Mabenesha a mudimu wa bumpanda-njila
“Dibenesha dia kudi Yehowa—ke didi divuija [muntu] mubanji, ne kêna usakidilaku kanyinganyinga.”—NSUMUINU 10:22, NW.
1, 2. (a) Mmunyi muakumvuija mpanda-njila kampanda nyanji yende bua mudimu wa ku dîba ne ku dîba? (b) Bua tshinyi bampanda-njila batu ne mushindu wa kupeta tshishiki masanka a dienza bantu bayidi?
“KUDIKU mua kuikala disanka dinene kupita dia kumona muntu uudi ulonga nende ulua musamunyi muzanzamuke wa Yehowa anyi? Bidi bisankisha ne bikolesha ditabuja pa kumona mudi Dîyi dia Nzambi dikale ne bukole mu disonsola bantu bua kuenza mashintuluka mu nsombelu yabu bua kusankisha Yehowa.” Ke muakafunda mpanda-njila kampanda wa ku Canada, udi muikale mu mudimu wa ku dîba ne ku dîba bidimu bipite pa 32. Bua mudimu wende wa bumpanda-njila, udi wamba ne: “Tshienaku ndimona muikale ngenza tshinga tshintu. Bushuwa tshiena mmona tshintu tshikuabu tshidi mua kufila disanka dia muomumue.”
2 Udi witaba ne: kudi disanka dinene pa kudifila mu diambuluisha muntu kampanda bua kubuela mu njila wa muoyo anyi? Bushuwa, ki ng’anu bampanda-njila nkayabu batu bapeta disanka dia nunku to. Basadidi bonso ba Yehowa mbapesha mudimu wa ‘kuvuija bantu bayidi’ ne badi badienzeja bua kukumbaja muanda eu. (Matayo 28:19) Kadi, bu mudi bampanda-njila bikale bapitshisha mêba a bungi mu mudimu wa budimi, batu ne mushindu wa kupeta masanka mapite bungi mu dienza bayidi. Kadi bumpanda-njila budi ne mafutu makuabu kabidi. Yukila ne bampanda-njila, ne nebakuambile se: bumpanda-njila budi mushindu mutambe bulenga wa kumona ‘dibenesha dia kudi Yehowa didi divuija muntu mubanji.’—Nsumuinu 10:22, NW.
3. Ntshinyi tshidi ne bua kutusonsola bua kutungunuka ne kuenzela Yehowa mudimu?
3 Matuku mashale aa, bavua balombe bampanda-njila ba mu bitupa kabukabu bia buloba bua kumvuijabu mabenesha adibu bapete mu mudimu wa ku dîba ne ku dîba. Tuanjayi kumvua biakambabu. Kadi, kuteketshi mu maboko bikala mudimu webe mukepele bua disama, bukulakaje, anyi nsombelu mikuabu. Vuluka ne: tshidi ne mushinga nkusadila Yehowa ne anyima mujima, muetu muonso mutudi mua kuenza. Kabidi, diteleja mumvuija abu nedikoleshe mene tshipatshila tshiebe tshia kuditua mu mudimu eu mulenga, pikalaku mushindu.
Nyanji miondoke ya disankishibua ne ya disanka
4, 5. (a) Bua tshinyi diyisha bakuabu lumu luimpe mbualu budi ne mafutu a bungi? (b) Mmunyi mudi bampanda-njila bumvua pa kuenza mudimu wa ku dîba ne ku dîba?
4 “Disanka dia kupa ndipite dia kupeta,” ke muakamba Yezu. (Malu Menza 20:35, MMM) Eyowa, dipa dia kalolo didi ne adi mafutu. (Nsumuinu 11:25) Ebi mbilelela nangananga mu diyisha bakuabu lumu luimpe. Bushuwa, ndipa kayi dinene ditudi mua kupesha muntu netu didi dipite kumuambuluisha bua apete dimanya dia Nzambi, didi difikisha ku muoyo wa kashidi?—Yone 17:3.
