2 Dieleshangana diboko

TSHIDIBI BIUMVUIJA

Padi mulume ne mukajende beleshangana diboko mu dibaka mbenze anu bu muendeshi wa ndeke ne mumuambuluishi badi bakeba kuya muaba umue. Nansha padi ntatu imueneka, yonso wa kudibu udi wela meji bua “tuetu” pamutu pa “meme.”

DÎYI DINENE DIA MU BIBLE: “Kabatshiena kabidi babidi to, kadi bakadi mubidi umue.”​—Matayi 19:6.

Christopher udi wamba ne: “Dibaka ki mbualu bua kaditanta kadiambika to. Mulume ne mukajende badi ne bua kueleshangana diboko bua diende bimpe.”

BUA TSHINYI BIDI NE MUSHINGA

Padi bilumbu bijuka, mulume ne mukajende badi kabayi beleshangana diboko badi mua kujinga bua kuelangana tshilumbu pambidi pamutu pa kukeba mua kutshijikija. Kabualu kakese kadi mua kulua tshilumbu tshinene.

Alexandra udi wamba ne: “Dibaka dibaka nkueleshangana diboko. Bu katuyi tueleshangana diboko ne bayanyi tuvua mua kuikala bu bantu badi basangile nzubu tshianana, kadi kabayi ne lungenyi lumue padibu kumpala kua mapangadika manene, pamutu pa kuikala bu mulume ne mukaji.”

TSHIUDI MUA KUENZA

DIKONKONONA

• Ntu mmona makuta onso antu mpeta anu bu anyi meme nkayanyi anyi?

• Ntu ndiumvua mudilekelele menemene anu padi muena dibaka nanyi kayipu anyi?

• Ntu ngepuka balela ba muena dibaka nanyi, nansha yeye mulamatangane nabu bikole anyi?

YUKILA NE MUENA DIBAKA NEBE

• Mmalu kayi a mu dibaka dietu atutu tueleshangana diboko bimpe?

• Ngepi atudi mua kuakakaja?

• Mmalu kayi atudi mua kuenza bua kukolesha lungenyi lua dieleshangana diboko?

MIBELU

• Difuanyikijila wewe dia munenu, muena dibaka nebe dia muamua nunaya dinaya dia bantu babidi bakupilangana kandundu ka tenise. Ntshinyi tshiudi mua kuenza mu bulelela bua kudisanga kudi muena dibaka nebe bua nuikale mu tshisumbu tshimue tshia banayi?

• Pamutu pa kudiambila ne: ‘Ndi mua kumutshimuna bishi?’ amba ne: ‘Tuetu bonso babidi tudi mua kutshimuna bishi?’

Ethan udi wamba ne: “Kukebi udi mubinge ne udi mupile to. Tshidi ne mushinga nkuikala mu ditalala ne mu bobumue mu dibaka dienu.”

DÎYI DINENE DIA MU BIBLE: ‘Kanutangidi anu malu enu nkayenu, kadi nutangile kabidi malu a bakuabu.’​—Filipoyi 2:3, 4.