Pikala kalolo mua kuvulangana
BU WEWE ne mushindu wa kupesha mukalenge kampanda dipa, ntshinyi tshiudi mua kumupesha? Udi mua kumupesha tshinyi bikalaye mukalenge wa bubanji ne meji bipite bia bantu bonso ba pa buloba? Kuakukebaku bua kumupesha tshintu tshidi mua kumusankisha anyi? Kukadi bidimu bu binunu bisatu, mukalenge-mukaji wa mu Sheba uvua mua kuikala muelangane meji pa nkonko ayi pavuaye udilongolola bua kukumbula mukalenge wa mushindu’eu: Mukalenge Solomo wa mu Isalele.
Bible udi utuambila ne: dipa diende divua dia ntalanta ya or 120 ‘ne bintu bia mupuya muimpe bia bungi, ne mabue a mushinga mukole.’ Bua mushinga udiku lelu, or nkayende uvua wa dolare mitue ku 40 000 000. Bintu bia mupuya muimpe—mafuta a dipembu dikole ne a kuondapangana nawu—uvua mubikute pamue ne or bienze dibuki dia mushinga mukole. Nansha mudi Bible kayi utuambila bungi bua manananshi avua mukalenge-mukaji mupeshe Solomo, udi utuleja ne: muntu mukuabu kavuaku muanji kupeshangana dipa bu diende to.—1 Bakelenge 10:10.
Mukalenge-mukaji wa mu Sheba uvua bushuwa mukaji wa bubanji bua bungi ne muena kalolo. Kabidi, kalolo kende kakamupinganyina. Bible udi wamba ne: ‘Mukalenge Solomo wakapa mukalenge-mukaji wa Sheba bintu bionso biakanangaye, tshionso tshiakalombaye pa mutu pa bintu biakaluaye nabi kudi mukalenge.’ (2 Kulondolola 9:12, disendamija miaku ndietu.) Bushuwa, bakalenge bavua mua kuikala ne tshilele tshia kupeshangana bintu; kadi Bible udi wakula mu mushindu musunguluke bua muvua Solomo ‘upeshangana [bintu] ne muoyo wende mujima.’ (1 Bakelenge 10:13, MMM) Solomo muine wakafunda ne: ‘Muena mutshima wa [kalolo, NW] neavuijibue mubanji; wamiamina bakuabu mâyi neamiaminyibue pende mâyi kabidi.’—Nsumuinu 11:25.
Bushuwa, mukalenge-mukaji wa mu Sheba wakenza kabidi madikolela a bungi bua kuanyisha bua kujimija dîba ne makanda bua kukumbula Solomo. Bidi bimueneka se: Sheba uvua muaba udi ditunga dia Yémen; nanku mukalenge-mukaji ne mulongolongo wa tumelu tuende bavua benze luendu lua kilometre mitue ku 1 600 bua kufika ku Yelushalema. Anu bu muakamba Yezu: “uvua mufume kuakashikidila buloba.” Bua tshinyi mukalenge-mukaji wa ku Sheba wakaditatshisha bikole mushindu’eu? Wakalua diambedi bua ‘kuteleja miaku ya meji ya Solomo.’—Luka 11:31, MMM.
Mukanda wa kumudilu wa Bakelenge 10:1, 2 udi wamba ne: mukalenge-mukaji wa ku Sheba ‘wakalua bua kumuteta ne makonka makole. Wakamuambila malu onso avuaye nawu mu mutshima wende.’ Solomo wakenza tshinyi? ‘Wakitaba ku makonka ende onso; yeye kakamusokoka bualu [nansha] bumue.’—1 Bakelenge 10:3.