5 Kabiena bikemesha, aba badi badifila mu mudimu ku dîba ne ku dîba batu bumvuija disanka ne ngumvuilu muondoke wa dikumbaja bidibu bapete mu mudimu wabu. Mpanda-njila mukuabu wa mu Grande-Bretagne, wa bidimu 64 udi wamba ne: “Ndi mumanye se: mudimu mukuabu kauvua mua kuikala muntuadile disankishibua didi difumine ku diyisha bakuabu bulelela.” Mukaji mukamba kampanda wa mu Congo (Zaïre) wakumvuija tshivua bumpanda-njila buleja buende yeye: “Mudimu wa bumpanda-njila uvua busambi bulelela kundi panyima pa dijimija dia bayanyi wa kunanga. Pamvua ntamba kupatuka mu mudimu bua kuambuluisha bakuabu, tshivua ntamba kumvua dijimija adi didi ditua ku muoyo. Ndi ndeja ditabuja dianyi mu malaya a Yehowa ne misangu mivule ngela meji mundi mua kuambuluisha bantu bandi ndonga nabu bua kuenzabu mashintuluka mu nsombelu yabu. Ku ndekelu kua dituku dionso, ntu mpeta tulu tuimpe, ne mutshima wanyi utu mûle ne disanka.”
6. Ndisanka kayi dia pa buadi didi bamue bampanda-njila bapete?
6 Bamue badi benze bumpanda-njila mu makumi a bungi a bidimu mbapete disanka dia pa buadi dia kusadila mu bitupa bia kulekule, kuasabu bisumbu biakandamuka bijengu pashishe. Tshilejilu, mu tshimenga tshia Abashiri, mu Hokkaido (tshidiila tshia ku Nord menemene kua Japon), mudi muanetu wa bakaji udi muikale mpanda-njila munkatshi mua bidimu 33. Udi uvuluka ne: mu mpuilu wa tshijengu wakabuelaye bua musangu wa kumpala—bua Hokkaido mujima—anu bantu 70 ke bakabuelamu. Kadi mpindieu? Bijengu 12 bidi mu tshidiila atshi, ne bamanyishi bungi busanga bupite pa 12 000. Ela meji mudi mutshima wende mûle tente ne disanka padiye ubuela mu mpuilu mikese ne minene pamue ne bisumbu bivule bia bamanyishi nende ba Bukalenge mu tshidiila atshi!
7, 8. Ndisanka kayi didi bampanda-njila bavule ba mutantshi mule bapete?
7 Bakuabu bampanda-njila ba mutantshi mule mbapete disanka dia kumona balongi ba Bible batambula ne pashishe bipatshila masanka manene a mudimu. Ku Japon muanetu wa bakaji kampanda udi musadile bu mpanda-njila mu miaba mishilangane tshitema kubangila mu 1957, udi uvuluka muakashilaye nsongakaji kansanga uvua wenza mudimu ku banke tshibejibeji tshimue tshia Réveillez-vous! Mu ngondo tshitema patupu, nsongakaji eu wakatambula. Pashishe bakamusela, ne yeye pamue ne bayende bakalua bampanda-njila ba pa buabu. Ndisankapu kayi diakapeta muanetu wa bakaji eu mpanda-njila mu muaba wende muisatu wa mudimu, pakakumbulabu tshisumbu tshiende kudi mutangidi mupiamupia wa tshijengu tshiabu ne mukajende—mulongi wende wa kale wa Bible!
8 Kabiena bikemesha mudi aba badi bavuije bumpanda-njila mudimu wabu babuangata bu “disanka dikena kutua mushinga didibu ne bua kuanyisha bikole,” bu muakabiumvuija mpanda-njila mukuabu wa bidimu 22!
Tshijadiki tshia ditabalela dia Yehowa
9. Bu mudiye Mupeshanganyi Munene, ntshinyi tshidi Yehowa ulaya basadidi bende, ne ebi bidi biumvuija tshinyi buetu tuetu?
9 Yehowa, Mupeshanganyi Munene, udi ulaya bua kukuatshisha basadidi bende, bua kubatabalela mu nyuma ne ku mubidi. Mukalenge wa kale Davidi wakamba bimpe ne: “Mvua muana mutekete, mpindiewu nkadi mukulakaje, tshiena mumone muntu muakane mulekelela nkayende, nansha bende bana bakeba tshiakudia.” (Misambo 37:25, MMM) Bushuwa, dishindika edi dia Nzambi kadiena ditumbusha bujitu bua kupetesha mêku etu bidi bikengedibua ku mubidi, anyi dituanyishila bua kuteka muoyo ku kalolo ka bana betu bena nkristo. (1 Tesalonike 4:11, 12; 1 Timote 5:8) Kadi, patudi ku budisuile tudibudisha amue masanka mu nsombelu yetu bua kumona mua kusadila Yehowa tshishiki, kakutulekela nansha kakese.—Matayo 6:33.
