Mishindu ya kualabaja mudimu webe

PAKAKUMBANA tshikondo tshia Yezu kutuma bayidi bende bua kuyisha Bukalenge bua Nzambi, wakabambila ne: “Bia kunowa bidi bia bungi, kadi bena mudimu mbakese.” Bu muvua mudimu wa kuenza wa bungi, wakabambila kabidi ne: “Lombayi Mfumu wa dinowa bua atume bena mudimu mu dinowa diende.” (Mat. 9:37, 38) Yezu wakaleja bayidi bende mushindu wakukumbaja mudimu wabu. Mêyi ende a ne: “Kanuakutuangaja bimenga bionso bia mu Isalele Muana wa muntu kayi mufike nansha,” avua aleja muvuabi bikengela kuwenza ne lukasa.​—Mat. 10:23.

² Lelu eu kabidi kudi bia bungi bia kuenza mu mudimu wa diyisha. Dîba dikadi diye bikole, ne kumpala kua nshikidilu kuluaye, badi ne bua kuyisha lumu luimpe lua Bukalenge. (Mâko 13:10) Bu mudi budimi buikale bantu, nanku nsombelu utudi tusanganyibua udi anu bu wa Yezu ne bayidi bende, kadi wetu teritware yeye mmualabale bikole. Tudi bakese patudi tudifuanyikija ne miliyare ya bantu badi pa buloba lelu, kadi tudi bashindike ne: Yehowa neatuambuluishe. Nebayishe lumu luimpe lua Bukalenge pa buloba bujima, ne nshikidilu nealue pa dîba didi Yehowa mulongolole. Netuteke Bukalenge bua Nzambi pa muaba wa kumpala mu nsombelu wetu bua kukumbaja mudimu wetu bimpe menemene anyi? Mbipatshila kayi bia mu nyuma bitudi mua kudifundila bua kukumbaja mudimu eu?

³ Yezu wakaleja tshidi Yehowa ulomba mutendeledi wende yonso ukadi mudilambule kudiye, pakambaye ne: “Udi ne bua kunanga Yehowa Nzambi webe ne muoyo webe wonso ne anyima webe yonso ne lungenyi luebe luonso ne bukole buebe buonso.” (Mâko 12:30) Mbatulombe bua kuenzela Nzambi mudimu ne anyima wetu yonso. Bidi biumvuija ne: tudi tuleja mutudi balamate Yehowa bikole ne mutudi badilambule kudiye ne muoyo mujima patudi tudifila ne muetu muonso mu mudimu wende. (2 Tim. 2:15) Yonso wa kutudi udi ne mishindu ya bungi ya kuenza mudimu eu bilondeshile nsombelu ne mamanya adiye nawu. Suaku ukonkonone imue ya kudiyi ne usungule bipatshila bia mu nyuma biudi mua kudifundila mu mudimu webe.

KUIKALA MUMANYISHI MU TSHISUMBU

⁴ Muntu yonso udi witaba bulelela udi upeta diakalenga dia kuyisha lumu luimpe. Eu ke mudimu mutambe bunene uvua Yezu mupeshe bayidi bende bua kuenza. (Mat. 24:14; 28:19, 20) Pa tshibidilu, muyidi wa Yezu Kristo utu ubangisha kuambila bakuabu lumu luimpe diakamue padiye ulumvua. Ke tshivua Andele, Filipo, Kônelio ne bakuabu benze. (Yone 1:40, 41, 43-45; Bien. 10:1, 2, 24; 16:14, 15, 25-34) Mbuena kuamba ne: muntu udi mua kuambila bakuabu lumu luimpe nansha kayi muanji kubatijibua anyi? Eyowa. Padi muntu ukumbaja malu malomba bua kuikala mumanyishi udi kayi muanji kubatijibua mu tshisumbu, udi mua kutuadija kuyisha ku nzubu ne ku nzubu. Bilondeshile nsombelu wende, udi kabidi mua kuyisha mu mishindu mikuabu ya mudimu wa buambi eu.

