Mêyi a kanemu mmenze bu potopoto udi unulamakaja mu dibaka dienu
BUA BENA DIBAKA
3 Kanemu
TSHIDIBI BIUMVUIJA
Bena dibaka badi banemekangana badi batabalelangana nansha padibu kabayi bumvuangana mu bualu kampanda. Mukanda kampanda udi wamba ne: “Bena dibaka ba nunku kabatu bantu ba ne: ‘Anu tshindi meme muambe atshi’ to. Kadi batu anu bayukidilangana bua malu adibu kabayi ne mmuenenu umue. Batu batelejangana ne kanemu konso padi yonso wa kudibu ufila mmuenenu wende ne badi bapeta tshia kusuika bu dîyi tshidi mua kuenda bua bonso babidi.”—Ten Lessons to Transform Your Marriage.
DÎYI DINENE DIA MU BIBLE: “Dinanga . . . kadiena didikebela anu masanka adi.”—1 Kolinto 13:4, 5.
Micah udi wamba ne: “Kunemeka mukajanyi nkumutua mushinga ne kubenga kuenza bualu kayi buonso budi mua kumutashisha anyi kunyanga dibaka dietu.”
BUA TSHINYI BIDI NE MUSHINGA
Padi bena dibaka bayukidilangana kakuyi kanemu, badi mua kubanga kuambangana, kusendekangana, anyi mene kupepejangana. Bilondeshile bakebuludi, eyi nngikadilu idi idianjila kuleja ne: dibaka edi nedifue.
Brian udi wamba ne: “Kutula muena kuebe bilema, kumuamba muinshi muinshi, anyi kumuneka bua kumuseka kudi mua kumushiya katshiyi udimona ne mushinga, katshiyi ukueyemena, ne kudi kunyanga dibaka.”
TSHIUDI MUA KUENZA
DIKONKONONA
Tuma ntema ku malu audi wamba ne audi wenza mu lumingu lumue. Pashishe diebeja ne:
‘Mmisangu bungi kayi imvua muambe muena dibaka nanyi, ne mmisangu bungi kayi imvua mumuele kalumbandi?’
‘Mmu mishindu kayi misunguluke imvua mumuleje kanemu?’
YUKILA NE MUENA DIBAKA NEBE
Mmalu kayi ne mmêyi kayi bidi mua kuambuluisha yonso wa kunudi bua umvue ne: muena diende udi umunemeka?
Mmalu kayi ne mmêyi kayi bidi bienza bua yonso wa kunudi umvue ne: muena diende kena umunemeka?
MIBELU
Funda mishindu isatu iudi ujinga bua bakuleje kanemu. Lomba muena dibaka nebe enze pende nanku. Shintakajayi tubeji tuenu atu, ne ditatshishayi bua kulejangana kanemu mu malu anudi balejangane au.
Funda ngikadilu iutu wanyisha kudi muena dibaka nebe. Pashishe muambila muudi uyanyisha bikole.
Megan udi wamba ne: “Kunemeka bayanyi nkumuleja mu bienzedi ne: ndi mmutua mushinga, kabidi ne: ndi musue bua ikale ne disanka. Kabitu bilomba anu malu manene to; imue misangu anu tumalu tukese ke tudi mua kuleja mundi mmunemeka menemene.”
Bua kuamba bualu pa bualu, tshilumbu ki ntshia kumanya ni utu unemekangana to; tshilumbu ntshia kumanya bikala muena dibaka nebe ni udi udiumvua munemekibue.
DÎYI DINENE DIA MU BIBLE: “Vualayi dinanga dikole didi ne luse, vualayi kabidi bulenga, didipuekesha, bupole ne lutulu.”—Kolosayi 3:12.