Basadidi ba mudimu badi benza mudimu wa mushinga
1 “Bakavua badianjile kuleja mu nsombelu wabo ne: mbadifile kudi Nzambi. Bavua baleje patoke ditabuja diabo mu dimanyisha Bukalenge ne disuminyina ne mu diambuluisha bantu bakuabo bua kukolabo mu ditabuja.” Ke tshidi mukanda wa Badilongolole bua kuenza mudimu wetu bimpe, mu dibeji dia 57, wamba bua basadidi ba mudimu. Bushuwa, tshilejilu tshia mu nyuma tshifila kudi basadidi ba mudimu ntshiakanyine bua kulonda. Kuenza mudimu pamue nabu ne pamue ne bakulu ‘kudi kudiundisha mubidi mujima too ne patentamabi bu nzubu mu dinanga.’—Ef. 4:16.
2 Basadidi ba mudimu badi benza mudimu wa mushinga mu tshisumbu. Elabi meji ku midimu yabu ya mushinga idi yambuluisha! Konte, mikanda, bibejibeji, abonema ne teritware. Badi bambuluisha bua kuakidila bantu, bakaja biamu bia mêyi ne bambuluisha mu dilongolola dia Nzubu wa Bukalenge. Badi benza midimu mu Kalasa ka Mudimu wa Teokrasi ne mu Tshisangilu tshia Mudimu. Bamue ba kudibu badi mene mua kuenza miyuki ya patoke anyi kulombola bimue bisangilu bia tshisumbu. Anu bu bitupa bia mubidi, basadidi ba mudimu badi benza midimu itudi nayi dijinga.—1 Kol. 12:12-26.
3 Padi bena Kristo bakuabu bamona basadidi ba mudimu bambuluishangana ne bakulu ne lungenyi lua diumvuangana bu bitupa bia mubidi umue, banemekangana ne bumvuilangana, bidi bibakankamija bua kuenza bia muomumue. (Kolos. 4:16) Mu dikumbaja majitu abu ne lulamatu ku lumingu ne ku lumingu ne mu dileja mudibu batabalela bakuabu, badi bambuluisha bua kukolesha tshisumbu mu nyuma.
4 Tshitudi mua kuenza ntshinyi bua kuleja dianyisha dietu bua basadidi badi benza mudimu mukole? Tudi ne bua kuibidilangana ne midimu yabu mibapesha ne kuleja disua dietu dia kuambuluisha padibu netu dijinga. Tudi mua kubaleja ku mêyi anyi ku bienzedi ne: tudi tuanyisha mudimu wabu. (Nsu. 15:23) Aba badi benza mudimu mukole bua kutuambuluisha mbakanyine kubaleja dianyisha dia muoyo mujima.—1 Tes. 5:12, 13.
5 Dîyi dia Nzambi didi dileja mudimu ne malu adi malomba basadidi ba mudimu. (1 Tim. 3:8-10, 12, 13) Mudimu wabu wa tshijila udi ne mushinga mukole bua dienda dia malu mu tshisumbu. Bantu ba nunku mbakumbanyine bua tuetu kutungunuka ne kubakankamija, bualu bonso buabu badi ne “bia bungi bia kuenza mu mudimu wa Mukalenge.”—1 Kol. 15:58, NW.