⁵ Kakuyi mpata mumanyishi yeye mumane kubatijibua, neajinge kuenza muende muonso bua bakuabu bamanye pabu lumu luimpe. Bantu bonso, balume ne bakaji, badi ne diakalenga dia kuenza mudimu udi Nzambi mutupeshe eu. Kuenza mudimu nansha mukese bua kutungunuja malu a Bukalenge bua Nzambi ndiakalenga dinene. Bulelela, muntu yonso udi witaba majitu makuabu bua kualabaja mudimu wende neapete disanka.

KUENZA MUDIMU MUABA UDIBU DIJINGA NE BAMANYISHI BA BUNGI

⁶ Udi mua kuikala mu tshisumbu tshidi ne teritware udibu bayisha ne bafila bumanyishi bikole. Bikalabi nanku, imue misangu udi mua kukeba bua kuya muaba udibu dijinga ne bamanyishi ba bungi bua kualabaja mudimu webe. (Bien. 16:9) Biwikala mukulu anyi musadidi wa mudimu, kudi mua kuikala tshisumbu tshikuabu tshiudi mua kuambuluisha. Mutangidi wenu wa tshijengu udi mua kukuleja amue malu bua mushindu uudi mua kuambuluisha tshisumbu tshikuabu mu tshijengu tshienu. Wewe musue kuya kuambuluisha muaba mukuabu mu ditunga dienu, biro bia filiale bidi mua kukumanyisha amue malu a mushinga.

⁷ Udi musue kuya kuambuluisha mu ditunga dikuabu anyi? Biobi nanku, mbimpe welangane meji bikole kumpala kua kuya. Udi mua kuyukila kabidi ne bakulu ba mu tshisumbu tshienu bua bualu ebu. Kakuyi mpata, diumbuka diebe didi mua kushintulula nsombelu webe ne wa muntu unudi nuya nende. (Luka 14:28) Kadi wewe kuyi mulongolole bua kushalaku matuku a bungi, mbimpe wenze mudimu muaba mukuabu mu ditunga dienu.

⁸ Mu amue matunga, batu bateka bana betu batshidi bapiabapia mu bulelela bua kuikala batangidi. Bana betu ba miaba eyi batu ne budipuekeshi, ne batu balekela bakulu bakadi bamonemone malu badi bafika mu bisumbu biabu bua kulombola malu. Biwikala mukulu ujinga kuya mu ditunga dia nunku, umanye ne: tshipatshila tshiebe ki ntshia kuangata muaba wa bana betu abu to, kadi ntshia kueleshangana nabu diboko. Bakankamija bua bipatshile majitu mu tshisumbu ne baambule. (1 Tim. 3:1) Ikala ne lutulu wewe mumone ne: kabena benza amue malu bu munutu nuenza mu ditunga dienu to. Bu muudi mukulu ukadi mumonemone malu, ambuluisha bena Kristo nebe ne dimanya diudi nadi. Dîba adi biobi bikengela bua umbuke ne upingane mu ditunga dienu, bakulu ba mu tshisumbu atshi nebikale bakumbane bua kulama tshisumbu bimpe.

⁹ Kumpala kua biro bia filiale kukutumina mêna a bisumbu biudi mua kuambuluisha, Komite wa mudimu wa tshisumbu tshienu neanji kutuma mukanda wa dikulombela nawu mudimu. Badi ne bua kutuma mukanda eu nansha wewe muikale mukulu, musadidi wa mudimu, mpanda-njila anyi mumanyishi. Komite wa mudimu neatume mukanda wa dikulombela nawu mudimu pamue ne dilomba diebe buludiludi ku biro bia filiale bia mu ditunga diudi musue kuya.

KUYISHA MU MUAKULU MUKUABU

¹⁰ Bua kualabaja mudimu webe, udi mua kulonga muakulu mukuabu, bu mudi muakulu wa tumama. Wewe mudifundile tshipatshila tshia kulonga mua kuyisha mu muakulu mukuabu, yukila ne bakulu ne mutangidi wa tshijengu tshienu. Badi mua kukupesha ngenyi mimpe ne kukukankamija. Ku bulombodi bua biro bia filiale, mu bimue bijengu batu balongolola tulasa tua miakulu kampanda bua kulongesha bamanyishi ne bampanda-njila badi bakumbane bua kuyisha mu muakulu mukuabu.

