Basadidi ba mudimu badi benza mudimu wa mushinga

MUPOSTOLO Paulo wakafundila tshisumbu tshia ku Filipoyi ne: “Meme Paulo ne Timote, bapika ba Kristo Yezu, kudi bansantu bonso ba ku Filipoyi badi mu buobumue ne Kristo Yezu, pamue ne batangidi ne basadidi ba mudimu.” (Filip. 1:1) Mona ne: Paulo wakatela basadidi ba mudimu. Kakuyi mpata, bana betu ba balume abu bavua bambuluisha bakulu bikole mu tshisumbu anu mudibi kabidi lelu eu. Basadidi ba mudimu badi benza midimu ya bungi idi yambuluisha batangidi ne yenza bua bulongame buikale mu tshisumbu.

² Udi mumanye basadidi ba mudimu ba mu tshisumbu tshienu anyi? Udi mumanye midimu idibu benza bua kukuambuluisha wewe pamue ne tshisumbu tshijima anyi? Kakuyi mpata, Yehowa udi wanyisha mushindu udibu badienzeja uwanyishilamu. Paulo wakafunda ne: “Balume badi benza mudimu bimpe badi badipetela muaba wa lumu ne dikima dikole dia kuakula mu ditabuja didi mu Kristo Yezu.”​—1 Tim. 3:13.

NGIKADILU IDI BIBLE ULOMBA BUA BASADIDI BA MUDIMU

³ Basadidi ba mudimu badi ne bua kuikala bena Kristo ba tshitembu, kuikala kabidi bantu bakadi bakumbane, ne benza midimu idibu babapesha bimpe. Ke tshitudi tumona mu mukanda uvua Paulo mutumine Timote bua ngikadilu idi basadidi ba mudimu ne bua kuikala nayi. Wakambamu ne: “Bia muomumue, basadidi ba mudimu badi ne bua kuikala bantu ba kunemekibua, kabayi bena mêyi abidi, kabayi badifila ku mvinyo wa bungi, kabayi ne lukuka lua bintu bipetela mu njila mubi, bikale balama bualu busokoka bua tshijila bua ditabuja ne kondo ka muoyo katoke. Bualu bukuabu, banji kuteta bantu aba bua kujadika bikalabu bakumbane; pashishe benze mudimu wa busadidi bu mudibu kabayi ne bualu budibu bababanda nabu. Basadidi ba mudimu bikale ne mukaji umue, balombola bana babu ne ba mu nzubu muabu bimpe.” (1 Tim. 3:8-10, 12) Kulonda mêyi manene adi atangila basadidi ba mudimu aa kudi kukuba tshisumbu ku malu adibu mua kutshibanda nawu bua bantu badibu bapeshe midimu ya pa buayi.

⁴ Basadidi ba mudimu nansha bobu bikale bana anyi bantu bakole, badi bayisha ngondo yonso. Anu bu Yezu, badi bayisha ne tshisumi. Nunku badi baleja mudi Yehowa utabalela bantu bua bafike ku dipanduka.​—Yesh. 9:7.

⁵ Basadidi ba mudimu badi ne bua kuikala kabidi tshilejilu tshia tshitembu mu mvuadilu, mu didilengeja, mu ngakuilu, mu bikadilu ne mu bienzedi biabu. Badi ne meji majalame adi enza bua bantu bakuabu babanemeke. Bualu bukuabu, badi bangata malanda abu ne Yehowa ne midimu idibu benza mu tshisumbu ne mushinga wa bungi.​—Tito 2:2, 6-8.

⁶ Bakadi ‘babatete bua kujadika bikalabu bakumbane.’ Nansha kumpala kua kubatekabu basadidi, bakavua badifile mu malu a ntendelelu bikole. Mbaleje mudibu bateke malu a Bukalenge pa muaba wa kumpala ne mbadiakaje bua kuenza mudimu kayi wonso udibu babapesha. Bulelela, badi tshilejilu tshimpe tshidi bena mu tshisumbu mua kulonda.​—1 Tim. 3:10.

MIDIMU ITUBU BENZA

⁷ Basadidi ba mudimu batu benza midimu mishilashilangane bua kuambuluisha bena Kristo nabu, nunku bidi biambuluisha batangidi bua kuikala ne dîba dia bungi bua kutabalela malu a dilongesha ne dilama dia mikoko. Kasumbu ka bakulu kadi kabanyina basadidi midimu bilondeshile tshidi yonso wa kudibu mua kuenza ne bilondeshile majinga a tshisumbu.

⁸ Tumonayi imue midimu itubu benza: badi mua kuteka musadidi wa mudimu umue bua kutangila malu a mikanda itudi nayi dijinga buetu tuetu ne bua mudimu wa buambi. Bakuabu badi balama dosiye wa konte, banga pabu balama dosiye wa teritware. Kudi badi bendesha mikro, badi batangila biamu bia mêyi, badi bambuluisha mu diakidilangana, ne badi bambuluisha bakulu mu mishindu mikuabu. Bu mudiku mudimu wa bungi bua kulama Nzubu wa Bukalenge ne kuenza bua ikale ne mankenda, misangu ya bungi batu balomba basadidi ba mudimu bua kuambuluisha mu midimu eyi.