Bu muakakemaye bua bivuaye mumvue ne mumone, ne bupuekele buonso mukalenge-mukaji wakamuandamuna ne: ‘Bantu aba ne bena mudimu bebe batu bimana kumpala kuebe bua kumvua lungenyi luebe badi ne disanka.’ (1 Bakelenge 10:4-8) Kakamba ne: bena mudimu ba Solomo bavua ne disanka bua bubanji buvua bubanyunguluke, nansha muvuabu nabu to. Kadi, basadidi ba Solomo bavua ba diakalenga bualu dîba dionso bavua mua kuikala bateleja meji a Solomo avua Nzambi mumupeshe. Mukalenge-mukaji wa ku Sheba ntshilejilu tshilenga bua bantu ba Yehowa lelu’eu, badi basankila mu meji a Mufuki nkayende ne a Muanende Yezu Kristo!
Bualu bukuabu bua mushinga mmêyi akalua mukalenge-mukaji kuambila Solomo pashishe ne: “Yehowa, Nzambi webe, . . . atumbishibue.” (1 Bakelenge 10:9) Bushuwa, wakamona se: Yehowa ke uvua mupeshe Solomo meji ne bubanji. Malu aa adi umvuangana ne tshikavua Yehowa mulaye bena Isalele kumpala. Wakamba ne: ‘Nulame mêyi anyi, nanku nenuikale bantu ba meji ne lungenyi ku mêsu kua bantu ba bisamba bikuabu. Bantu aba pamanyabu mêyi enu onso nebambe ne: “Kakuena tshisamba tshikuabu tshia meji ne lungenyi bu tshisamba etshi tshinene!”’—Dutelonome 4:5-7, MMM.
Badi balua kudi Mufidi wa meji
Mu bikondo bietu ebi, bantu miliyo mivule mbalue mu bulongolodi bua Yehowa bualu mbajingulule ne: “Isalele wa Nzambi” udi “tshisamba tshia meji ne lungenyi,” ki nku tshifukilu to, kadi bualu mikenji ne mêyi mapuangane a Nzambi bidi bitshilombola. (Galatia 6:16, NW) Bungi bua bantu badi batambule budi buleja ne: mu bidimu bidi panshi ebi bayidi bapiabapia binunu nkama ne nkama badi bambila Isalele wa mu nyuma tshidimu tshionso ne: ‘Tudi basue kuya nebe, bualu bua tuakumvua ne: Nzambi udi nebe.’ (Zekâya 8:23) Bapiabapia aba badi bakema padibu bamona biakudia bia mu nyuma bia dinono bidi Yehowa muteke kumpala kua basadidi bende. Kabavua banji kumona bia mushindu’eu mu bitendelelu muvuabu kale nansha.—Yeshaya 25:6.
Tupeshayi Mufidi mutambe bunene
Bu mudibu babapeshe bintu bivule, bantu bena dianyisha batu pa tshibidilu bakeba tshidibu mua kupingajila Mukalenge ne Mufidi wa mapa mutambe bunene, Yehowa Nzambi. Bible udi uleja ne: dipa ditambe bulenga ditudi mua kupesha Yehowa ‘mmulambu wa kumutumbisha nawu.’ (Ebelu 13:15) Bua tshinyi? Bualu mulambu eu mmusuikila buludiludi ku dipandisha dia mioyo, tshipatshila tshinene tshidi natshi Yehowa mu tshikondo etshi tshia ku nshikidilu. (Yehezekele 18:23) Kabidi, makanda a mubidi ne mêba bidi muntu ufila bua kuambuluisha babedi, bantu badi babungame ne bakuabu mmulambu udi muanyishibue.—1 Tesalonike 5:14; Ebelu 13:16; Yakobo 1:27.
Mapa a makuta adi ambuluisha bikole. Adi afila mushindu wa kupatula Bible ne mikanda idi imumvuija ne wa kupeta miaba idi bena Kristo mua kuenzela bisangilu. (Ebelu 10:24, 25) Mapa adi kabidi apetesha makuta a kuambuluisha nawu bantu badi bakenga bua mvita ne bua bipupu bia ku bintu bifuka.