MUDIMU WA BUMPANDA-NJILA

¹¹ Bamanyishi bonso badi ne bua kumanya malu atubu balomba bua kuikala mpanda-njila muambuluishi, wa pa tshibidilu ne wa pa buende ne mishindu mikuabu ya mudimu wa ku dîba ne ku dîba. Mpanda-njila udi ne bua kuikala muena Kristo mubatijibue wa tshitembu udi ne mushindu wa kuenza mêba bungi kampanda mu diyisha lumu luimpe. Komite wa mudimu wa tshisumbu ke utu witabila muntu bua kuikala mpanda-njila muambuluishi anyi mpanda-njila wa pa tshibidilu; kadi biro bia filiale ke bitu biteka muntu mpanda-njila wa pa buende.

¹² Bampanda-njila bambuluishi batu benza mudimu bua ngondo umue anyi ya bungi milondangane peshi bua tshikondo tshile bilondeshile nsombelu wabu. Bamanyishi ba Bukalenge ba bungi batu basue kuenza bumpanda-njila buambuluishi mu bikondo bia pa buabi, bu mudi tshikondo tshia Tshivulukilu anyi ngondo utu mutangidi wa tshijengu ulua mu tshisumbu tshiabu. Bakuabu batu basungula ngondo itubu mu dikisha ku mudimu. Bamanyishi bakadi babatijibue batshidi balonga badi mua kusungula pabu ngondo idibu mu dikisha. Bamanyishi badi mua kusungula bua kuenza bumpanda-njila buambuluishi bua mêba mashadile mu ngondo muisatu ne muinayi anyi ngondo udi mutangidi wa tshijengu ukumbula tshisumbu tshiabu. Nansha wewe ne nsombelu kayi, kadi muikale amu ne bikadilu bilenga ne kuyi wenza malu a bukoya, muikale ne mushindu wa kuenza mêba bungi budibu balomba, ne wela meji ne: udi mua kuikala mpanda-njila muambuluishi mu ngondo umue anyi ya bungi, bakulu nebikale ne disanka dia kukonkonona dilomba diebe bua wenze mudimu eu.

¹³ Bua kuikala mpanda-njila wa pa tshibidilu, udi ne bua kuikala mukumbane bua kuenza mêba bungi kampanda adibu balombe ku tshidimu. Mpanda-njila wa pa tshibidilu udi ne bua kukuatshishangana ne tshisumbu tshiabu. Bampanda-njila ba tshisumi badi bambuluisha tshisumbu, bualu disanka didibu nadi bua mudimu eu didi diambulukila bakuabu ne dibakankamija bua kuikalabu pabu bampanda-njila. Kadi kumpala kua wewe kuwuja dilomba bua kuikala mpanda-njila wa pa tshibidilu, udi ne bua kuikala mumanyishi wa tshitembu udi mubatijibue kukadi ngondo isambombo anyi ya bungi.

¹⁴ Bampanda-njila ba pa buabu batu nangananga babasungula munkatshi mua bampanda-njila ba pa tshibidilu benji ba mudimu wa buambi ba dilambu, badi ne bua kuitaba bua kuenza mudimu muaba wonso udi biro bia filiale bibatuma. Misangu ya bungi batu babatuma mu teritware ya kule mudibu mua kupeta bantu badi banyisha bulelela ne kuenza bisumbu bipiabipia. Imue misangu, batu babatuma mu bisumbu bidi dijinga ne diambuluisha bua kuyisha bimpe mu teritware wabi. Bamue bampanda-njila ba pa buabu badi bakulu batu babatuma mu bisumbu bidi ne bantu bakese, nansha kuoku kakuyi dijinga dia bamanyishi bavule. Batu bapesha bampanda-njila ba pa buabu makuta makese patupu bua tumue tuntu tua kudiambuluisha natu. Kudi batubu bateka bampanda-njila ba pa buabu bua tshipolo kampanda.

