TSHIBUTSHILU TSHIA MIKANDA TSHIA KU ENTERNETE tshia Watchtower
TSHIBUTSHILU TSHIA MIKANDA TSHIA KU ENTERNETE
tshia Watchtower
Tshiluba
  • BIBLE
  • MIKANDA
  • BISANGILU
  • w24 ngondo wa 9 dib. 20-25
  • Utu uteleja didimuija anyi?

Kakuena filme nansha umue mu tshitupa etshi to.

Tshilema ntshienzeke mu diambula dia filme.

  • Utu uteleja didimuija anyi?
  • Tshibumba tshia Nsentedi tshidi tshimanyisha Bukalenge bua Yehowa (Tshia kulonga)—2024
  • Tumitu tua bualu
  • Bintu bia muomumue
  • MIKOKO NE MBUJI
  • NSONGAKAJI MIDIMUKE NE MITSHIMBAKANE ITSHIVUA TUMAMA
  • NTALANTA
  • “NEBANGATE” NGANYI?
  • TELEJA DIDIMUIJA
  • ‘Nenushale batabale’ anyi?
    Tshibumba tshia Nsentedi tshidi tshimanyisha Bukalenge bua Yehowa—2015
  • Ikala mutabale ne muena mitalu!
    Tshibumba tshia Nsentedi tshidi tshimanyisha Bukalenge bua Yehowa—1999
  • “Mupika wa lulamatu” udi upita diteta bukole!
    Tshibumba tshia Nsentedi tshidi tshimanyisha Bukalenge bua Yehowa—2004
  • Dilongesha dia kushala batabale—Nsongakaji itshivua tumama
    Yezu udi njila ne bulelela ne muoyo
Tangila bikuabu
Tshibumba tshia Nsentedi tshidi tshimanyisha Bukalenge bua Yehowa (Tshia kulonga)—2024
w24 ngondo wa 9 dib. 20-25

TSHIENA-BUALU TSHIA KULONGA 38

MUSAMBU WA 25 Tshintu tshia Yehowa tshia pa buatshi

Utu uteleja didimuija anyi?

“Nebangate umue, nebashiye mukuabu.”—MAT. 24:40.

LUNGENYI LUNENE

Netukonkonone bilejilu bisatu bivua Yezu mufile ne netumone mudibi bipetangana ne tshikondo tshia dilumbuluisha dienzeka ku nshikidilu wa ndongoluelu wa malu eu.

1. Ndilumbuluisha kayi dienzeka mu matuku makese emu?

TUDI mu tshikondo tshienzeka malu a dikema! Yezu nealumbuluishe muntu yonso mu katupa kîpi emu. Yezu wakapesha bayidi bende “tshimanyinu” tshia dikalaku diende didi kadiyi dimueneka ne tshia “nshikidilu wa ndongoluelu wa malu eu” bua kumvuija malu enzeka kumpala kua tshikondo tshia dilumbuluisha. (Mat. 24:3) Tshimanyinu atshi tshidi mu Matayi nshapita wa 24 ne 25, mu Mâko nshapita wa 13 ne mu Luka nshapita wa 21.

2. Mmalu kayi atualonga mu tshiena-bualu etshi? Neatuambuluishe mushindu kayi?

2 Yezu uvua mufile bilejilu bisatu bua kutudimuija. Bilejilu abi mbiobi ebi: Tshia mikoko ne mbuji, tshia nsongakaji midimuke itshivua tumama ne ivua mitshimbakane, ne tshia ntalanta. Tshilejilu tshionso netshituambuluishe bua kumona mualumbuluishabu muntu bilondeshile malu avuaye wenza. Patudi tuenda tubikonkonona, tujingululayi malongesha atudi mua kutumikila. Tutuadijayi ne tshilejilu tshia mikoko ne mbuji.