⁹ Mu bimue bisumbu mutu basadidi ba mudimu ba bungi, yonso wa kudibu utu ne wende mudimu mu itudi batele eyi. Kadi padibu bakese, umue udi mua kuenza midimu mivule. Misangu mikuabu, basadidi ba mudimu ba bungi badi mua kuenza mudimu umue. Bikalabu bakese menemene, kasumbu ka bakulu kadi mua kusungula bamue bana betu ba balume ba tshitembu bakadi babatijibue bua kuenza mudimu wa mushinga eu. Nunku bana betu ba balume aba badi mua kupeta dimanya diabambuluisha pashishe pikalabu bakumbaje malu malomba bua kulua basadidi ba mudimu. Bana betu ba balume bobu kabayiku, badi mua kulomba muanetu wa bakaji wa tshitembu bua kuambuluisha mu midimu mikuabu, nansha mudibu kabayi mua kumuteka musadidi wa mudimu. Muena Kristo wa tshitembu ngewu udibu mua kuidikija bua bikadilu biende ne bua mushindu udiye udifila mu malu a ntendelelu. Udi tshilejilu bua dibuela mu bisangilu, diyisha, bua nsombelu wende wa mu dîku, bidiye usungula bua kujikija nabi lutetuku, mvuadilu ne didilengeja diende, ne bua malu makuabu kabidi.

¹⁰ Mu bisumbu mudi bakulu bakese menemene, badi mua kulomba basadidi ba mudimu badi bakumbane bua kukonkonona nkonko idi yakula bua malongesha a nshindamenu ne badi basue kubatijibua. Nkonko eyi idi mu tshisakidila “Tshitupa tshia 1: Malongesha a buena Kristo.” Kadi bu mudi “Tshitupa 2: Nsombelu wa buena Kristo” tshiakula nangananga bua malu adi atangila muntu, mukulu ke udi ne bua kutshikonkonona ne muntu.

¹¹ Biobi bikumbana, kasumbu ka bakulu kadi mua kumona ne: mbimpe kuikala kushintulula imue midimu idibu bapesha basadidi ba mudimu ne kuyipesha bakuabu. Kadi mbimpe bua muntu enze mudimu umue umue au bua tshikondo kampanda bua apiluke ne bua awumanye bimpe.

¹² Bilondeshile mudi tshisumbu tshienu, kudi mua kuikala midimu mikuabu idibu mua kupesha basadidi ba mudimu badi ‘bantu bonso bamona patoke mudibu baya kumpala.’ (1 Tim. 4:15) Kuoku bakulu bakese, badi mua kulomba musadidi wa mudimu bua kuambuluisha mutangidi wa kasumbu ka buambi, anyi misangu mikuabu badi mua kumulomba bua kuikala musadidi wa kasumbu, wenza nanku ku bulombodi buimpe bua bakulu. Badi mua kulomba basadidi ba mudimu bua kuenza imue midimu ya mu Tshisangilu tshia Nsombelu ne mudimu wetu, nansha mene kulombola Dilonga dia Bible dia tshisumbu biobi bikengela, ne kuenza miyuki ya patoke. Badi mua kubapesha midimu mikuabu padiku dijinga kampanda bobu bakumbaja malu malomba bua midimu ayi. (1 Pet. 4:10) Basadidi ba mudimu badi ne bua kudifila ku budisuile bua kuambuluisha bakulu.

¹³ Nansha mudi mudimu wabu mushilangane ne wa bakulu, udi anu mudimu wa tshijila udibu benzela Nzambi ne udi ne mushinga bua tshisumbu kuendatshi bimpe. Mu bungi bua matuku, basadidi ba mudimu bobu benze midimu yabu bimpe ne bakumbaje ngikadilu milomba bua kuikala balami ba mikoko ne balongeshi, badi mua kubalombela bua balue bakulu.

¹⁴ Wewe muikale muanetu wa balume utshidi tshitende anyi ufuma ku dibatijibua, udiku udienzeja bua kukumbaja malu malomba bua kulua musadidi wa mudimu anyi? (1 Tim. 3:1) Bu mudi bantu ba bungi balua Bantemu ba Yehowa tshidimu tshionso etshi, bidi bilomba kuikale bantu balume bakumbane badi ne ngikadilu ya buena Kristo bua kuenzabu imue midimu mu tshisumbu. Udi mua kuya kumpala paudi udienzeja bua kukolesha dijinga dia kuambuluisha bakuabu. Udi mua kuenza nanku wewe welangana meji a tshilejilu tshimpe tshia Yezu. (Mat. 20:28; Yone 4:6, 7; 13:4, 5) Dijinga diebe edi nedikole paudi upeta disanka dia kufila. (Bien. 20:35) Nunku difila bua kuambuluisha bakuabu bimpe, kulama Nzubu wa Bukalenge ne makenda anyi kuenza mudimu wa budisuile mu Tshisangilu tshia Nsombelu ne mudimu wetu. Kulumbila midimu kudi kumvuija kabidi kudienzeja bua kuikala ne ngikadilu ya buena Kristo. Bua kuyipeta, bidi bikengela kuikala ne bibidilu bimpe bia kudilongela. (Mis. 1:1, 2; Gal. 5:22, 23) Bualu bukuabu, muanetu wa balume udi ulumbila majitu udi uleja mudiye ne lulamatu ne muntu wa kueyemena padibu bamupesha midimu ya kuenza mu tshisumbu.​—1 Kol. 4:2.

¹⁵ Badi bateka basadidi ba mudimu ku diambuluisha dia nyuma muimpe bua diakalenga dia tshisumbu. Bantu bonso mu tshisumbu badi mua kueleshangana nabu diboko padibu benza midimu idibu babapeshe bua kuleja mudibu ne dianyisha bua mudimu mukole udi basadidi abu benza. Tuetu tuenza nanku, tshisumbu netshileje dianyisha bua bualu budi Yehowa mulongolole ebu bua nzubu wende ikale ne bulongame.​—Gal. 6:10.