MUDIMU WA BUMISIONERE

¹⁵ Komite wa mudimu wa Kasumbu kaludiki ke utu uteka bamisionere, pashishe komite wa filiale wa mu ditunga didibu baya udi ubatuma bua kuenza mudimu miaba idi bantu ba bungi. Badi benza mudimu wa bungi bua kukolesha mudimu wa diyisha ne midimu ya mu tshisumbu ne kuyishindamija. Misangu ya bungi, batu balongesha bamisionere mu Kalasa ka bamanyishi ba Bukalenge. Batu babapesha miaba ya kusomba ne makuta makese patupu bua tumue tuntu tua kudiambuluisha natu.

MUDIMU WA BUTANGIDI BUA TSHIJENGU

¹⁶ Bana betu batu Kasumbu kaludiki kateka batangidi ba bijengu batu babalongesha mua kuenza mudimu eu ne batu banji bawenza bu batangidi ba bijengu bambuluishi bua bawumanye bimpe. Bana betu aba batu banange bena Kristo nabu ne banange kabidi mudimu wa buambi. Batu bampanda-njila ba tshisumi, balongi ba Bible ba muoyo umue, bangamba-malu ne balongeshi ba dipoko. Batu bilejilu bimpe mu dileja dimuma dia nyuma, batu ne nkatshinkatshi, kabayi bena malu makole, ne bikale ne busunguluji. Bikala muanetu eu ne mukaji, mukajende eu mmpanda-njila, ne udi ne bua kuikala muena Kristo wa tshitembu mu bikadilu ne mu nsombelu wende ne bantu bakuabu. Mmuyishi wa lumu luimpe wa dilambu. Mmumanye kabidi ne: mmukaji muena Kristo udi ne bua kukokela bayende, kayi wangata muaba wende anyi wangata muaba wa kumpala mu miyuki yabu to. Batangidi ba bijengu ne bakaji babu badi ne midimu ya bungi ya kuenza, nunku bana betu badi bipatshila mudimu eu badi ne bua kuikala ne makanda a mubidi mimpe. Bampanda-njila kabatu buwuja dilomba kampanda bua kuenza mudimu wa butangidi bua tshijengu to. Kadi badi baleja mutangidi wa tshijengu tshiabu dijinga diabu edi, yeye pende neabapeshe imue mibelu.

TULASA TUA MALU A NZAMBI

¹⁷ Kalasa ka bamanyishi ba Bukalenge: Kudi dijinga dia bamanyishi ba Bukalenge ba bungi bua bayishe mu teritware itubu kabayi batamba kuyisha ne bua bakoleshe bisumbu mu nyuma. Nunku bana betu ba balume ne ba bakaji badi bajike ne aba badi mu mabaka badi mua kuwuja dilomba bua bobu kubuela mu Kalasa ka bamanyishi ba Bukalenge. Padi kalasa aka kajika, badi babatuma bua baye kuenza mudimu bu bampanda-njila ba pa tshibidilu muaba udibu dijinga ne bamanyishi ba bungi mu ditunga diabu. Kadi aba badi nsombelu wabu ubanyishila, badi mua kubapesha midimu mikuabu mu ditunga diabu peshi mu ditunga dikuabu. Badi mua kutuma bakese bua kuikala bampanda-njila ba pa buabu anyi bampanda-njila ba pa buabu bua tshipolo kampanda. Bampanda-njila badi basue kubuela mu kalasa aka badi mua kumanyina malu malomba mu tshisangilu tshitubu benza mu mpungilu wa rejon.