MIKOKO NE MBUJI

3. Yezu nealumbuluishe bantu dîba kayi?

3 Mu tshilejilu tshia mikoko ne mbuji, Yezu mmumvuije mualumbuluishaye bantu bavua bapete mpunga wa kuteleja lumu luimpe ne wa kukuatshisha bana babu bela manyi. (Mat. 25:​31-46) Neabalumbuluishe mu “dikenga dinene” katupa kakese kumpala kua mvita ya Armagedone kutuadija. (Mat. 24:21) Yezu neatapulule bantu badi bakuatshisha bayidi bende bela manyi ne bantu badi kabayi babakuatshisha anu mutu mulami wa mikoko utapulula mikoko ne mbuji.

4. Bilondeshile Yeshaya 11:​3, 4, ntshinyi tshidi tshitujadikila ne: Yezu nealumbuluishe bantu mu mushindu muakane? (Tangila kabidi tshimfuanyi tshia pa tshizubu.)

4 Dîyi dia buprofete dia mu Bible didi dileja ne: Yezu udi Yehowa musungule bua kulumbuluisha bantu, nealumbuluishe ne buakane. (Bala Yeshaya 11:​3, 4.) Udi utangila bidibu benza, bidibu belela meji, ne bidibu bamba; ne udi utangila kabidi mudibu benzela bana babu bela manyi malu. (Mat. 12:​36, 37; 25:40) Yezu neamanye bantu bavua bakuatshisha bela manyi ne batua mudimu wabu mpanda.a Kuyisha ke mushindu munene udibu baleja ne: badi bakuatshisha bana babu ne Yezu. Yezu neabikile bantu badi babakuatshisha ne: “bakane” ne nebapete “muoyo wa tshiendelele” pa buloba. (Mat. 25:46; Buak. 7:​16, 17) Edi si ndifutu dia dikema diapeta bantu bashala ne muoyo mutoke! Padibu bashala ne lulamatu mu dikenga dinene, too ne panyima padi, mêna abu neashale mu “mukanda wa muoyo.”—Buak. 20:15.

Yezu musombe mu nkuasa wa bukalenge pa mutu pa buloba, mutangile bisumbu bibidi bia bantu. Bimfuanyi: Bena Kristo batendelela Yehowa. 1. Muanetu wa bakaji ne tablete ku bianza, mutangile mu diulu. 2. Muanetu wa balume ne mukajende babala Bible. 3. Bena Kristo netu benza mudimu wetu wa luibaku. 4. Muanetu wa balume mu buloko, usambila. 5. Muanetu wa bakaji mukulakaje wandamuna mu bisangilu. 6. Muanetu wa bakaji mu bulalu bua disama mu lupitadi upesha munganga trakte. 7. Tatu ulonga Bible ne dîku diende. Bimfuanyi: Bantu balume ne bantu bakaji benza malu adi abengangana ne mêyi manene a mu Bible. 1. Muntu mulume usambila mu nzubu wa manaya. 2. Muntu mulume ukuma muntu mukaji. 3. Bantu batombokela mbulamatadi, bikale ne tshiji. 4. Muntu mulume ne tshingoma wenda ulonda muntu mukaji muaba utubu batekela mashinyi. 5. Mfumu wa tshitendelelu usambidila basalayi. 6. Muntu mukaji unua bintu bidi bikuata upitshisha.

Matuku makese kumpala eku, Yezu neamanye bantu badi bu mikoko ne badi bu mbuji (Tangila tshikoso 4)


5. Tshilejilu tshia mikoko ne mbuji tshidi tshitulongesha tshinyi? Netshiambuluishe banganyi?

5 Ikala ne lulamatu. Tshilejilu tshia mikoko ne mbuji tshidi tshitangila nangananga bantu badi ne ditekemena dia kusomba ne muoyo kashidi pa buloba. Bantu aba badi bakuatshisha bana babu ne Kristo mu mudimu wa diyisha ne badi bitaba buludiki budi mupika wa lulamatu udi mudimuke ufila. Badi bitaba kabidi buludiki budi kasumbu kakese ka bela manyi badi Yezu musungule. Au ke mushindu udibu baleja ditabuja. (Mat. 24:45) Bantu badi ne ditekemena dia kuya mu diulu badi pabu ne bua kuteleja didimuija didi mu tshilejilu etshi, bualu Yezu udi utangila bidibu benza, belela meji, ne bidibu bamba. Bobu pabu badi ne bua kuikala ne lulamatu. Yezu mmufile bilejilu bikuabu bibidi bua kudimuija bela manyi. Bidi kabidi mu Matayi nshapita wa 25. Tuakulayi bua tshilejilu tshikuabu tshia nsongakaji midimuke itshivua tumama ne ivua mitshimbakane.