Bua kutuleja mushindu wa kufila mapa, Dîyi dia Nzambi didi difila amue mêyi malenga adi atuludika. Tshilejilu, didi ditulongesha ne: bena Kristo kabena bafila makuta bungi kampanda bujadika to, kadi badi bafila tshidibu natshi, ku budisuile, ne mutshima wa disanka. (2 Kolinto 9:7) Bamue badi mua kufila bia bungi; bakuabu badi mua kufila anu bikese, amu bu mukaji mukamba muena dikenga wa mu tshikondo tshia Yezu. (Luka 21:2-4) Eu kawenaku muanda wa dikema bua mudi Yehowa, Muena bintu bionso, wangata ne mushinga dipa dionso ne mulambu wonso bidi bantu bafila bua dîna diende anyi?—Ebelu 6:10.
Bua kumonabu mua kufila ne disanka, bantu ba Yehowa batu bapeta mamanyisha pa majinga kabukabu ne pa mishindu mimpe ya kuakumbaja. Pashishe spiritu wa Yehowa utu usaka mitshima ya bena budisuile bua kufila mapa. Ke muvuabu benza mu Isalele wa kale pavuabu bibaka tabernakle ne pashishe pakibakabu ntempelo. (Ekesode 25:2; 35:5, 21, 29; 36:5-7; 39:32; 1 Kulondolola 29:1-19) Mu bidimu lukama bia kumpala B.B., ngenzelu wa muomumue wakambuluisha bena Kristo bua kupeta bintu bivuabu bakengela bua kufikisha lumu luimpe lua Bukalenge mu bisamba bia bende ne kuambuluisha bana betu bavua mu Isalele tshikondo tshivuaku tshiyole tshia nzala.—1 Kolinto 16:2-4; 2 Kolinto 8:4, 15; Kolosai 1:23.
Ke mudibi kabidi lelu, Yehowa mmubeneshe bantu bende ne neatungunuke ne kubabenesha, pa kubapesha bidibu nabi dijinga bua kujikija mudimu munene wa kuyisha ne kulongesha utu bantu kabayi banji kumona.—Matayo 24:14; 28:19, 20.
Mmajinga kayi adiku lelu?
Mu bidimu bidi panshi ebi, mbele Bantemu ba Yehowa ku mikanda ya mbulamatadi mu matunga a bungi muvuabu bakandike mudimu wabu. Ke bua tshinyi bungi bua bamanyishi mbuvule bikole mu amue a ku matunga aa. Nanku bidi biumvuika ne: kudi dijinga dinene dia mikanda idi yumvuija Bible.
Kabidi bidi bikengela Nzubu ya Bukalenge. Mpindieu bidi bikengela Nzubu ya Bukalenge mitue ku 9 000 pa buloba bujima. Tuetu tuibaka Nzubu wa Bukalenge umue ku dituku dionso, nebituangate bidimu bipite pa 24 bua kukumbaja majinga adiku lelu aa! Patudi tuamba apa, bisumbu bipiabipia bitue ku muanda-mutekete bidi biledibua dituku dionso, ne bivule bia kudibi bidi mu matunga mudi bantu bikale ne dikenga dia makuta. Ku lukuabu luseke, miaba mivule kayena nansha ilomba nzubu ya makuta a bungi to. Mu imue miaba, Nzubu wa Bukalenge udi mukumbane ne udi muikale bumanyishi buimpe kudi bantu ba miaba eyi udi mua kujika ne makuta ki mangi ki mangi: dolare 6 000.