¹⁸ Kalasa ka Gilada: Bana betu ba balume ne ba bakaji bajike ne badi mu mabaka badibu basungule bua kubuela mu kalasa aka mbamanye Anglais ne badi mu mudimu wa pa buawu wa ku dîba ne ku dîba. Mbakumbane bua kukolesha mudimu wa diyisha anyi wa kulongolola malu mu filiale ne kuwushindamija. Bakadi baleje mudibu basue kuambuluisha bena Kristo nabu ne bantu bakuabu mu mushindu muimpe bua kumanya buludiki budi Nzambi ufila mu Bible ne mu bulongolodi buende ne kubulonda. Komite wa filiale wa mu ditunga ke udi ulomba bana betu badi bakumbane bua buwuje dilomba edi. Padi bana betu aba bajikija kalasa aka badi babatuma mu teritware peshi mu biro bia filiale wa mu ditunga diabu anyi wa mu ditunga dikuabu.

MUDIMU WA KU BETELE

¹⁹ Kuenza mudimu ku Betele ndiakalenga dia pa buadi. Dîna edi Betele didi diumvuija “Nzubu wa Nzambi,” ne ndikumbanyine miaba eyi menemene bualu badi benzelamu midimu ya Nzambi. Bana betu ba balume ne ba bakaji badi ku Betele badi benza mudimu wa mushinga mukole wa dikudimuna mikanda yetu, diyipatula pa mabeji ne diyabanya. Kasumbu kaludiki kadi kangata mudimu wabu eu ne mushinga wa bungi, ne kuoku ke kadi katangila bisumbu bionso bia Bantemu pa buloba bujima ne kabilombola. Bena ku Betele ba bungi badi benza mudimu wa dikudimuna mbasombele miaba ya mu teritware wa filiale wabu mudi bantu bakula miakulu idibu bakudimuna. Ebi bidi bibambuluisha bua kumvua mudi bantu bakula dituku dionso. Badi kabidi mua kudimuenena nkayabu bikala bantu badi bumvua muakulu au mushindu udibu bawukudimuna mu mikanda.

²⁰ Midimu ya bungi idibu benza ku Betele idi ilomba makanda. Ke bualu kayi batu batamba kubikila anu bana betu ba balume batshidi bansonga bakadi badilambule ne babatijibue, badi ne bukole ne makanda a mubidi. Bikalabu bakeba bantu ku Betele mu ditunga dienu ne wewe musue kuyaku, udi mua kumanyina malu malomba kudi bakulu ba mu tshisumbu tshienu.

MUDIMU WA LUIBAKU

²¹ Dibaka Nzubu yetu ya malu a ntendelelu mmudimu wa tshijila udi mufuanangane ne mudimu wa dibaka ntempelo wa Solomo. (1 Bak. 8:13-18) Bana betu ba balume ne ba bakaji ba bungi batu bafila dîba diabu ne bintu biabu ku budisuile bua kuenza mudimu wa luibaku eu bua kuleja mudibu ne tshisumi tshia pa buatshi.

²² Udiku pebe mua kudifila ku mudimu eu anyi? Biwikala mumanyishi ukadi mubatijibue ne musue kuenza mudimu eu, bana betu badi balombola mudimu wa luibaku muaba unudi nebanyishe diambuluisha diebe ne nebakulongeshe mudimu nansha wewe ne dimanya dikese. Udi mua kuambila bakulu ba mu tshisumbu tshienu dijinga diebe dia kuambuluisha. Bamue bamanyishi bakadi babatijibue badi bakumbane mbafike too ne ku dipeta diakalenga dia kuibaka Nzubu yetu ya malu a ntendelelu ku budisuile mu matunga makuabu.

²³ Kudi mpunga ya bungi ya kudifila mu mudimu wa luibaku eu. Bamanyishi bakadi babatijibue badi bena Kristo ba tshitembu badi ne mamanya kampanda badi mua kuambuluisha bu bena budisuile mu mudimu wa luibaku padi midimu ya luibaku yenzeka pabuipi ne muaba udibu basombele. Bakuabu badi mua kuya kuambuluisha miaba ya kule bua tshikondo kampanda, ne biro bia filiale ke bidi bibasungula bua kuikalabu bena budisuile mu mudimu wa luibaku bua mbingu kutuadijila ku ibidi too ne ku ngondo isatu. Bana betu badibu bitabila bua kuenza mudimu bua tshikondo tshile badi bababikila ne: bena mudimu wa luibaku. Muena mudimu wa luibaku udibu batuma bua kuenzela mudimu mu ditunga dikuabu badi bamubikila ne: muena mudimu wa luibaku mufumine mu ditunga dikuabu. Kasumbu ka mudimu wa luibaku kadi kenza ne bena mudimu wa luibaku ne bena budisuile mu mudimu wa luibaku ke kadi kalombola mudimu wonso wa luibaku udibu bakapeshe, ne badi bakambuluisha kudi bena budisuile ba mu Tshibambalu tshia malu a luibaku a mu ditunga ne kudi bena budisuile ba mu bisumbu bidibu bibakila Nzubu. Tusumbu tua bena mudimu wa luibaku tutu tuya miaba mishilashilangane ya mu teritware wa filiale bua kuibaka.