10, 11. Ku malu mamonamona, ntshinyi tshidi bampanda-njila bavule bamanye pa bukokeshi bua Yehowa bua kubapetesha bidibu bakengela?
10 Mu buloba bujima, bampanda-njila mbamanyine ku malu mamonamona se: Yehowa udi upetesha aba badi baditeka mu bianza biende bia ditabalela bintu bidibu bakengela. Tangila bualu bua bena dibaka babidi bampanda-njila bakaya mu tshimenga kampanda tshikese muvua dikengela dinene dia bamanyishi ba Bukalenge. Ngondo mikese panyima, mudimu wa ku mubidi wakalua mukole bua kuupeta, ne kabatshivua ne kantu ku bianza. Pashishe kupetabu faktire wa dolare 81 ya tshitadi tshia mashinyi. Muanetu wa balume udi umvuija ne: “Katuvua ne mushindu wa kufuta faktire eu to. Tuakasambila bikole butuku abu.” Dituku diakalonda, bakapeta mukanda mubatumina kudi bena dîku dikuabu bavua baluangana pabu ne ntatu ya mfranga. Bena dîku aba bavua bapete mfranga mibapingajila kudi Mbulamatadi, ke muvua mukanda eu umvuija, ne bu muvuayi mipite bungi buvuabu batekemene, bakajinga bua kuabanyangana ndambu wa mine mfranga eyi ne bena dibaka aba bampanda-njila. Munda mua mukanda eu muvua sheke wa dolare 81! Muanetu eu mpanda-njila udi wamba ne: “Tshiakupua dituku adi muoyo—nsuki yonso yakamvuayila! Tuakanyisha bikole kalolo ka bena dîku edi.” Yehowa udi pende wanyisha bulenga bua nunku, budi buleja lungenyi lua kalolo ludiye ukankamija bua basadidi bende bikale nalu.—Nsumuinu 19:17; Ebelu 13:16.
11 Bampanda-njila bavule badi mua kulonda malu mamona a muomumue. Ubebeje, ne nebakuambile ne: katshia ki ‘mbabalekelele nkayabu.’ Padiye utangila kunyima kua bidimu bipite pa 55 mu mudimu wa ku dîba ne ku dîba, mpanda-njila mukuabu wa bidimu 72 udi wamba ne: “Yehowa katu muanji kundekela.”—Ebelu 13:5, 6.
“Mushindu mulenga wa kutamba kusemena pabuipi ne Yehowa”
12. Bua tshinyi mudimu wa dimanyisha lumu luimpe ndisanka dia pa buadi?
12 Muanda wa se: Yehowa mene udi utulomba bua kumanyisha lumu luimpe lua Bukalenge buende udi utupesha disanka kampanda. Udi utuangata—nansha mutudi bantu bapange bupuangane emu—bu ‘benzejanganyi nende ba mudimu’ mu mudimu eu wa dipandisha mioyo. (1 Kolinto 3:9; 1 Timote 4:16) Patudi tuyisha bakuabu malu a Bukalenge bua Nzambi, patudi tumanyisha nshikidilu wa bubi, patudi tumvuija bantu dinanga diende dilenga mu difila tshia-bupikudi, patudi tubulula Dîyi diende dia muoyo ne tulongesha bantu ba mitshima milulame malu a mushinga mukole adimu, tudi bushuwa tusemena pabuipi menemene ne Mufuki wetu Yehowa.—Musambu 145:11; Yone 3:16; Ebelu 4:12.