NSONGAKAJI MIDIMUKE NE MITSHIMBAKANE ITSHIVUA TUMAMA

6. Mmunyi muvua nsongakaji itanu itshivua tumama mileje ne: ivua midimuke? (Matayi 25:​6-10)

6 Yezu wakafila tshilejilu, wakula bua nsongakaji dikumi itshivua tumama ivua mipatuke bua kuakidila musedianganyi. (Mat. 25:​1-4) Bonso buayi ivua misue kuya ne musedianganyi mu difesto diende dia dibaka. Yezu wakaleja ne: itanu ivua “midimuke,” itanu mikuabu “mitshimbakane.” Ivua midimuke ivua midilongolole ne mikale pabuipi. Ivua midiakaje bua kushala anu mindile musedianganyi, nansha yeye mua kulua munda nkulu. Bua bualu abu, yakambula manyi a kuela mu miendu bua kayilu kujima butuku to. Ivua milame too ne makuabu ku luseke bua ne: avua mu miendu owu majike musedianganyi kayi muanji kufika, yikale ne a kuelamu bua miendu kayijimi to. Bushuwa ivua midilongolole bua miendu yayi ikale anu itema. (Bala Matayi 25:​6-10.) Pakafika musedianganyi, yakaya nende mu difesto dia dibaka. Bia muomumue, bua bena Kristo bela manyi kuikalabu badiakaje, badi ne bua kushala badimuke bikale ne lulamatu too ne palua Kristo. Dîba adi nebadisange ne musedianganyi Yezu mu Bukalenge bua mu diulu.b (Buak. 7:​1-3) Kadi netuambe tshinyi bua nsongakaji itanu ivua mitshimbakane?

7. Ntshinyi tshivua tshifikile nsongakaji itanu ivua mitshimbakane? Bua tshinyi?

7 Nsongakaji itanu mitshimbakane itshivua tumama kayivua yoyi midiakaje pakalua musediaganyi to. Miendu yayi ikavua ijima, kayivua miambule manyi makuabu a kuelamu to. Pakumvuayi ne: musedianganyi ukavua pa kueyeka, yakapatuka yenda yikeba manyi. Musedianganyi kakalua kuyisangana to, katshia yaya. Dîba adi, “nsongakaji itshivua tumama ivua midilongolole yakabuela nende mu tshibilu tshia dibaka, ne bakakanga tshiibi.” (Mat. 25:10) Pakalukila nsongakaji ivua mitshimbakane bua kubuela mu difesto, musedianganyi wakayambila ne: “Tshiena munumanye to.” (Mat. 25:​11, 12) Kayivua midilongolole bua kushala anu mindile musedianganyi muvuabi bikengela to. Bualu ebu budi bulongesha bela manyi tshinyi?

8-9. Tshilejilu tshia nsongakaji itshivua tumama tshidi tshilongesha bela manyi tshinyi? (Tangila kabidi tshimfuanyi.)

8 Ikala mudimuke ne mudilongolole. Yezu kavua wakula bua bisumbu bia bela manyi bibidi, tshia bavua badilongolole bua kuindila nshikidilu wa ndongoluelu wa malu eu ne tshia bavua kabayi badilongolole to. Kadi uvua wakula bua tshiafikila bela manyi bobu kabayi badilongolole bua kushala ne lulamatu too ne ku nshikidilu, tuambe ne: kabayi mua kupeta difutu to. (Yone 14:​3, 4) Biumvuika ne: ki mbualu bua bilele to. Nansha tuetu ne ditekemena dia kuya mu diulu anyi dia kusomba pa buloba, tuetu bonso tudi ne bua kuteleja didimuija didi mu tshilejilu tshia nsongakaji itshivua tumama. Yonso wa kutudi udi ne bua kushala mutabale ne mudilongole, mudiakaje bua kunanukila too ne ku ndekelu.—Mat. 24:13.

