Kufuilangana luse kudi mua kujima ndululu idi mienze bu kapia
BUA BENA DIBAKA
4 Difuilangana luse
TSHIDIBI BIUMVUIJA
Kufuilangana luse nkulekelelangana bualu bubi, kuyi ulaminangana munda bua bualu abu to. Kufuilangana luse ki nkupepeja tshilema anyi kuenza bu ne: kabavua batuenzelatshi to.
DÎYI DINENE DIA MU BIBLE: “Nutungunuke ne kulejangana lutulu ne kufuilangana luse ne muoyo mujima nansha muntu yeye tshilumbu ne mukuabu.”—Kolosayi 3:13.
Aaron udi wamba ne: “Wewe munange muntu kuakuimanyina pa bilema biende to, kadi neumone tshidi muntu au ujinga bua kulua.”
BUA TSHINYI BIDI NE MUSHINGA
Wewe ulaminangana munda, udi mua kudikebela masama ne tunyinganyinga; udi kabidi mua kudinyangila dibaka.
Julia udi wamba ne: “Dituku dikuabu bayanyi wakandomba luse bua muvuaye muntape ku muoyo bikole. Kabivua bipepele bua kumufuila luse to. Ngakafika anu ku dimufuilalu, kadi bidi bintonda bua mumvua tshiyi mumufuilalu lukasa. Biakatukebela ntatu ivua kayiyi ne kudiyi to.”
TSHIUDI MUA KUENZA
DIKONKONONA
Musangu walonda, muena dibaka nebe yeye mukunyingalaje bua tshidiye muambe anyi muenze, diebeja ne:
‘Kabualu nansha kakese katu anu kantonda anyi?’
‘Bualu budiye mungenzele mbubi menemene bikengela anu andombe luse anyi? Peshi ndi mua kubulekela?’
YUKILA NE MUENA DIBAKA NEBE
Pa tshibidilu, bitu bitulomba mutantshi bule kayi bua tuetu kubuikidilangana?
Ntshinyi tshitudi mua kuenza bua kuikala kubuikidilangana lukasa?
MIBELU
Muena dibaka nebe yeye mukunyingalaje, kuambi mudiye ne meji mabi to.
Ditatshisha bua kumufuila luse, mumanye ne: “tuetu bonso tutu tulenduka misangu ya bungi.”—Yakobo 3:2.
Kimberly udi wamba ne: “Bitu bipepele bua kubuikidilangana patudi tuetu bonso mu tshilema, kadi bitu bikole bua kuenza nanku padibi bimueneka bu ne: muntu umue ke udi mu tshilema. Bitu bilomba budipuekeshi bulelela bua kuitaba luse ludibu batulomba ne kulufuilangana.”
DÎYI DINENE DIA MU BIBLE: “Akaja malu ne lukasa”—Matayi 5:25.
Wewe ulaminangana munda, udi mua kudikebela masama ne tunyinganyinga; udi kabidi mua kudinyangila dibaka