Malu adibu baledile mu Mabeji a tshisangilu tshia Nsombelu ne mudimu wetu
LUMINGU LUA DIA 12-18/8
BIUMA BIA MU DÎYI DIA NZAMBI | TITO 1–FILEMONA
Dikeba bubanji bua mu Dîyi dia Nzambi
Nkonko ya babadi
Paulo kavua wamba bena Kulete mêyi mabi a dibapuekesha nawu milongo avua bantu bakuabu bamba tshisa atshi tshijima to. Tudi batuishibue nanku bualu Paulo uvua mumanye ne: mu Kulete muvua bena Kristo bavua Nzambi muanyishe bavuaye muele manyi a nyuma. (Bienzedi 2:5, 11, 33) Muvua kabidi bena Kristo ba bungi ba tshisumi bavua mua kuenza bisumbu mu “tshimenga ne mu tshimenga.” Nansha muvua bena Kristo abu kabayi bapuangane, tudi batuishibue ne: kabavua bena dishima anyi badiavi bena lulengu to; tshianana Yehowa kavua mua kutungunuka ne kubanyisha to. (Filipoyi 3:18, 19; Buakabuluibua 21:8) Anu mutudi tubimona lelu pa buloba bujima, mu Kulete muvua pamu bantu ba muoyo muakane bavua banyingalala bua muvua bantu bavua babanyunguluke benza malu mabi, ne bavua badiakaje bua kuitaba mukenji wa Kristo.—Yehezekele 9:4; tangila kabidi Bienzedi 13:48.
LUMINGU LUA DIA 19-25/8
BIUMA BIA MU DÎYI DIA NZAMBI | EBELU 1-3
Dikeba bubanji bua mu Dîyi dia Nzambi
Tshimfuanyi
Katshia anu Yezu wafukibua, mmuenze malu bu Tatu wende mu tshipidi tshia muomumue misangu yonso anyi?
Yezu Muanabute wa Nzambi, uvua mulue kuledibua pa buloba bu muntu wa mashi ne mâyi, udi tshimfuanyi tshia Tatu wende. (2Ko 4:4) Bidi nanku bualu yeye Muana eu ke uvua Nzambi muambile ne: “Tuenze muntu mu tshimfuanyi tshietu.” Difuanangana dia Muana eu ne Tatu wende Mufuki diakatuadija katshia anu bamufuka. (Gen 1:26; Yne 1:1-3; Kls 1:15, 16) Pavuaye pa buloba bu muntu mupuangane, wakaleja ngikadilu ya Tatu wende ne bumuntu buende mu mushindu mukumbane udi muntu wetu wa mashi ne mâyi eu mua kubileja, ke bualu kayi wakamba ne: “Muntu yonso udi mummone mmumone kabidi Tatu.” (Yne 14:9; 5:17, 19, 30, 36; 8:28, 38, 42) Kadi katshia Yehowa Nzambi wabisha Yezu ku lufu ne mubidi wa nyuma ne wamupesha “bukokeshi buonso mu diulu ne pa buloba,” udi wenza malu bu Tatu wende mu tshipidi tshibandile. (1Pt 3:18; Mat 28:18) Bualu bukuabu budi ne: pavua Nzambi mupeshe Yezu “muaba mubandile,” wakatuadija kuleja butumbi bua Tatu wende mu mushindu mupite ne uvuaye mubuleje kumpala kua yeye kumbuka mu diulu bua kuledibua pa buloba. (Flp 2:9; Eb 2:9) Yezu udi mpindieu “tshimfuanyi tshilelela tshia bumuntu [bua Nzambi] menemene.”—Eb 1:2-4.
Diulu
Mêyi adi mu Misambu 102:25, 26 adi atangila Yehowa Nzambi, kadi mupostolo Paulo mmuatele wakula bua Yezu Kristo. Bidi nanku bualu Muana umuepele mulela wa Nzambi eu ke uvua mumuambuluishe pavuaye ufuka bintu bionso bidi mu tshibuashibuashi. Paulo udi uleja mudi Yezu mushilangane ne bintu bidi bimueneka bidi Nzambi mufuke, wamba ne: Yezu kena mua kufua kabidi to, kadi bintu biobi bidi mua kubutudibua, bualu Nzambi uvua mua ‘kubivunga anu bu tshizaku’ ne kubibutula bu yeye mulongolole bua kuenza nanku.—Eb 1:1, 2, 8, 10-12; tangila kabidi 1Pt 2:3, dim.
LUMINGU LUA DIA 26/8–1/9
BIUMA BIA MU DÎYI DIA NZAMBI | EBELU 4-6
“Enza muebe muonso bua kubuela mu dikisha dia Nzambi”
Ditekemena
Bantu badi “bapete dibikila . . . dia mu diulu” (Eb 3:1) badi ne ditekemena dikole dia kupeta muoyo wa kashidi udi kawuyi mua kubola. Ntshintu tshilelela tshidibu mua kuindila ne dishindika dionso, bualu ditekemena diabu edi ndiashila pa malu manene abidi adi Nzambi udi kayi mua kushima muenze, mmumue ne: mulayi wa Nzambi ne mutshipu wende. Ditekemena edi ndishindamene pa Kristo ukadi mpindieu ne muoyo udi kawuyi mua kufua mu diulu. Nunku ditekemena edi ke didi Bible utela bu “luongo lua anyima, dikale dikole, dishindame, ne didi dibuela dia muamua dia tshilamba tshia kukosolola natshi [anu muvua muakuidi munene ubuela mu Muaba Mutambe Tshijila mu Dituku dia dibuikidila dia mpekatu], mudi Yezu udi mutudianjidile mubuele bua bualu buetu, yeye udi mulue muakuidi munene bua kashidi mu mushindu uvua Melekisedeke.”—Eb 6:17-20.