9 Yezu mumane kufila tshilejilu tshia nsongakaji itshivua tumama bua kushindika lungenyi lua kuikala badilongolole ne kuikala badimuke, wakafila kabidi tshilejilu tshikuabu tshia ntalanta tshidi tshileja mudibi ne mushinga bua kuikala benji ba mudimu.

Muanetu wa balume ufuanyikija ngumu idiye ulonda ku TV ne tshidiye mubale mu Bible. Tshimfuanyi tshileja nsongakaji dikumi itshivua tumama ya mu tshilejilu tshivua Yezu mufile.

Bidi ne mushinga bua yonso wa kutudi ateleje didimuija didi mu tshilejilu tshia nsongakaji itshivua tumama. Bua bualu abu, tudi ne bua kuikala badilongolole, badimuke, ne badiakaje bua kunanukila too ne ku ndekelu (Tangila tshikoso 8-9)


NTALANTA

10. Mmunyi muvua bapika babidi baleje ne: bavua ne lulamatu? (Matayi 25:​19-23)

10 Mu tshilejilu tshia ntalanta, Yezu mmuakule bua bapika babidi bavua ne lulamatu kudi mfumuabu ne bua mupika umue uvua kayi nalu. (Mat. 25:​14-18) Bapika babidi abu bavua baleje ne: bavua ne lulamatu bua muvuabu benze mudimu bikole, bavudije makuta a mfumuabu. Pavua mfumuabu ukeba kuya ku luendu ku babende, wakabapesha ntalanta, tuambe ne: makuta a bungi menemene. Bapika babidi bavua benji ba mudimu, bakenza mudimu bimpe ne makuta abu. Ke bualu kayi pakapingana mfumuabu, wakabasangana bavudije makuta au misangu ibidi. Mfumuabu wakabela kalumbandi, bobu kubuela ‘mu disanka dia mfumuabu.’ (Bala Matayi 25:​19-23.) Kadi mupika muisatu, uvua muenze yeye tshinyi ne makuta avua mfumuende mumupeshe?

11. Ntshinyi tshivua tshifikile mupika “muena lulengu”? Bua tshinyi?

11 Mupika muisatu uvuabu bapeshe ntalanta umue uvua “muena lulengu.” Mfumuende uvua musue bua enze mudimu ne ntalanta au, kadi yeye wakamujiika mu buloba. Pakalukila mfumuende, mupika au wakamupingajila anu ntalanta umue uvuaye mumupeshe au. Uvua ne meji mabi. Pamutu pa kulomba mfumuende luse bua muvuaye kayi muvudije ntalanta, wakamuamba kakuyi bualu ne: “Utu wenzejangana malu ku bukole.” Mfumuende kakamuanyisha to. Wakamunyenga ne ntalanta au, kumuipataye mu nzubu muende.—Mat. 25:​24, 26-30.

12. Bapika babidi ba lulamatu badi baleja banganyi lelu?

12 Bapika babidi ba lulamatu badi baleja bena Kristo bela manyi ba lulamatu. Mfumuabu Yezu udi ubalomba bua “kubuela mu disanka dia mfumuabu.’ Badi bapeta difutu diabu mu diulu, tuambe ne: dibishibua dia ku lufu dia kumpala. (Mat. 25:​21, 23; Buak. 20:5b) Kadi tshilejilu tshibi tshia mupika muena lulengu tshidi tshidimuija bela manyi. Mushindu kayi?

13-14. Tshilejilu tshia ntalanta tshidi tshilongesha bela manyi tshinyi? (Tangila kabidi tshimfuanyi.)

13 Ikala muenji wa mudimu. Pavua Yezu mufile kabidi tshilejilu tshia ntalanta, kavua usua kuleja ne: bela manyi bavua ne bua kulua bena lulengu to. Kadi uvua umvuija tshiabafikila bobu bajimije tshisumi tshiabu. Nebapange mua kujadika “dibikidibua ne disungudibua [diabu]” ne kabakubanyishila bua kubuela mu Bukalenge bua mu diulu to.—2 Pet. 1:10.