Mu bidimu lukama bia kumpala, bamue bena Kristo bavua ne makuta a bungi kupita bakuabu, ke bua tshinyi mupostolo Paulo wakafunda ne: ‘bualu bua kukelemeja majitu; dikumbana dia bintu bienu dikale dikuatshisha dia dikepa dia bintu biabu mu tshikondo tshia mpindieu, ne dikumbana diabu kabidi dikale dikuatshisha dia dikepa dia bintu bienu; nunku majitu enu neakelemejibue.’ (2 Kolinto 8:14) Lelu’eu, ‘dikelemeja’ dia muomumue didi dipetesha makuta adi akengedibua bua kumona mua kupatula Bible, mikanda idi imumvuija, Nzubu ya Bukalenge, bua kuambuluisha badi mu dikenga ne bintu bikuabu miaba ya bungi pa buloba. Dipa dia mushindu’eu didi disankisha muntu udi udifila ne eu udi udipeta!—Bienzedi 20:35.
Anu mutu mikanda idi bantu ba kalolo bafundila Société ileja, babadi ba bungi ba tshibejibeji etshi batu bajinga bua kuambuluisha, kadi ki mbajadike mishindu mishilangane idibu mua kufila mapa aa to. Kakuyi mpata, malu adi mu kazubu kalamika ku tshiena-bualu etshi neandamune nkonko yabu.
Mu bukokeshi bulenga bua Solomo, ‘bakalenge bonso ba pa buloba’ bakumvua lumu luende bakalua kumuendela buenyi. Kadi, Bible udi utela anu mukalenge umuepele: mukalenge-mukaji wa ku Sheba. (2 Kulondolola 9:23) Uvua muenze madikolela a bungi. Kadi wakapeta masanka a bungi—mavule menemene mu mushindu wa se: ku ndekelu kua dikumbula diende, wakashala ‘lungenyi lumushikile.’—2 Kulondolola 9:4, MMM.
Mu matuku atshilualua, Yehowa, Mukalenge ne Mufidi wa mapa mutambe bunene, neenze bia bungi bua bantu badi benza madikolela buende Yeye kupita bivua Solomo muenze. Nenku bantu aba nebashale ‘lungenyi lubashikile,’ bualu Yehowa kakubakuba patupu mu dituku diende didi dikuatshisha buôwa dikalaye mua kulumbuluisha, kadi panyima padi ‘neabulule tshianza tshiende bua kukutshisha bidi ne muoyo bionso ne bilenga biende.’—Musambu 145:16, MMM.
[Kazubu mu dibeji 22]
Mishindu idi bamue basungula bua kufila
MAPA BUA MUDIMU WA PA BULOBA BUJIMA
BANTU bavule batu bateka mfranga ku luseke anyi balongolola bua kuyela mu tushete tua mapa tudibu bafunde ne: “Mapa bua mudimu wa pa buloba bujima wa Société—Matayo 24:14.” Ngondo yonso bisumbu bitu bituma mfranga eyi ku tshilombuelu tshia buloba bujima ku Brooklyn, mu New York, peshi ku biro bia filiale udi utangila ditunga diabi.
Nudi mua kutuma kabidi mapa a budisuile a mfranga buludiludi ku Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, anyi ku biro bia Société bidi biambuluisha ditunga dienu. Nudi mua kufila nansha bilengejilu peshi bintu bikuabu bia mushinga. Nudi ne bua kutuma mapa aa pamue ne mukanda mufunda mu tshikoso udi uleja ne: aa mmapa a buludiludi.
DILONGOLOLA DIA MAPA MAFILA NE DÎYI
Muntu udi mua kupesha Société Watch Tower mfranga bilondeshile dilongolola dia pa buadi, bua se: dîba didi muyifidi muikale nayi dijinga, bamupingajileyi. Bua mamanyisha makuabu, suaku ufundile Treasurer’s Office mu adrese mufunda kuulu eku.
DILONGOLOLA DIA KALOLO
Kusakidila ku mapa a mfranga mafila buludiludi ne mapa mafila ne dîyi, kudi mishindu mikuabu ya difila bua kuambuluisha mudimu wa Bukalenge wa pa buloba bujima. Imue ya kudiyi ng’eyi:
Tshieya: Muntu udi mua kupesha Société Watch Tower bukenji bua kuangata mfranga ya tshieya anyi ya pansio bua kuenzaye nayi mudimu.
