Itaba malu mimpe a bakuabu
Muaba udi bualu
Budinangi budi mua kufikisha muntu ku dimona bakuabu mu mushindu mubi. Muena budinangi utu udiangata ne mushinga mupitshidile. Udi udimona mupite bakuabu, ne udi umona bantu badi bashilangane nende bu badi bashadile kudiye. Muntu yonso udi mua kudimona ukadi pende nanku. Mukanda mukuabu udi wamba ne: “Bantu ba imue miaba batu bela meji ne: ngenzelu wabu wa malu, biakudia biabu, mvuadilu wabu, bibidilu biabu ne bikuabu, mbipite bia bantu bakuabu.” (Encyclopædia Britannica). Mmunyi mutudi mua kuepuka ngelelu wa meji wa mushindu au?
Tshidi Bible wamba
“Ne didipuekesha, numone bakuabu bu banupite nuenu.”—FILIPOYI 2:3.
Mbuena kuamba tshinyi? Bua kubenga kuikala ne lutambishi lua bungi, mbimpe tuikale ne budipuekeshi. Didipuekesha didi dituambuluisha bua kuitaba ne: mu malu makuabu, bakuabu mbatupite petu. Kakuena tshisumbu tshia bantu tshidi tshiotshi tshikokeshe bionso nansha.
Tuangate tshilejilu tshia Stefan. Uvua mukolele mu ditunga dia bakoministe, kadi wakaluangana bua kubenga kupepeja bena mu matunga avua kaayi a bakoministe. Udi wamba ne: “Ndi mujadike ne: bualu bunene bua kuenza bua kumbusha lungenyi lua kansungansunga, nkumona bakuabu bu badi batupite. Tshiena anu mumanye malu onso to. Ndi mua kulongela malu kudi muntu mukuabu yonso.”
Tshiudi mua kuenza
Ikala udiangata ne mushinga udi mukuakanyine, wikale mumanye ne: kudi malu audi pebe kuyi mua kukokesha. Ikala witaba ne: bakuabu badi mua kuenza malu audi wewe kuyi mua kukokesha. Kuikadi wamba ne: bantu bonso ba muaba kampanda batu benza malu anu mushindu umue nansha.
Pamutu pa kukosa musangu umue bua muntu wa mu tshisumbu kampanda tshia bantu ne: udi ne bubi kansanga, mbimpe kuanji kudiebeja ne:
Ikala witaba ne: bakuabu badi mua kuenza malu audi wewe kuyi mua kukokesha
‘Malu andi tshiyi musue kudi muntu eu mmabi bulelela anyi peshi mmashilangane patupu ne antu meme musue?’
‘Muntu eu udiku mua kupeta pende malu mabi kundi anyi?’
‘Mmalu kayi adi muntu mua kuenza andi meme tshiyi mua kukumbana kuenza?’
Wewe muandamune nkonko eyi kuyi ushima, nebikuambuluishe bua kumbusha mushindu mubi uuvua umona muntu au, ne neumone ne: muntu au udi pende ne malu mimpe a bungi.