14 Tshilejilu tshia nsongakaji itshivua tumama ne tshia ntalanta tshidi tshileja bimpe ne: bena Kristo bela manyi bonso badi ne bua kuikala badilongolole, kushala badimuke, ne kuikala benji ba mudimu. Kadi Yezu uvua muambe bualu bukuabu bua kudimuija kabidi bela manyi anyi? Eyowa, budi mu mêyi adi mu Matayi 24:​40, 41.

Muanetu wa bakaji muela manyi ulongesha muntu mukaji Bible. Tshimfuanyi tshileja bapika ba tshilejilu tshia ntalanta tshivua Yezu mufile.

Yezu udi usanka padiye umona ne: bela manyi mbenji ba mudimu (Tangila tshikoso 13-14)d)


“NEBANGATE” NGANYI?

15-16. Mmunyi mudi Matayi 24:​40, 41 uleja mudibi ne mushinga bua bela manyi kushalabu batabale?

15 Kumpala kua Yezu kufila bilejilu bisatu abi, wakumvuija dilumbuluisha dia ndekelu dia bela manyi divua ne bua kuleja bavuabu banyishe. Wakakula bua bantu balume babidi bavua benza mudimu mu budimi ne bua bantu bakaji babidi bavua benza mudimu ku dibue dia mpelu. Bidi bimueneka ne: bonso buabu badi benza mudimu wa muomumue; kadi Yezu wakamba ne: “Nebangate umue, nebashiye mukuabu.” (Bala Matayi 24:​40, 41.) Pashishe wakambila bayidi bende ne: “Nunku, nushale batabale, bualu kanuena bamanye dituku didi Mukalenge wenu ulua.” (Mat. 24:42) Ke tshivuaye mubambile kabidi panyima pa tshilejilu tshia nsongakaji itshivua tumama. (Mat. 25:13) Malu au adi apetangana anyi? Bidi bimueneka nanku. Anu bena Kristo bela manyi ba lulamatu ke bikalabu ne bua ‘kuangata’ kudi Yezu bua kubuela mu Bukalenge bua mu diulu.—Yone 14:3.

16 Ikala mutabale. Muela manyi udi kayi ushala mutabale, kabakumusangisha pamue ne badibu ‘basungule’ to. (Mat. 24:31) Nansha tuetu ne ditekemena dia kuya mu diulu anyi dia kusomba pa buloba, tudi ne bua kuteleja didimuija dia Yezu dia kushala batabale ne kushala ne lulamatu.

17. Yehowa yeye muele muntu manyi lelu, bua tshinyi kabiena ne bua kututonda?

17 Tudi tuitaba ne: bionso bidi Yehowa wenza mbiakane bualu tudi bamumanye bimpe. Nanku Yehowa yeye muele muntu manyi matuku etu aa, kabitutondi to.c Tudi tuvuluka tshivua Yezu muambe bua bena mudimu ba pa dîba dia 11 ba mu tshilejilu tshia budimi bua tumuma tua mvinyo. (Mat. 20:​1-16) Bantu ba kumpala bavua balue kuenza mudimu bakapeta difutu dia muomumue ne bavua balue kuwenza ku ndekelu. Bia muomumue, nansha bobu bele muntu manyi dîba kayi, neapete difutu dia kuya mu diulu anu padiye ushala ne lulamatu.

TELEJA DIDIMUIJA

18-19. Mmalu kayi atudi balonge mu bilejilu bitudi bakonkonone?

18 Mmalu kayi atudi balonge? Tshilejilu tshia mikoko ne mbuji ntshileje mudibi ne mushinga bua bantu badi ne ditekemena dia kusomba ne muoyo kashidi pa buloba kushala ne lulamatu kudi Yehowa mpindieu ne mu dikenga dinene didi dienda disemena. Matuku atshilualua, Yezu neamone ne: bantu badi ne lulamatu mbakumbane bua kupeta “muoyo wa tshiendelele.”—Mat. 25:46.

