Didifila mu dibaka didi anu bu luongo ludi lushindamija dibaka mu ntatu
BUA BENA DIBAKA
1 Didifila
TSHIDIBI BIUMVUIJA
Mulume ne mukajende badi badifile mu dibaka diabu badi badimona bu dilamatangana dia kashidi, ne bualu ebu budi buambuluisha bua badiumvue mu bukubi. Muena dibaka yonso mmutuishibue ne: muinende neanemeke dibaka diabu nansha mu ntatu.
Bamue bena dibaka batu badimona benzejibue bua kushala kaba kamue bua tshidi bantu bakuabu anyi bena mu mêku abu mua kuamba. Kadi mbimpe bashale kaba kamue bualu mbanangangane ne badi banemekangana.
DÎYI DINENE DIA MU BIBLE: “Mulume kena ne bua kulekela mukajende to.”—1 Kolinto 7:11.
Micah udi wamba ne: “Wewe ne dibaka dienu ku muoyo, kuakuikala ufiika munda lukasa to. Neufuile muinebe luse ne lusaka ne neumulombe luse ne lukasa. Udi umona bilumbu bienu bu ntatu inudi mua kutantamena, ki mbu ntatu idi mua kunufikisha ku dishipa dibaka to.”
BUA TSHINYI BIDI NE MUSHINGA
Padi ntatu imueneka, bena dibaka badi kabayi badifile mu dibaka diabu ke badi nangananga mua kuambilangana ne: ‘Wewe kuvua kambela ka pa yanyi minu to,’ ne bakeba mishindu ya kushipa dibaka.
Mamu mukuabu diende Jean udi wamba ne: “Bantu ba bungi badi baselangana ne lungenyi lua ne: dibaka diodi kadiyi diende bimpe badi badishipa. Padibu baselangana ne lungenyi elu, kabakudifila bua dibaka diabu diende bimpe to.”
TSHIUDI MUA KUENZA
DIKONKONONA
Panudi nutandangana
Utu udimona ukadi unyingalala bua muuvua muselangane ne muena dibaka nebe anyi?
Utu udifuanyikija ukadi ne muntu mukuabu anyi?
Utu wamba malu bu mudi: “Ndi nkubenga” anyi ne: “Ndi nkeba muntu mukuabu udi mua kuntua mushinga” anyi?
Wewe muandamune eyowa ku nkonko eyi, nansha ku lumue, edi ke dîba dia wewe kukolesha didifila diebe mu dibaka dienu.
YUKILA NE MUENA DIBAKA NEBE
Mushindu utudi tudifila mu dibaka dietu mmukepe anyi? Biobi nanku, bua tshinyi?
Mmalu kayi atudi mua kuenza mpindieu bua kukolesha didifila dietu?
MIBELU
Ikala ufundila muena dibaka nebe tumêyi tua dinanga imue misangu
Leja muudi udifila mu dibaka diebe pa kuteka foto ya muena dibaka nebe pa mêsa ebe ku mudimu
Ikala ubikila muena dibaka nebe dituku dionso paudi ku mudimu anyi muaba mukuabu
DÎYI DINENE DIA MU BIBLE: “Muntu kapanduludi tshidi Nzambi musuike kaba kamue to.”—Matayi 19:6.