Konte ya ku banke: Konte ya ku banke, mikanda ya mfranga mitekesha, anyi konte ya mfranga ya pansio wa muntu, badi mua kuyifunda mu dîna dia Société Watch Tower anyi kuyivuija ya kufuta dîba dia lufu kudi Société, mu diumvuangana ne malu-malomba a banke wa muaba udiye.
Lupetu ne nsombu: Badi mua kupesha Société lupetu ne nsombu (titres et obligations) bu dipa dia buludiludi anyi bilondeshile ndongoluelu kampanda muenza bua kutungunuka ne kufuta makasa kudi mufidi.
Nzubu: Badi mua kupesha Société Watch Tower nzubu udiye mua kusumbisha bu dipa dia buludiludi peshi bua kulaminaye mufidi nzubu, yeye eu udi mua kutungunuka ne kusombamu patshidiye ne muoyo. Bidi bikengela kumanyisha Société kumpala kua kumupesha dipa dia nzubu.
Bumpianyi ne bintu bitekesha: Badi mua kushila Société Watch Tower nzubu anyi mfranga ku diambuluisha dia mukanda wa bumpianyi mumanya kudi Mbulamatadi, peshi badi mua kufunda dîna dia Société mu mukanda wa tshipungidi bu udi ne bukenji bua kuangata bintu bitekesha (contract de fideicommis). Bintu bitekesha mu dîna dia bulongolodi bua malu a Nzambi bidi mua kukepeshisha mushinga wa bitadi.
Anu bu mudi tshiambilu tshia “dilongolola dia kalolo” tshiumvuija, mishindu eyi ya mapa idi payi ilomba bua mufidi adianjile kudilongolola. Bua kuambuluisha bantu badi bajinga bua kukuatshisha Société ku butuangaji bua mushindu kampanda wa dilongolola dia kalolo, Société mmupatule broshire mu Anglais udi ne tshiena-bualu tshia: Planned Giving to Benefit Kingdom Service Worldwide (Mapa malongolola bua kukuatshisha mudimu wa Bukalenge wa pa buloba bujima). Bavua bafunde broshire eu bua kuandamuna ku nkonko ya bungi idibu bele Société bua mapa, bumpianyi ne bintu bitekesha. Broshire eu udi kabidi ne mumvuija makuabu adi ne mushinga bua nzubu, mfranga ne dilongolola dia bitadi. Ne mmuenza bua kuambuluisha bantu ba mu États-Unis badi balongolola bua kupesha Société dipa dia pa buadi mpindieu anyi bua kumushila bintu dîba dia lufu, bua kusungula mushindu udi mutambe buimpe ne muakanyine bua kufila mapa aa bilondeshile mêku ne nsombelu yabu. Udi mua kupeta broshire eu pa kumulomba buludiludi ku biro bia Charitable Planning Office.
Bamane kubala broshire eu ne bayukile ne aba badi benza mudimu ku biro bia Charitable Planning Office, bantu ba bungi mbambuluishe Société ne kabidi badi bakepeshisha mushinga wa bitadi mu dienza nunku. Bidi bikengela kumanyisha biro bia Charitable Planning Office ne kubitumina mukanda udi ujadika malu adi atangila ndongoluelu eyi. Biwikale musue kumanya ndongoluelu eyi ya difila dionso dilongolola dia kalolo, udi ne bua kufundila biro bia Charitable Planning Office anyi kuela nshinga mu adrese udi kuinshi eku peshi ku biro bia Société bidi biambuluisha ditunga dienu.
CHARITABLE PLANNING OFFICE
Watch Tower Bible and Tract Society of Pennsylvania
100 Watchtower Drive, Patterson, New York 12563-9204
Telefone: (914) 306-1000
[Bimfuanyi mu dibeji 23]
Mapa a budisuile adi ambuluisha midimu ya Bantemu ba Yehowa