BULOBA BUDI MU KAYUMBAYUMBA

3 | Kuba malanda ebe ne bakuabu

BUA TSHINYI BIDI NE MUSHINGA?

Bu mudi tunyinganyinga tuenda tuvula bua ntatu idi pa buloba, bantu ba bungi badi balekela malanda abu ne bakuabu anyanguka.

Bantu badi baditola, bashala kule ne balunda babu.
Bena dibaka badi batamba kuenzelangana malu ne tshikisu.
Baledi kabena batamba kutabalela malu adi atonda bana babu anyi mene kabena baatabalela nansha kakese to.

Tshiudi ne bua kumanya

Balunda badi ne mushinga bualu badi bakuambuluisha bua kuikala bimpe, ku mubidi ne mu lungenyi, nangananga mu bikondo bia ntatu.
Disamisha mutu bua ntatu idi pa buloba eyi didi mua kunyanga nsombelu wetu wa mu dîku mu mushindu utuvua katuyi belele meji.
Ngumu mibi idi itonda idi mua kukebela bana bebe ntatu bikole iuvua kuyi muelele meji to.

Tshiudi mua kumanya

Bible udi wamba ne: “Mulunda mulelela udi uleja dinanga mu bikondo bionso ne yeye mmuanetu udi muledibue bua bikondo bia dikenga.”—Nsumuinu 17:17.

Tetabi kuvuluka muntu utu ukuatshishangana ne upeshangana mibelu mimpe. Balunda ba buena aba badi mua kutuambuluisha bua kutua ntatu ya ku dituku tshiadi.

TSHIA KUENZA—Malu a mushinga

Bikondo bidi ntatu ibudika mu bantu, kuba malanda ebe ne bakuabu. Bua kuakuba, enza malu aa

SHINDAMIJA DIBAKA DIEBE

Shindamija dibaka diebe

Bible udi wamba ne: “Bantu babidi mbapite muntu umue . . . Bualu biadishinda umue wa kudibu, mukuabu neambuluishe muena diende bua kujuka.” (Muambi 4:9, 10) Mulume ne mukaji badi ne bua kuenza malu bu bendeshi ba ndeke babidi badi mu ndeke umue, ki mbu ndeke ya mvita ibidi idi iluishangana to.

Wewe ne malu adi akutonda, dienzeja bua kabikusaki bua kuenzela muena dibaka nebe malu mu mushindu mubi to; ikala ne lutulu ne dilekelela dia malu.
Nansha ku lumingu, yukila ne muena dibaka nebe bua malu anudi nawu. Nuimanyine pa tshilumbu tshinudi natshi bua kutshijikija, kanubundianganyi to.
Nuditekele dîba dia kuenza malu kampanda pamue adi anusankisha.
Yukidilanganayi bua bikondo bimpe binuvua bapitshishe pamue. Tshilejilu, nudi mua kutangila foto ya dibaka dienu anyi kuvuluka malu makuabu mimpe.

“Mulume ne mukaji kabena mua kupetangana mu malu onso to, kadi abi kabiena biumvuija ne: kabena mua kuenza malu pamue, bikale tshimuku to. Mulume ne mukajende badi mua kuangata dipangadika pamue, pashishe kuenza bua dipangadika diabu adi dikumbane.”—David.

LAMA BULUNDA BUEBE NE BAKUABU

Lama bulunda buebe ne bakuabu

Pakumbusha dikuatshisha didi balunda betu batupesha, ela meji bua mishindu iudi mua kukuatshishangana. Paudi ukolesha bakuabu, bidi bikukolesha pebe.
Yukila ne bamue balunda bebe dituku dionso bua kumanya ni badi bimpe.
Ebeja balunda bebe bakuambile muvuabu batantamene ntatu ya buena iudi nayi.

“Dîba diudi ne buluishi buikale bu tshipepele tshikole, balunda bebe badi mua kulua muaba wa wewe kunyemena. Badi mua kukupesha mibelu mimpe, nansha ya bakuvuluija patupu malu aukadi mumanye. Badi bakutabalela, ne mbamanye ne: tutu ubatabalela pabu.”—Nicole.

IKALA MULEDI UDI UFILA TSHIKUATSHISHA

Ikala muledi udi ufila tshikuatshisha

Bible udi wamba ne: ‘Ikala ne lukasa ku diteleja, ne lujoko ku diakula.’ (Yakobo 1:19) Kumpala bana benu badi mua kuanji kuelakana bua kunuleja malu adi abatonda ne adi abenza buôwa; kadi nuenu nubateleja ne lutulu, nenubambuluishe bua banuambile idibu nayi munda.

Keba muaba udi bana mua kuyikila nebe bimpe badilekelele. Bamue bana batu batamba kuakula padibu mu didiolola, bu mudi kunyunguluka nabu mu mashinyi anyi ku makasa, pamutu pa kusomba ne baledi babu batangilangane mu mpala.
Enza bua bana bebe kabatambi kutangila luapolu ya malu adi yenza bibi ku muoyo to.
Ambila bana bebe malu audi muenze bua kulama dîku diebe mu bukubi.
Longolola malu bua mpukapuka idi mua kumueneka, nuambulule mu dinaya ne bana bebe.

“Yukila ne bana bebe, uleke bakuambile mudibu badiumvua. Bualu badi mua kukusokoka malu adi abenza buôwa, adi abatonda, anyi adi mabafiikishe munda. Bambila ne: uvua pebe uluangana ne malu aa. Ubambile kabidi tshiuvua wenza bua kuatantamena.”—Bethany.