13. Ntshinyi tshidi bamue bamba bua buenzeji budi nabu mudimu wabu wa bumpanda-njila pa malanda abu ne Yehowa?
13 Bampanda-njila badi ne mushindu wa kupitshisha dîba dia bungi ku ngondo mu dilonga ne mu dilongesha malu adi atangila Yehowa. Mmunyi mudibu bumvua ne: dienza nunku didi ne buenzeji pa malanda abu ne Nzambi? Mukulu mukuabu wa mu France, mpanda-njila munkatshi mua bidimu bipite pa dikumi, udi wandamuna ne: “Bumpanda-njila budi mushindu mulenga wa kutamba kuikala pabuipi ne Yehowa.” Mukuabu mpanda-njila wa mu dine ditunga adi, udi muenze bidimu 18 mu mudimu wa ku dîba ne ku dîba, udi wamba ne: “Mudimu wa bumpanda-njila udi utupesha mushindu wa ‘kulabula, kumvua ne: Yehowa udi muakane,’ ku dituku ku dituku tusuika malanda mapite bukole ne Mufuki wetu.” (Musambu 34:8) Muanetu wa bakaji mukuabu wa mu Grande-Bretagne, mpanda-njila munkatshi mua bidimu 30, udi umvua bia muomumue. “Ditumika ne spiritu wa Yehowa bua kupeta buludiki mu mudimu wanyi ndinsemeje pabuipi nende menemene,” ke mudiye wamba. “Ndi mumvue bushuwa ne: misangu mivule spiritu wa Yehowa wakandombola ku nzubu kampanda wa pa buende pa dîba diakanyine.”—Fuanyikija ne Bienzedi 16:6-10.
14. Mmunyi mudi bampanda-njila bapetela masanka ku ditumika dituku dionso ne Bible ne mikanda idi ishindamena pa Bible bua kulongesha bakuabu?
14 Bampanda-njila bavule badi bamona se: kutumika dituku dionso ne Bible ne mikanda idi ishindamena pa Bible bua kumvuija ne kulongesha malelela a mu Mifundu kudi kubambuluisha bua kukola mu dimanya dia Dîyi dia Nzambi. Muanetu kampanda wa balume wa mu Espagne, wa bidimu 85 muikale mpanda-njila munkatshi mua bidimu 31, udi umvuija ne: “Bumpanda-njila mbungambuluishe bua kupeta dimanya diondoke dia Bible, dimanya dindi mutumike nadi bua kuambuluisha bantu ba bungi bua kumanyabu Yehowa ne malongolola ende.” Muanetu mukuabu wa bakaji wa mu Grande-Bretagne, udi muenze bidimu 23 mu bumpanda-njila, udi wamba ne: “Mudimu wa ku dîba ne ku dîba mmungambuluishe bua kujula nzala milelela ya biakudia bia mu nyuma.” Diumvuija bakuabu “muanda wa ditekemena didi munda muenu” didi mua kukolesha bijadiki biebe wewe muine bua mitabuja audi wangata ne mushinga. (1 Petelo 3:15) Mpanda-njila mukuabu wa ku Australie udi wamba ne: “Bumpanda-njila budi buakaja ditabuja dianyi pandi ngakula ne bakuabu.”
15. Ntshinyi tshidi bavule bajinga bua kuenza bua kubuela mu mudimu wa bumpanda-njila ne kushalamu, ne mbua tshinyi?
15 Mu butoke buonso, ba-ministre aba bampanda-njila mbajadike bua se: mbasungule mushindu wa mudimu udi ufila mabenesha a kudi Yehowa bungi kabuyi kubala. Kabiena bikemesha mudi bavule bajinga mua kuenza makajilula mu nsombelu yabu, pa kulekela mene mudimu wa ku mubidi ne mabanji abu, bua kubuela mu mudimu wa bumpanda-njila ne kushalamu!—Nsumuinu 28:20.
Mutshima webe udi ujinga bikole bua kuenza bivule anyi?
16, 17. (a) Biwikala udikonka né mbipepele bua wewe kuenza bumpanda-njila, ntshinyi tshiudi mua kuenza? (b) Mmunyi mudi bamue badiumvua padibu bapangila mua kuenza bumpanda-njila?
16 Bamane kukonkonona bidi bampanda-njila bamba bua mabenesha a mudimu eu, udi pamu’apa udiebeja bikala bumpanda-njila ne dikuatshisha kuudi. Bikalabi nanku, bua tshinyi kubenga kuyukila ne mpanda-njila udi mupatule bipeta bimpe mu mudimu wa ku dîba ne ku dîba? Bidi kabidi mua kukuambuluisha pa kuyukila ne umue wa ku bakulu ba tshisumbu, muntu udi mukumanye—mumanye makanda ebe a mubidi ne mikalu yebe, pamue ne majitu ebe a mu dîku. (Nsumuinu 15:22) Mumvuija malelela a bakuabu adi mua kukuambuluisha bua kupima ne lubatshi luonso bua kumanya biwikala mua kuenza bumpanda-njila. (Fuanyikija ne Luka 14:28.) Biwikala ne mushindu wa kulua mpanda-njila, bushuwa mabenesha ebe neikale mavule.—Malaki 3:10.
