuabu wa pa buende. Mêsu a muntu yonso eu kaavua mua kuikala mamone bualu nansha bumue bua dikema buvua butangila mukaji eu anyi dipa diende. Kadi Yezu, uvua mua kumanya mitshima ya bakuabu, wakamanya ne: yeye eu uvua ‘mukaji mupele wa mu lufuila.’ Wakamanya kabidi bungi bujalame bua dipa diende​—“tukuta tubidi, [“tudi ne mushinga mukese mutambe,” NW].”b​—Mâko 12:41, 42.

17. Mmunyi muvua Yezu mutshinke difila dia mukaji mukamba eu, ne pa nanku ntshinyi tshitudi tulonga pa bidi bitangila dipesha Nzambi?

¹⁷ Yezu wakabikila bayidi bende, bualu uvua musue bua buobu kudimuenena ne abu abidi dilongesha dikavuaye pa kufila. Wakamba ne: ‘Bintu biakuela mukaji eu . . . bidi bitambe bidi bakuabu bonso bela mu tshibutshilu.’ Ku diende dimona, mukaji eu uvua muele bia bungi kupita bia bakuabu bonso bisambakaja. Uvua muele “bintu biakadiye n’abi bualu”​—dieya diende dia ndekelu. Mu dienza nunku, wakaditeka mu bianza bitabaledi bia Yehowa. Nenku, muntu uvua musunguluja bu tshilejilu tshia difila kudi Nzambi ng’eu muena dipa divua kadiyi mene ne mushinga wa nsongo. Kadi ku mêsu kua Nzambi, divua ne mushinga kauyi kukonka!​—Mâko 12:43, 44; Yakobo 1:27.

Longelayi ku mmuenenu wa Yehowa bua mudimu muenza ne anyima mujima

18. Ntshinyi tshitudi tulongela ku mushindu uvua Yezu ne bakaji abu babidi?

¹⁸ Ku mushindu uvua Yezu wangata bakaji aba babidi, tudi tupeta malongesha adi asanguluja mutshima pa mushindu udi Yehowa umona mudimu muenza ne anyima mujima. (Yone 5:19) Yezu kakafuanyikija mukaji mukamba eu ne Mariya nansha. Kakangata tukuta tubidi tua mukaji mukamba ne mushinga mushadile ku mafuta a Mariya “a mushinga mutambe bukole.” Bu muvua mukaji yonso mufile biende bionso bitambe buimpe, ku mêsu kua Nzambi mapa abu avua onso ne mushinga. Nenku bikala nyanji ya dipanga mushinga ibanda munda muebe bualu kuena mua kuenza bionso biudi ujinga mua kuenza bua kusadila Nzambi, kuteketshi to. Yehowa udi usanka bua kuitaba tshiebe tshitambe buimpe tshiudi mua kufila. Vuluka ne: Yehowa “udi utangila mu mutshima,” nenku mmumanye tshishiki majinga makole a mu mutshima webe.​—1 Samuele 16:7.

19. Bua tshinyi katuena ne bua kutuila bakuabu mushinga ku bidibu benza mu mudimu wa Nzambi?

¹⁹ Mmuenenu wa Yehowa bua mudimu muenza ne anyima mujima udi ne bua kuikala ne buenzeji pa mushindu utudi tudimona ne tuenzelangana malu. Ndipanga dinanga bushuwa pa kujana madikolela a bakuabu anyi pa kufuanyikija mudimu wa munga muntu ne wa mukuabu! Mbia dibungama, kadi muena nkristo mukuabu wakafunda ne: “Imue misangu bamue batu basua kuleja ne: udi ne bua kuikala mpanda-njila, tshianana kuena ne mushinga. Aba ba kutudi badi baluijakana bua kutungunuka ‘anu’ bu bamanyishi ba Bukalenge ba pa tshibidilu badi ne dijinga dia kudiumvua pabu bangatshibue ne mushinga.” Tuvulukayi ne: katuena ne bukenji bua kuangata dipangadika dia tshidi tshikale mudimu muenza ne anyima mujima bua muena nkristo netu. (Lomo 14:10-12) Yehowa udi wanyisha bikole mudimu muenza ne anyima mujima wa yonso wa ku miliyo ya bamanyishi ba Bukalenge ba lulamatu, ne ke mutudi petu ne bua kuenza.

20. Pa tshibidilu, mbitambe buimpe bua kuitaba tshinyi pa bidi bitangila batendeledi netu?

²⁰ Kadi, netuambe tshinyi pikala bamue bamueneka bikale benza bikese bishadile ku bidibu mua kuenza mu mudimu wetu? Dikepela dia mudimu wa muena kuitabuja netu didi mua kuleja bakulu badi ne ditabalela ne: bidi bikengela kufila diambuluisha anyi dikankamija. Pine apu, katuena ne bua kupua muoyo bua se: mudimu muenza ne anyima mujima bua bamue udi mua kufuanangana bikole ne tukuta tua mukaji mukamba, kadi kauyi bu mafuta a mushinga mukole a Mariya. Pa tshibidilu bitu bitambe buimpe bua kuitaba ne: bana betu ba balume ne ba bakaji mbanange Yehowa, ne se: dinanga dia nunku’eu nedibasake ku dienza bivule bidibu mua kuenza​—ki mbikese nansha. Bushuwa kakuena musadidi wa Yehowa nansha umue udi mumanye tshidiye wikala mua kusungula bua kuenza bikese bishadile ku bidiye mua kuenza mu mudimu wa Nzambi!​—1 Kolinto 13:4, 7.

21. Mmudimu kayi wa difutu udi bavule bipatshila, ne kudi kujuka nkonko kayi?

²¹ Nansha nanku, bua bavule ba ku bantu ba Nzambi, mudimu muenza ne anyima mujima mmumvuije dipatshila mudimu udi ne difutu dinene menemene​—mudimu wa bumpanda-njila. Mmabenesha kayi adibu bapeta? Ne tshituamba ntshinyi bua aba ba kutudi badi kabayi banji kupeta mushindu wa kuenza bumpanda-njila​—mmunyi mutudi mua kuleja lungenyi lua bumpanda-njila? Nkonko eyi neyipete mandamuna mu tshiena-bualu tshidi tshilonda.

[Mêyi adi kuinshi]

Mmunyi muwandamuna?

◻ Kusadila Yehowa ne anyima mujima kudi kumvuija tshinyi?

◻ Mmunyi mudi mufuanu wa mu 1 Kolinto 12:14-26 uleja ne: Yehowa kêna utufuanyikija ne bakuabu?

◻ Pa bidi bitangila difila dienza ne anyima mujima, ntshinyi tshitudi tulongela ku mumvuija a Yezu bua mafuta a mushinga mukole a Mariya ne bua tukuta tubidi tua mukaji mukamba?

◻ Mmunyi mudi mmuenenu wa Yehowa pa mudimu muenza ne anyima mujima ne bua kuikala ne buenzeji pa mushindu utudi tudimona bamue ne bakuabu?

[Tshimfuanyi mu dibeji 15]

Mariya wakafila biende bitambe buimpe, pa kulaba mubidi wa Yezu mafuta a dipembu “a mushinga mutambe bukole”

[Tshimfuanyi mu dibeji 16]

Tukuta tua mukaji mukamba​—tuvua mene katuyi ne mushinga wa nsongo, kadi tuvua ne mushinga kauyi kukonka ku mêsu kua Yehowa