Mua kuenza mudimu ne tshitupa tshia Mua kuyukila ne bantu

Katshia ku ngondo wa 1/2018, badi batupatuila ngenyi ya mua kuyukila ne bantu pa Mabeji a tshisangilu tshia Nsombelu ne mudimu wetu wa buena Kristo. Mmunyi mutudi mua kukuata nayi mudimu?

Paudi wenza mudimu wa mulongi: Udi ne bua kuela lukonko, kufila mvese, ne kuela lukonko lua musangu walonda. Nansha nanku, kuena muenzejibue bua kuambulula anu mêyi adibu bambe mu filme wa mua kuyukila ne bantu to. Udi mua kusungula kadre kashilangane ne ka mu filme, kuamba mêyi a ntudijilu mashilangane, ne kueleshisha muntu meji mu mushindu mushilangane ne wa mu filme. Udi kabidi mua kufila mukanda wa mu Bintu bietu bia kulongesha nabi, nansha bobu kabayi bawutele mu malu a kulonda.

Paudi mu buambi: Mbafile ngenyi ya mua kuyukila ne bantu eyi bua kutuambuluisha. Muntu yeye muanyishe bitudi tumuambila ne musue kumanya bia bungi, tudi mua kutungunuka ne kuyikila nende, pamuapa tuenza mudimu ne ngenyi ya mua kupinganyina bantu. Udi mua kushintulula mêyi onso a mua kuyukila ne bantu, kuamba mu webe mushindu. Pamuapa ngenyi ya mua kuyukila ne bantu ivuabu bafile ngondo mushale ke idi itamba kukoka ntema ya bantu mu teritware, peshi bualu mbuenzeke budi bukoka ntema ya bantu. Nansha tuetu tuenza mudimu ne ngenyi eyi mushindu kayi, tshipatshila tshietu ntshia ‘kuenza malu onso bua lumu luimpe, bua tuetu kuluyisha bakuabu.’​—1Ko 9:22, 23.