17 Kadi, netuambe tshinyi bua bamanyishi bavule ba Bukalenge bena lulamatu badi kabayi ne mushindu wa kulua bampanda-njila, nansha mudibu mua kuikala bajinga bikole bua kuenza bivule mu mudimu? Tshilejilu, tangila nyanji ya muanetu wa bakaji kampanda muena nkristo udi uluangana bua kukolesha nkayende bana bende banayi. Udi wamba ne: “Ndi ne dibungama, bualu mvua muibidile kuikala mpanda-njila wa pa tshibidilu, kadi mpindieu bua nsombelu wanyi, tshiena mua kupatuka mu mudimu wa budimi misangu mivule bu mumvua ngenza.” Muanetu eu wa bakaji mmunange bikole bana bende ne mmusue kubapetesha bidibu bakengela. Eku pende udi ujinga bikole bua kuenza bivule mu mudimu wa diyisha. “Ndi munange mudimu wetu,” ke mudiye umvuija. Bakuabu bena nkristo baditshipe badi ne dinanga dia Nzambi dibasaka bua kujinga mua kusadila Yehowa ‘ne mutshima wabu wonso’ badi ne nyanji ya muomumue.—Musambu 86:12.
18. (a) Ntshinyi tshidi Yehowa utekemena kutudi? (b) Bua tshinyi katuena ne bua kuteketa mu maboko padi nsombelu yelela bitudi mua kuenza mikalu?
18 Vuluka se: tshidi Yehowa utekemena kutudi mmudimu muenza ne anyima mujima. Bungi buawu budi mua kushilangana bikole ku anyima ne anyima. Bamue badi ne mushindu wa kuakaja malu abu bua kumona mua kusadila bu bampanda-njila ba pa tshibidilu. Bakuabu bavule badi babuela mu milongo ya bampanda-njila bambuluishi ku musangu anyi mu mushindu mutungunuja, pa kuenza ku ngondo yonso mêba 60 mu mudimu. Kadi, bantu ba Yehowa mu tshi-bungi tshinene badi badifila mu mudimu wa diyisha ne wa dilongesha muenza ne anyima mujima bu bamanyishi ba mu tshisumbu. Nenku, biwikala bushuwa ne mikalu bua bubedi, bukulakaje, majitu a mu dîku anyi bua nsombelu mikuabu, kuteketshi mu maboko. Biwafila biebe bitambe bulenga, mudimu webe udi ne mushinga ku mêsu kua Nzambi, anu bu mudi wa badi mu mudimu wa ku dîba ne ku dîba!
Tudi mua kuleja bonso lungenyi lua bumpanda-njila
19. Lungenyi lua bumpanda-njila ntshinyi?
19 Nansha biwikala bumue kuyi mua kubuela mu mulongo wa bampanda-njila, udi mua kuleja lungenyi lua bumpanda-njila. Lungenyi lua bumpanda-njila ntshinyi? Mudimu wetu wa Bukalenge wa mu Kashipu 1988 (Angl.) wakamba ne: “Tudi mua kulumvuija bu kuikala ne mmuenenu muimpe pa bidi bitangila dîyi-dituma dia kuyisha ne kuenza bayidi, kudiumvua menemene ne bujitu bua kuleja dinanga ne diditatshisha bua bantu, kuikala mudifile, kupeta disanka mu dilonda Mfumu pabuipi menemene, ne kusankila mu malu a mu nyuma, ki mmu a ku mubidi.” Mmunyi muudi mua kuleja lungenyi lua bumpanda-njila?
20. Mmunyi mudi baledi mua kuleja lungenyi lua bumpanda-njila?
20 Biwikala muledi wa bana batshidi bapuekele, udi mua kubatangija ne muoyo umue ku mudimu wa bumpanda-njila. Mmuenenu webe muimpe pa mudimu eu udi mua kubapesha dijinga dia kuvuija mudimu wa Yehowa tshintu tshia mushinga mutambe bukole mu nsombelu wabu. Udi mua kubikila bampanda-njila ne batangidi bena ngendu ne bakaji babu kumbelu kuebe bua bana bebe kupetelabu dikuatshisha ku bilejilu bia aba badi bapete disanka mu mudimu wa ku dîba ne ku dîba. (Fuanyikija ne Ebelu 13:7.) Nansha mu mêku adi matapuluke mu malu a ntendelelu, mu mêyi ne ku tshilejilu tshiabu, baledi bena kuitabuja badi mua kuambuluisha bana babu bua kuvuija mudimu wa ku dîba ne ku dîba tshipatshila tshia mu nsombelu wabu.—2 Timote 1:5; 3:15.
