Nkonko ya babadi

Yezu wakamba ne: ‘Muntu yonso unuajimijila mibi yende, neyijimijibue; muntu yonso unudi kanuyi nuyijimijila, neyishale kudiye.’ Mêyi aa adi umvuija ne: bena nkristo badi mua kujimijilangana mibi anyi?

Kakuena tshishimikidi tshia mu Mifundu bua kukoma se: bena nkristo mu tshi-bungi, anyi mene bakulu batekibue mu bisumbu, badi ne bukenji bua kudi Nzambi bua kujimijilangana mibi. Pabi, tshivua Yezu muambile bayidi bende mu Yone 20:23, mutela kuulu eku, tshidi tshileja ne: Nzambi wakapesha bapostolo makokeshi a pa buawu pa bualu ebu. Ne tshiambilu tshia Yezu apa tshidi mua kuikala mu diumvuangana ne tshivuaye muambe mu Matayo 18:18 pa bidi bitangila mapangadika a mu diulu.

Bena nkristo badi mua kulekelelangana bimue bilema, mu diumvuangana ne mubelu wa mupostolo Paulo mufunda mu Efeso 4:32: ‘Nulejangane kalolo, nuikalangane ne mitshima ya luse, nulekelangane malu mabi enu bu muakanulekelela Nzambi malu mabi enu mu Kristo.’ Apa Paulo uvua wakula pa bidi bitangila ntatu pankatshi pa bena nkristo nkayabu, bu mudi biakulakula. Badi ne bua kuenza madikolela bua kujikija bilumbu ebi, pa kufuilangana luse. Vuluka mêyi a Yezu aa: ‘Pautshidi ufila kupa kuebe ku tshishipelu ne biwavuluka ne: muanetu udi nanyi bualu, ushiye kupa kuebe kumpala kua tshishipelu, uye biebe, ulengeje nende; pashishe ulue, ufile kupa kuebe.’​—Matayo 5:23, 24; 1 Petelo 4:8.

Kadi, mêyi adi manyunguluke Yone 20:23 adi aleja ne: Yezu uvua mutume lungenyi ku mpekatu mipite bunene, bu mudibi bileja kudi bikuabu biakambilaye pashishe bateleji aba basunguluke. Tuanji kutangila bua tshinyi.

Dituku diakabiishibuaye, Yezu wakamuenekela bayidi mu nzubu kampanda mukanga mu Yeruzaleme. Muyuki mufunda udi wamba ne: ‘Yezu wakabambila kabidi ne: Ditalala dikale kunudi; bu muakantuma Tatu, nunku mundi nutuma. Pakambaye dîyi edi, wakabela mupuya, wakabambila ne: Nuangate [spiritu munsantu, NW]; muntu yonso unuajimijila mibi yende, neyijimijibue; muntu yonso unudi kanuyi nuyijimijila, neyishale kudiye.’​—Yone 20:21-23.

Pamu’apa, bayidi aba batela bavua bonso bapostolo ba lulamatu. (Fuanyikija ne mvese wa 24.) Pa kubela mupuya ne kuamba ne: ‘Nuangate spiritu munsantu,’ Yezu wakamanyisha ku tshienzedi etshi se: mu katupa kîpi bavua ne bua kubiitshikijila spiritu munsantu. Yezu wakatungunuka ne kuamba ne: bavua ne bua kuikala ne bukenji budi butangila dilekelela mpekatu. Mu mushindu mumvuike, biambilu biende ebi bibidi mbisuikakaja, tshimue tshifikisha ku tshidi tshilonda.

Matuku 50 biangatshile ku dibiishibua diende, dituku dia Pentekoste, Yezu wakiitshikija spiritu munsantu. Ntshinyi tshiakakumbaja bualu abu? Dikumbaja dimue divua dia se: aba bakapeta spiritu bakaledibua tshiakabidi bu bana ba mu nyuma ba Nzambi bikale ne ditekemena dia kuikala bakokeshi pamue ne Kristo mu diulu. (Yone 3:3-5; Lomo 8:15-17; 2 Kolinto 1:22) Kadi diitshikijibua adi dia spiritu diakenza bipitshidile. Bamue bamupetshi bakapeta makokeshi a kuenza bishima. Ku mushindu au bamue bavua mua kuakula mu miakulu mienyi ivuabu kabayi bamanye. Bakuabu bavua mua kudianjila kumanyisha malu. Ne bakuabu kabidi bavua mua kuondapa babedi anyi kubiisha bafue.​—1 Kolinto 12:4-11.

