Mmunyi mudi biamu mua kunyanga dibaka diebe?
Padi mulume ne mukajende benza mudimu ne biamu biabu bimpe, bidi mua kukolesha dibaka diabu. Tshilejilu, bidi mua kubambuluisha bua kumanya mudi yonso wa kudibu munda mua dituku dijima.
Kadi bamue bena mabaka batu bakuata mudimu bibi ne biamu biabu, bibafikisha ku . . .
dipangila dîba dia mushinga dia kusomba pamue.
dijimija dîba mu dienza midimu ya patupu kumbelu.
dipanga kueyemenangana, kabatshiyi ne lulamatu kudi umue ne mukuabu.
TSHIUDI NE BUA KUMANYA
DISOMBA PAMUE
Mulume mukuabu diende Michael udi wamba ne: “Imue misangu pantu nsomba ne mukajanyi, ntu mmona anu bu ne: ‘kenapu to.’ Udi anu katshia winangila mu telefone wende, pashishe ngumvua wamba ne: ‘Too ne mpindieu mbinkolele bua kupeta tshindi nkeba.’” Mulume mukuabu diende Jonathan udi wamba ne: mu nsombelu ya nanku “bena dibaka badi mua kuikala pamue kadi kabayi badiumvua balamatangane to.”
LUKONKO LUA KUELELA MEJI: Diyukila ku telefone anyi difundilangana mesaje ditu ditamba kuangata dîba diuvua mua kuyukila ne muena dibaka nebe anyi?—EFESO 5:33.
MUDIMU
Bamue badi benza mudimu wa kuandamuna ku telefone anyi kuandamuna ku mesaje adi bantu batuma, bawenza butuku ne munya. Bakuabu bobu batu ne mudimu udi kawuyi ubalomba nunku to, tshibi ku ndekelu kua dituku mudimu uvuabu benza wowu kawuyi mujike, badi mua kupitshisha dîba dia bungi kumbelu bua kuwujikija. Mulume mukuabu diende Lee udi wamba ne: “Dîba dintu muteke bua kusomba ne mukajanyi, batu bambikila ku telefone anyi bantumina mesaje bua malu a mudimu; bitu binkolela bua kubenga kuandamuna ku telefone peshi ku mesaje au.” Mukaji mukuabu diende Joy udi wamba ne: “Ndi ngenzela mudimu kumbelu, nunku bitu binkolela bua kumanya dîba dia kuwimanyika, bindomba bua kudienzeja bikole bua kuikala ne nkatshinkatshi.”
LUKONKO LUA KUELELA MEJI: Utu utuma ntema yebe yonso kudi muena dibaka nebe panudi nuyukila nende anyi?—LUKA 8:18.
LULAMATU
Bena dibaka ba bungi badi bamba ne: tshidi tshitamba kukebesha dikokangana pankatshi petu, si mpadi umue wa kutudi muele bintu bidi mukuabu kayi umona bu bimpe muaba wa dipetelangana ku Enternete. Too ne bamue bena dibaka mbafike ku diamba ne: bavua bele bimue bintu ku Enternete kabayi basue bua bena dibaka nabu babimone to.
Ke bualu kayi bantu ba bungi batu bamba ne: miaba ya dipetelangana ku Enternete idi ne njiwu misokome bua bena dibaka, ne idi mene mua kubafikisha ku dienda masandi. Ki mbualu bua kukema to, bualu bandumbulula ba malu a dishipa dia mabaka badi bamba ne: miaba ya dipetelangana ku Enternete idi itamba kushipesha mabaka a bungi lelu.
LUKONKO LUA KUELELA MEJI: Utu usokoka muena dibaka nebe malu anutu nuyukila ne muntu udi kayi mulume nebe anyi mukaji nebe anyi?—NSUMUINU 4:23.
TSHIUDI MUA KUENZA
KEBA BUA KUMANYA MALU ADI NE MUSHINGA WA BUNGI
Muntu yeye ulengulula kudia, udi unyana. Bia muomumue, muntu yeye ulengulula bua kupitshisha dîba pamue ne muena dibaka nende, dibaka diabu nedikale anu ne bilumbu.—Efeso 5:28, 29.
DÎYI DINENE DIA MU BIBLE: “Nukebe mua kumanya malu adi ne mushinga wa bungi.”—FILIPOYI 1:10.
Yukilayi bua ngenyi idi kuinshi eku numone inudi mua kutumikila, anyi fundayi yenu nuenu idi inuambuluisha bua biamu bienu kabinyangi dibaka dienu.
Ikalayi nudia pamue dituku dionso
Ditekelayi bikondo bia kubenga kubuela mu biamu bienu
Ditekelayi dituku dia kuenzelangana tumalu tuimpe babidi pa nkayenu
Jimayi biamu bienu butuku, kanuyi nubuela nabi mu nzubu wa kuladila to
Ditekelayi minite 15 dituku dionso bua kuyukila babidi, kanuyi ne biamu bienu ku luseke to
Kanubuedi ku Enternete munkatshi mua mêba kampanda to