21. (a) Mmunyi mutudi tuetu bonso mua kukuatshisha aba badi benza bumpanda-njila? (b) Ntshinyi tshidi bakulu mua kuenza bua kukankamija bampanda-njila?
21 Mu tshisumbu, tuetu bonso tudi mua kufila dikuatshisha dia muoyo mujima kudi aba badi mua kuenza bumpanda-njila. Tshilejilu, udiku mua kuenza madikolela bua kutumika mu mudimu pamue ne mpanda-njila kampanda, nangananga mu bikondo bidiye mufuane kupatuka nkayende anyi? Bumue neumone bushuwa se: nekuikale “dishintakaja dia dikankamija.” (Lomo 1:11, 12, NW) Biwikala mukulu, udi mene mua kuenza bivule bua kukankamija bampanda-njila. Padi kasumbu ka bakulu kasangila, badi ne bua kutangila pa tshibidilu bidi bampanda-njila bakengela. Padi mpanda-njila kampanda uteketa ku muoyo anyi umona imue ntatu, kanuyi lukasa bua kumulomba bua imanyike bumpanda-njila. Nansha mudi difila mubelu wa nunku mua kuikala imue misangu ne mushinga, kanupu muoyo ne: bumpanda-njila ndisanka dia mushinga mukole didi musadidi eu wa ku dîba ne ku dîba mua kuanyisha bikole. Ndambu wa dikankamija ne imue mibelu mimpe anyi dikuatshisha bidi mua kuikala bidiye ukengela menemene. Biro bia filiale wa Société mu Espagne bidi bifunda ne: “Padi bakulu bakankamija bumpanda-njila, bakuatshisha bampanda-njila mu mudimu wa budimi, ne babasamba pa tshibidilu mu makumbula a bulami, bampanda-njila badi bapeta disanka dia bungi, badiumvua bikale ne dikuatshisha, ne bajinga mua kutungunuka nansha kuikale bipumbishi bidi mua kumueneka.”
22. Mu tshikondo etshi tshikole tshia mu miyuki ya bantu, ntshinyi tshitudi ne bua kupangadija bua kuenza?
22 Tudi mu tshikondo tshikole tshia mu miyuki ya bantu. Yehowa mmutupeshe mudimu wa dipandisha mioyo utudi ne bua kukumbaja. (Lomo 10:13, 14) Nansha bituikala mua kuenza mudimu eu ku dîba ne ku dîba bu bampanda-njila anyi kupanga kuenza nunku, tulejayi lungenyi lua bumpanda-njila. Tuikalayi ne mmuenenu wa mitalu ne lungenyi lua didifila. Tupangadijayi bua kupesha Yehowa tshidiye utulomba—mudimu muenza ne anyima mujima. Ne tuvulukayi ne: patudi tufila bionso bitudi mua kufila, nansha biobi bifuane tukuta tua mukaji mukamba anyi mafuta a Mariya a mushinga mukole, mudimu wetu mmuenza ne anyima mujima, ne Yehowa udi wanyisha bikole mudimu wetu muenza ne anyima mujima!
Udi muvuluke anyi?
◻ Bua tshinyi mudimu wa ku dîba ne ku dîba udi ufila nyanji ya disankishibua ne ya disanka?
◻ Ku malu mamonamona, ntshinyi tshidi bampanda-njila bavule bamanye pa bukokeshi bua Yehowa bua kutabalela basadidi bende?
◻ Bampanda-njila badi bumvua ne: mudimu wabu udi ne buenzeji kayi pa malanda abu ne Yehowa?
◻ Mmunyi muudi mua kuleja lungenyi lua bumpanda-njila?
[Tshimfuanyi mu dibeji 23]
Bampanda-njila badi bapeta disanka dinene mu dienza bayidi
[Tshimfuanyi mu dibeji 23]
Bana bebe badi mua kupetela dikuatshisha ku dishala pamue ne bamanyishi ba Bukalenge ba ku dîba ne ku dîba
[Tshimfuanyi mu dibeji 23]
Bakulu badi mua kukankamija bampanda-njila mu mudimu wa budimi