“Paulo wakasakidila Nzambi, kukolaye ku muoyo”

Pavua bena mu tshisumbu tshia mu Lomo bumvue ne: Paulo uvua wenda ulua, bakatuma bana betu bua kuya kumuakidila ntanta wa kilometre mitue ku 64. Mmunyi muvua didifila diabu ne dinanga dionso dilenge Paulo ku muoyo? Bible udi wamba ne: “Pakabamona Paulo, wakasakidila Nzambi, kukolaye ku muoyo.” (Bz 28:15) Nansha muvua Paulo mumanyike bua dikolesha bena mu bisumbu bivuaye ukumbula, mpindieu bu muvuaye muena buloko, yeye ke ukavuabu bakankamija.—2Ko 13:10.

Lelu eu, batangidi ba bijengu badi bakumbula bisumbu bua kukolesha bana betu badimu. Bobu pabu batu batshioka, bapeta tunyinganyinga, ne bateketa mu mikolo anu bu batendeledi ba Nzambi bonso. Musangu kumpala, pakumbula mutangidi wa tshijengu ne mukajende tshisumbu tshienu, newenze tshinyi bua kubakolesha ku muoyo bua nuenu “kukankamijangana muntu ne muntu”?—Lom 1:11, 12.

• 

  Ikala uya mu bisangilu bia buambi. Padi bamanyishi benza muabu muonso bua lumingu lua pa bualu lubambuluishe, bidi bikankamija mutangidi wa tshijengu. (1Ts 1:2, 3; 2:20) Udi mua kuangata nansha mudimu wa bumpanda-njila buambuluishi ngondo unudi ne dikumbula. Kuenaku mua kuyisha nende anyi ne mukajende peshi kulomba umue wa kudibu bua akufile bua kulombola dilonga dia mukanda anyi? Batu basue kuyisha ne bamanyishi bashilashilangane, nansha batshidi bapiabapia anyi badi kabayi bapiluke mu diyisha.

• 

  Ubakidile. Udi mua kubapesha muaba wa kulala anyi tshiakudia. Wewe muenze nanku, mutangidi wa tshijengu ne mukajende nebamone ne: udi mubanange. Kabiena bikengela anu kuenza malu mapitepite bungi bua kubakidila to.—Luk 10:38-42.

• 

  Muteleja, utumikile mibelu ne bulombodi budiye ufila. Mutangidi wa tshijengu utu utuambuluisha ne dinanga dionso bua tuakaje mudimu utudi tuenzela Yehowa. Kudi misangu idiye mua kutupesha mibelu mikole. (1Ko 5:1-5) Patudi tutumikila ne tukokela, bidi bimusankisha bikole.—Eb 13:7.

• 

  Leja dianyisha. Ambila mutangidi wa tshijengu ne mukajende mudi malu adibu benza makuambuluishe. Udi mua kubambila mukana anyi mu mukanda.—Kls 3:15.