Dibaka mbulunda budi bantu badia bua matuku abu onso a muoyo

Mabaka mimpe adi apesha Yehowa bunême ne apetesha mulume ne mukajende disanka. (Mâk 10:9) Bua dibaka kuikaladi dikole ne dia disanka, mbimpe bena Kristo balamate bikole ku mêyi manene a mu Bible padibu basungula muntu wa kuselangana nende.

Kutantshidianganyi ne muntu bua dibaka paudi kuyi muanji “kupita tshikondo tshia bunsonga,” tshikondo tshidi majinga a kusangila mua kukupangisha bua kuangata mapangadika mimpe to. (1Ko 7:36) Enza malu ne meji bidimu bionso biutshidi mujike, kolesha bulunda buebe ne Yehowa ne dienzeja bua kuikala ne ngikadilu ya buena Kristo. Wewe muenze nanku, newikale mukumbane bua kuenza tshidi tshikengela bua dibaka dienu dikale dimpe.

Kumpala kua wewe kuitaba bua kuselangana ne muntu kampanda, mbimpe ukebe bua kumanya “muntu musokome wa mu muoyo.” (1Pt 3:4) Wewe welakana bua malu kampanda, nudi mua kuayukidila ne muntu uudi usua kuselangana nende. Anu mudibi bua bulunda butu bantu badia, mu dibaka dienu udi ne bua kutamba kuimanyina pa tshiudi mua kupesha muena dibaka nebe pamutu pa tshidiye yeye mua kukupesha. (Flp 2:3, 4) Wewe utumikila mêyi manene a mu Bible kumpala kua wewe kubuela mu dibaka, nebikale bipepele bua wewe kutungunuka ne kuenza nanku pawikala kuebe ne dibaka dienu nedikale dia disanka.

NUTANGILE FILME WA MUA KUDILONGOLOLA BUA DIBAKA: TSHITUPA 3: ‘MANYA TSHIKALABI MUA KUKULOMBA,’ PASHISHE NUANDAMUNE NKONKO EYI:

• Mmunyi muvua malanda avua pankatshi pa muanetu wa bakaji ne Shane mashemakane?

• Ntshinyi tshivuaye mulue kumona pakamanyaye Shane bimpe menemene?

• Mmunyi muvua baledi bende bamuambuluishe? Ndipangadika kayi dia meji divuaye mulue kuangata?