MBIPATSHILA KAYI BIA MU NYUMA BIUDI NABI?

²⁴ Biwikala mudilambule kudi Yehowa, dijinga diebe ndia kumuenzela mudimu kashidi ne tshiendelele. Kadi mbipatshila kayi bia mu nyuma biudi nabi patudi tuakula apa? Kuikala ne bipatshila bia mu nyuma nekukuambuluishe bua kuenza mudimu bimpe ne makanda ebe anyi ne bintu bikuabu biudi nabi. (1 Kol. 9:26) Kudifundila bipatshila ebi nekukuambuluishe bua kukola mu nyuma ne kudifila bikole ku malu adi ne mushinga wa bungi paudi ujinga bua kupeta midimu mikuabu.​—Filip. 1:10; 1 Tim. 4:15, 16.

²⁵ Mupostolo Paulo wakatushila tshilejilu tshimpe tshia kulonda mu mudimu utudi tuenzela Nzambi. (1 Kol. 11:1) Paulo uvua udienzeja bikole bua kuenzela Yehowa mudimu ne bukole buende buonso. Uvua mumanye ne: Yehowa uvua mumupeteshe mpunga ya bungi bua kumuenzela mudimu. Wakafundila bena Kristo ba mu Kolinto ne: “Mbangunzuluile tshiibi tshinene tshidi tshifikisha ku mudimu.” Bidiku nanku buetu tuetu petu anyi? Eyowa, kudi mishindu ya bungi itudi mua kuenzela Yehowa mudimu pamue ne tshisumbu, nangananga mu diyisha lumu luimpe lua Bukalenge. Kadi anu bu Paulo, kubuelela ku “tshiibi tshinene” atshi kudi kulomba kutantamena “baluishi ba bungi.” (1 Kol. 16:9) Paulo uvua udikanda misangu yonso. Mona tshivuaye muambe: “Ndi nkuma mubidi wanyi ne ngulombola bu mupika.” (1 Kol. 9:24-27) Tudiku petu ne lungenyi elu anyi?

²⁶ Badi batukankamija bonso bua kukumbaja bipatshila kampanda mu mudimu wa Nzambi bilondeshile nsombelu utudi nende. Ba bungi mbadifile mu imue midimu ya ku dîba ne ku dîba lelu bualu bavua badifundile bipatshila bia mu nyuma katshia kuonso aku. Nansha patshivuabu bana, bavua babakankamija kudi baledi babu ne bantu bakuabu bua kudifundila bipatshila abi. Nunku badi basanka bikole bua kuenzela Nzambi mudimu, kabayi banyingalala bua bualu nansha bumue to. (Nsu. 10:22) Tudi mua kudifundila bipatshila bikuabu bimpe tuetu kuyisha lumingu luonso, tutuadija kuyukila ne muntu ne kulonga nende Bible, anyi tuetu tupitshisha dîba dia bungi bua kulongolola bisangilu. Kadi tshidi ne mushinga ntshia kushala mushindame mu nyuma bikole ne kukumbaja mudimu webe wa diyisha bimpe menemene. Tuetu benze nanku, netutumbishe Yehowa ne netukumbaje tshipatshila tshietu tshinene tshia kumuenzela mudimu bua kashidi.​—Luka 13:24; 1 Tim. 4:7b, 8.