Bu muvua mêyi a Yezu mu Yone 20:22 afunkuna diitshikijibua edi dia spiritu munsantu pa bayidi, mêyi ende masuikakaja ku dijimijilangana mpekatu mmamueneke bu àdì asua kumvuija ne: bapostolo bakavua bamane kupetela kudi Nzambi mu mêyi awu ku diambuluisha dia tshienzedi kampanda tshia spiritu bukokeshi bua pa buabu bua kujimijilangana anyi kubenga kujimijilangana mpekatu.​—Tangila Tshibumba tshia Nsentedi (mu Anglais) tshia mu dia 1 Luabanya 1949, dibeji dia 78.

Bible kêna utulondela muyuki mujima wa malu menza musangu wonso uvua bapostolo batumike ne bukenji bua mushindu’eu, ne kêna kabidi mufunde misangu yonso ivuabu batumike ne dipa dia kuenza bishima pa kuakula mu miakulu, kudianjila kumanyisha malu, anyi kuondapa.​—2 Kolinto 12:12; Galatia 3:5; Ebelu 2:4.

Bualu bumue buakatangila bukenji bua bapostolo bua kujimijilangana mpekatu anyi kubenga kujimijilangana mpekatu buvua butangila Ananiase ne Safira, bavua basue kudinga spiritu. Petelo, eu wakumvua Yezu upatula mêyi atudi tubala mu Yone 20:22, 23, wakela Ananiase ne Safira patoke. Kumpala Petelo wakakula ne Ananiase, ne wakafua diakamue. Pakabuela Safira pashishe ne kutungunuka amu ne dishima, Petelo wakamanyisha dilumbuluishibua diende. Petelo kakamujimijila mpekatu wende, kadi wakamba ne: ‘Tangila, makasa a bakujika bayebe adi ku mbelu, nebalopoke nebe.’ Yeye pende wakafua diakamue.​—Bienzedi 5:1-11.

Muaba’eu mupostolo Petelo wakatumika ne bukenji bua pa buabu bua kuleja dibenga dijima bua kujimijilangana mpekatu, dimanya dia dikema dia se: Nzambi kavua mua kulekelela mpekatu wa Ananiase ne Safira. Bapostolo mbamueneke kabidi bu bavua ne bujinguludi bupite bua bantu mu mianda ivuabu bajadike se: mpekatu ivua mijimijibue pa tshishimikidi tshia mulambu wa Kristo. Nunku bapostolo aba bàvuà ne bukole bua spiritu bavua mua kumanyisha dijimijibua anyi dibenga kujimijibua dia mpekatu.a

Ebi ki mbua kuamba ne: bakulu bonso bedibue manyi a spiritu mu tshikondo atshi bavua ne bukenji bua dikema bua mushindu’eu. Tudi mua kubimuenena ku tshiakamba mupostolo Paulo pa bidi bitangila muntu uvua muipatshibue mu tshisumbu tshia bena Kolinto. Paulo kakamba ne: ‘Ndi njimijila muntu au mpekatu yende’ anyi mene se: ‘Ndi mumanye ne: muntu au bakadi bamane kumufuila luse mu diulu, nunku muanyishayi tshiakabidi.’ Bishilangane, Paulo wakabela tshisumbu tshijima bua kufuila muena nkristo eu udi mupingajibue luse ne kumuleja dinanga. Paulo wakasakidila ne: “Kudi muntu unudi nulekelela bualu buonso, meme nemulekelelebu kabidi.”​—2 Kolinto 2:5-11.