19 Tudi bamone kabidi bilejilu bibidi bidi bidimuija bela manyi. Tshia nsongakaji dikumi midimuke ne mitshimbakane itshivua tumama. Itanu yakaleja muvuayi ne meji bualu ivua midilongolole ne ivua midimuke, ne midiakaje bua kushala anu mindile musedianganyi muvuabi bikengela. Kadi ivua mitshimbakane kayivua midilongolole to. Ke bualu kayi musedianganyi wakayibengela bua kubuela mu tshibilu tshia dibaka diende. Tuetu petu tudi ne bua kudilongolola, bashale bindile too ne pikala Yezu ne bua kubutula ndongoluelu wa malu eu, nansha biobi bitulomba bua kuindila tshipolu tshile. Tuvua bamone kabidi mu tshilejilu tshia ntalanta ne: bapika babidi ba lulamatu bavua benji ba mudimu. Bakenzela mfumuabu mudimu bikole, yeye kubanyisha. Kadi wakabenga mupika muena lulengu. Bidi bitulongesha tshinyi? Mbimpe tudifile mu mudimu wa Yehowa, tuye too ne ku ndekelu. Tudi bajikije ne bualu budibu balomba bela manyi bua kushalabu batabale bua ‘babangate’ kudi Yezu bua kupetabu difutu mu diulu. Bu mudibu bamanye bualu ebu, badi ne muoyo kuulu kuulu, bindile ‘disangishibua diabu’ ne Yezu mu diulu. Panyima pa mvita ya Armagedone, nebenze dibaka ne Muana wa mukoko.—2 Tes. 2:1; Buak. 19:9.

20. Bantu badi bateleja didimuija, Yehowa neabenzele tshinyi?

20 Nansha mudi dituku dia dilumbuluisha dienda disemena bikole, kakuena bualu butudi mua kumvuila buôwa to. Tuetu bashale ne lulamatu, Tatu wetu wa mu diulu udi mutunange neatupeshe “bukole budi bupite bua pa tshibidilu” bua ‘tumanye mua kuimana kumpala kua Muana wa muntu.’ (2 Kol. 4:7; Luka 21:36) Tuetu tuteleja didimuija didi mu bilejilu bia Yezu, netusankishe Tatu wetu, nansha tuetu ne ditekemena dia kuya mu diulu anyi kushala pa buloba. Ku diambuluisha dia ngasa wa Yehowa, mêna etu ‘neafundibue mu mukanda’ wa muoyo.—Dan. 12:1; Buak. 3:5.

BILEJILU EBI BIDI BITULONGESHA TSHINYI?

  • Tshia mikoko ne mbuji.

  • Tshia nsongakaji midimuke ne mitshimbakane itshivua tumama.

  • Tshia ntalanta.

MUSAMBU WA 26 Nuakabingenzela

a Tangila tshiena-bualu tshia “Ntshinyi tshitudi bamanye bua mualumbuluisha Yehowa bantu kumpala eku?” mu Tshibumba tshia Nsentedi tshia dia 5/2024.

b Bua kumanya malu makuabu, tangila tshiena-bualu tshia ‘Neushale mutabale’ anyi? mu Tshibumba tshia Nsentedi tshia dia 15/3/2015.

c Tangila Tshibumba tshia Nsentedi tshia dia 1/2020, dib. 29-30, tshik. 11-14.

d DIUMVUIJA DIA TSHIMFUANYI TSHIA PA: Muanetu wa bakaji muela manyi ulonga Bible ne nsongakaji uvuaye mupete mu buambi.

    Mikanda ya mu Tshiluba (1982-2024)
    Patuka
    Buela
    • Tshiluba
    • Tumina bakuabu
    • Biudi musue
    • Copyright © 2025 Watch Tower Bible and Tract Society of Pennsylvania
    • Malu a kulonda
    • Mikenji ya mua kulama malu masokoka
    • Biudi witaba bua kuenzekabi mu tshiamu
    • JW.ORG
    • Buela
    Tumina bakuabu