Diakamue pavua muntu eu upingajibua mu tshisumbu, bana betu bonso bena nkristo bavua mua kumufuila luse mu ngumvuilu wa se: kabavua ne bua kumuminyina kabidi dijita bua tshivuaye muenze. Kadi, diambedi uvua ne bua kuanji kunyingalala ne kupingajibua. Mmunyi muvuabi mua kuenzeka?

Kudi mpekatu minene idi bakulu ba tshisumbu ne bua kukonkonona, bu mudi buivi, dishima, anyi tshiendenda tshibiatshibi. Badi bateta bua kuakaja ne kubela benji ba bubi ba mushindu’eu, pa kubasaka ku dinyingalala. Kadi bikala kampanda utungunuka ne kuenza mpekatu munene kayi unyingalala, bakulu aba badi balonda buludiki bua Nzambi bua kuipata muenji wa bubi eu. (1 Kolinto 5:1-5, 11-13) Tshivua Yezu muambe mu Yone 20:23 ki ntshikumbanyine mu malu a mushindu’eu. Bakulu aba kabena ne mapa a bishima a spiritu, bu mudi dikumbana bua kuondapa badi ne bubedi bua mubidi anyi kubiisha bafue; mapa au akakumbaja tshipatshila tshiawu mu siekele wa kumpala ne pashishe akajika. (1 Kolinto 13:8-10) Kupita apu, bakulu lelu’eu kabena ne bukenji bua kudi Nzambi bua kulekelela bubi bunene mu ngumvuilu wa kuamba muenji kampanda wa mpekatu munene se: mmukezudibue ku mêsu kua Yehowa. Mushindu eu wa dijimijila mibi udi ne bua kushindamena pa mulambu wa tshia-bupikudi, ne amu Yehowa nkayende ke udi mua kujimijilangana mibi pa tshishimikidi atshi.​—Musambu wa 32:5; Matayo 6:9, 12; 1 Yone 1:9.

Bu mu bualu bua muntu wa mu Kolinto wa kale, padi muenji wa mpekatu munene ubenga bua kunyingalala, udi ne bua kuipatshibua. Bikalaye mua kunyingalala pashishe ne kuenza midimu idi ileja dinyingalala, dijimijila mibi dia kudi Nzambi didi mua kuikalaku. (Bienzedi 26:20) Mu nsombelu wa mushindu’eu, Mifundu idi ipesha bakulu kabingila ka kuitabuja ne: Yehowa mmufuile bushuwa muenji wa bubi eu luse. Nunku, diakamue padi muntu’eu upingajibua, bakulu badi mua kumutuadila diambuluisha dia mu nyuma bua kuvuaye mushindame mu ditabuja. Bena mu tshisumbu bakuabu badi mua kumufuila luse mu mushindu wa muomumue ne uvua bena nkristo bena Kolinto bafuile muntu uvua muipatshibue luse, eu wakalua kupingajibua pashishe.

Pa kukosa bilumbu mu mushindu eu, bakulu kabena bateka mêyi-makulu abu buobu bine a dilumbuluisha. Badi batumikila mêyi-maludiki a mu Bible ne balonda menemene ngenzelu ya mu Mifundu idi Yehowa muteke. Nunku, dilekelela mpekatu anyi dibenga kulekelela mpekatu kayi dionso kudi bakulu didi ne bua kuikala mu ngumvuilu wa mêyi a Yezu mu Matayo 18:18 (NW): “Bulelela ndi nnuambila ne: Bintu kayi bionso binudi mua kusuika pa buloba nebikale bintu bisuika mu diulu, ne bintu kayi bionso binudi mua kusulula pa buloba nebikale bintu bisulula mu diulu.” Bienzedi biabu bidi ne bua kuleja amu mmuenenu wa malu wa Yehowa bu mudiye muleja mu Bible.

Nunku’eu, tshivua Yezu muambe, anu bu mudibu bafunde mu Yone 20:23, ki ntshibengangane ne Mifundu mikuabu, kadi tshidi tshileja ne: bapostolo bavua ne bukenji bua pa buabu buvua butangila dijimijilangana mibi, mu diumvuangana ne mudimu wabu wa pa buawu mu tshikondo tshitshivua tshisumbu tshia bena nkristo ku buana.

[Mêyi adi kuinshi]